८ जेष्ठ / अर्थ र व्यापार- नेपालस्थित मलेसियाली राजदूतावासले विज्ञप्ती जारी गर्दै भिषा प्रोसेसिङ गर्ने वान स्टप सेन्टर (ओएससी) र भिएलएनको कार्य नरोक्न सूचना जारी गरेको छ । दूतावासले सोमबार प्रेस विज्ञप्ती जारी गर्दै भिसा प्रोसेसिङ गर्ने ओएससी र भिएलएनको काम सुचारु राख्न भनेको हो ।

मलेसिया जाने पर्यटकको सोसियल भिसा वान स्टप सेन्टर र भिएलएनबाटै प्रदान गरिने भएकाले कुनै पनि हालतमा नरोक्न दूतावासले भनेको छ । मलेसियन दूतावासले विदेशी नागरिक ल्याउनका लागि भिएलएन, ओएससी र विदेशी कामदार ल्याउनका लागि आइएससी र बायोमेट्रिक मेडिकल नेपाल लगायत अन्य देशमा मलेसियन सरकारकै निर्णय अनुसार लागू गरिएको पनि जानकारी दिएको छ । मलेसिया सरकारले भिषा प्रोसेसिङ सफ्टवेयर मार्फत भिषा जारी गर्ने निर्णय गर्दै मलेसियाकै अल्ट्रा÷किराना एसडिएन विएचडी कम्पनी अन्तर्गत भिएलएन नेपाललाई भिषा प्रोसेसिङको जिम्मेवारी दिएको थियो । सोही अनुसार भिएलएन नेपालले २०१३ नोबेम्बर १ देखि मलेसिया जाने नेपालीको भिषा प्रोसेसिङ गर्दै आएको छ । भिएलएनले मलेसिया जाने नेपालीको पासपोर्ट दुतावास पु¥याउने र संकलन गर्नका लागि वान स्टप सेन्टर (ओएससी) मार्फत प्रति पासपोर्ट ६ हजार ७ सय भ्याट वाहेक शुल्क लिने गरेको छ । 

मलेसियन दूतावासले मलेसियामा रोजगारीमा जानेहरुका लागि पहिलो कदमको रुपमा रहेको इमिग्रेसन सेक्युरिटी क्लियरेन्स (आइएससी) लाई एक साताका लागि बन्द राख्न भनिएपनि वान स्टप सेन्टरलाई आफ्नो काम जारी राख्न भनेको छ । गएको बुधबार श्रम मन्त्रालयले नेपालबाट कुनै स्वीकृति नलिई सञ्चालनमा रहेका बायोमेट्रिक, माइग्राम्स, आइएससी, ओएससी र भिएलएन सेवा तत्काल बन्द गर्न निर्देशन दिँदै कानुनी प्रक्रिया थाल्न निर्देशन दिएका थिए । 

आइतबार साँझ प्रहरीले बायोमेट्रिक सेन्टर, आइएससी, भिएलएन र वान स्टप सेन्टरमा छापा मारी सञ्चालकहरुलाई पक्राउ गरी कागजात र कम्प्युटर समेत बरामद गरेको थियो । मलेसियन दूतावासले सोमबार एक प्रेस विज्ञप्ति जारी गर्दै आइतबारको घटनाबारे ध्यानाकर्षण भएको बताएको छ । विज्ञप्तिको सुरुवातमै यी संस्थाहरु मलेसिया सरकारकै एक अभिन्न अंग रहेको भन्दै यी संस्थाहरुले श्रमिक छनौटदेखि सामाजिक तथा श्रम भिषाका लागि भिषा आवेदनको प्रक्रिया अघि बढाउने उल्लेख गरिएको छ ।

दूतावासले सरकारले सुरु गरेको अनुसन्धानलाई सघाउने भन्दै आईएससीलाई आफ्ना कामकारबाही एक हप्ता वा थप सूचना नआएसम्मका लागि बन्द गर्न निर्देशन दिएको छ । आईएससी मलेसियामा कामदार छनौटको लागि अपनाइने प्रमाणिक प्रक्रियाको पहिलो चरण हो । यसको साथै दुतावासले सामाजिक र भ्रमण भिसा प्रदान गर्ने काम सहज रुपमा चालु राख्नको लागि वान स्टप सेन्टर (ओएससी) लाई आफ्ना काम कारबाहीहरु अर्को सूचना नआएसम्मको लागि सुचारु राख्न भनेको छ ।

मलेसियाली दूतावासले सर्वसाधरणबाट प्रत्यक्ष भिसा आवेदन लिन बन्द गरिसकेको भन्दै मलेसियाली भिसा प्रणालीको प्रमाणिक प्रक्रिया अन्तर्गत ओएससी मलेसियाको लागि सम्पूर्ण भिसा आवेदनहरु संकलन गर्ने र बाँकी कार्य गर्न जिम्मेबार केन्द्र भएको दूतावासको स्पष्टीकरण छ । तर, नेपाल सरकारले भने आफूले मलेसिया जाने प्रक्रियाका लागि काम गर्न मलेसियन दूतावासबाहेक अरुलाई नचिनेको र रकम उठाउनका लागि कसैलाई स्वीकृति नदिएको भन्दै यी संस्थाहरुको वैधानिकता नरहेको स्पष्ट पारेको थियो ।