१९ मंसिर/अर्थ र व्यापार – नाडा अटोमोबाइल्स एसोसिएसन अफ नेपाल र चिनियाँ परिषद् (सीसीपीआईटी–अटो) बीच नेपाल–चीन अटोमोबाइल व्यापार प्रर्वधनको सहकार्यका लागि सम्झौता भएको छ । प्रधानमन्त्री केपी शर्मा ओलीको औपचारिक चीन भ्रमणमा गएको नाडा अटोमोबाइल्स एसोसिएसनको प्रतिनिधीले नेपाल–चीन अटोमोबाइल व्यापार र सहकार्य प्रर्वधन गर्न चीनको सीसीपीआर्यटी अटोसँग सम्झौता गरेको हो ।
१७ देखि २० मंसिरसम्म चीनको औपचारिक भ्रमणमा रहेका प्रधानमन्त्री ओलीको भ्रमण दलमा नााडाका अध्यक्ष करण चौधरीसहितको टोली सहभागी छ । सो टोलीले मंगलबार सीसीपीआईटी अटोसँग सो सम्झौता गरेको नाडाले जनाएको छ ।
भ्रमणको क्रममा नेपाल उद्योग वाणिज्य महासंघको नेतृत्वमा गएको व्यापारिक प्रतिनिधि मण्डलमा नाडा अटोमोबाइल्स एसोसिएसन अफ नेपालको प्रतिनिधित्व गर्दै नाडाका अध्यक्ष चौधरी र महासचिव सुरेन्द्रकुमार उपे्रतीको उपस्थितिमा दुई देशका व्यापारिक प्रतिनिधि मण्डलबीच विभिन्न विषयमा छलफल भएको थियो ।
सो छलफलसँगै नाडा र सीसीआईपी अटोबीच यस साझेदारीपत्रमा हस्ताक्षर भएको हो । नाडा अटोमोबाइल्स एसोसिएसन र चीन काउन्सिल फर द प्रमोशन अफ इन्टरनेशनल ट्रेड, अटोमोबाइल सब –काउन्सिल (सीसीपीआईटी अटो) ले अटोमोबाइल क्षेत्रको व्यापार र सहकार्यलाई थप मजबुत बनाउन महत्वपूर्ण सम्झौतामा हस्ताक्षर गरेका हुन् । यो सम्झौताले नेपाल र चीनबीच आर्थिक सम्बन्धलाई सुदृढ गर्न, व्यापार प्रर्वधन गर्न र अटोमोबाइल उद्योगमा दिगो विकासका सम्भावनाहरू अघि बढाउन महत्वपूर्ण भूमिका खेल्ने नाडाले जनाएको छ ।
यस सम्झौता अन्तर्गत नाडाले व्यापार मेलाहरू, व्यावसायिक प्रतिनिधिमण्डलको आदानप्रदान र नीति वकालत जस्ता संयुक्त पहलमार्फत दुवै देशका अटोमोबाइल उद्योगका नयाँ सम्भावनाहरू खुलाउने लक्ष्य राखेको जनाएको छ । यसैगरी, सीसीपीआईटी अटोले नेपालमा चिनियाँ लगानी प्रर्वधन गर्ने, प्रविधि आदान प्रदानलाई सहयोग गर्ने र संयुक्त कार्यक्रमहरू सञ्चालनमा साथ दिने सम्झौतामा उल्लेख छ ।
यो साझेदारीको कार्यान्वयनको निगरानी गर्न संयुक्त कार्य समूह गठन गरिने नाडाले जनाएको छ । यसले नियमित प्रगति समीक्षा गर्ने र आवश्यक सुधारका उपायहरू लिने,दुवै पक्षले बौद्धिक सम्पत्तिको अधिकारको सम्मान गर्ने र सहकार्यका क्रममा गोपनीयता कायम राख्ने प्रतिबद्धता जनाएका छन् । यो सम्झौता दुवै देशका अटोमोबाइल उद्योगलाई दिगो र समृद्ध बनाउँदै आर्थिक सहकार्यको नयाँ अध्याय सुरु गर्ने दिशामा ठोस कदम भएको नाडाले जनाएको छ ।