१३ असोज/अर्थ र व्यापार– मलेसियाका लागि नवनियुक्त नेपाली राजदूत डिल्लीराज पौडेलले मलेसियामा नेपाली श्रमिक÷कामदारहरुले भोगेका विविध समस्या समाधानका लागि श्रमिक सहायता केन्द्र स्थापना गर्ने प्रतिवद्धता जनाएका छन् ।
गैरआवासीय नेपाली संघ सहित मलेसियामा रहेका नेपाली संघ–संस्थाहरुले आयोजना गरेको स्वागत कार्यक्रममा राजदूत पौडेलले यस्तो प्रतिवद्धता जनाएका हुन ।
उनले घर फिर्ती, तलब सुविधा, आवास, कानूनी समस्या तथा स्थानीय प्रशासनसँग सम्बन्धित समस्यालाई तत्काल समाधान गर्न २४ सै घण्टा सञ्चालन हुने गरी श्रमिक सहायता केन्द्र सञ्चालन गरिने बताए ।
यसैगरि, उनले विभिन्न कारणले समस्यामा परेका नागरिकहरुको उद्धार तथा समस्या समाधानका लागि कल सेन्टर, कानूनी सहायता तथा सेल्टरलाई व्यवस्थित गरिने बताए ।
सो कार्यक्रममा राजदूत पौडेलले मलेसियामा रहेका नेपाली संघ संस्थाहरुसँग समन्वय तथा सहकार्यलाई विशेष महत्व दिने तथा दूतावास पुग्न नसक्ने स्थानमा नेपाली संघ संस्थाहरुलाई परिचालन गर्ने योजना रहेको समेत बताए ।
नेपाल सरकार तथा मलेसिया सरकारबीच सन् २०१८ अक्टोबरमा भएको श्रम समझदारीमा उल्लेखित श्रमिक अधिकारका विषयहरुको प्रभावकारी कार्यान्वयन आफ्नो प्राथमिकतामा रहेको उनको भनाइ थियो ।
उनले मलेसियामा रहेका नेपालीहरुलाई औपचारिक च्यानल (बैंकिङ च्यानल)बाट मात्र रेमिट्यान्स पठाउन आग्रह गर्दै हुण्डीलगायत अवैध माध्यमको प्रयोगलाई नियन्त्रण गने समेत बताएका छन ।
यसैगरि, राजदूत पौडेलले मुलुकको हितका लागि नेपाल र मलेसियाबीचको सम्बन्ध समधुर बनाउन आफू लागिपर्ने बताए ।
मलेसियाको क्वालालम्पुरस्थित ग्राण्ड कन्टिनेन्टल होटलमा सम्पन्न भएको सो कार्यक्रममा एनआरएनए मलेसियाका अध्यक्ष विनोद थापा लगायतले नवनियुक्त राजदुत पौडेललाई स्वागत गरेका थिए ।
मलेसिया नेपाली कामदारका लागि प्रमुख र आकर्षक श्रम गन्तव्य मुलुकको रूपमा रहेकोे छ । हाल करिब साढेदुई लाखभन्दा धेरै नेपाली कामदार कार्यरत रहेको मलेसियामा दैनिक २ हजारको संख्यामा नेपाली कामदार जान थालेका छन् ।
जसका कारण हाल नेपाल भित्रिने रेमिट्यान्स रकम मध्ये मलेसियाबाट आउने हिस्सा सबैभन्दा बढी एवं कुल रेमिट्यान्सको झन्डै एक तिहाई भन्दा बढी रहेको छ ।