४ असार / अर्थ र व्यापार - एसियाली पूर्वाधार लगानी बैंक (एआइआइबी)ले नेपालले प्रस्ताव गरेका दुई आयोजनामा करिब ३८ अर्ब रुपैयाँ (३ सय ८० मिलियन अमेरिकी डलर) लगानी गर्ने भएको छ । नेपालले गत वर्ष प्रस्ताव गरेका ६ मध्ये सहरी पूर्वाधार विकास कार्यक्रम र विद्युत् वितरण प्रणाली सुधार कार्यक्रमका लागि सहयोग गर्न एआइआइबी तयार भएको हो ।
सहरी पूर्वाधार विकास कार्यक्रमका लागि २८ अर्ब र विद्युत् वितरण प्रणाली सुधार कार्यक्रमका लागि १० अर्ब रुपैयाँ प्रस्ताव गरिएको छ । एआइआइबीको टोलीले पहिलो चरणको अध्ययनसमेत गरिसकेको यो आयोजनाको ऋण सम्झौता छिट्टै गर्ने तयारी अर्थ मन्त्रालयको छ । नेपालले यी दुईबाहेक ८० मेगावाटको शारदा बबई जलाशययुक्त आयोजना, पोखरा–बेनी–मुस्ताङ सडक स्तरोन्नति, टोखा–छहरे सुरुङ मार्ग र तराईका सहरी पूर्वाधार सुधार कार्यक्रममा लगानीको प्रस्ताव एआइआइबीसमक्ष गरेको थियो ।
एआइआइबीले नेपाललाई सुरुदेखि नै कम विवादित र तयारी अवस्थामा रहेका आयोजना प्रस्ताव गर्न आग्रह गरेको थियो । तत्काल लगानी गर्न सकिने आयोजना नभएपछि पहिलो चरणमा ६ आयोजनामा लगानीका लागि नेपालले आग्रह गरेको थियो । अघिल्लो वर्ष असारमा सम्पन्न एआइआइबीको पहिलो वार्षिक बैठकमा नेपालले ती आयोजनामा लगानीका लागि प्रस्ताव पठाएको हो । साढे दुई वर्षअघि स्थापना भएको बैंकको संस्थापक नेपाल पनि हो । चीनको मुख्य लगानी रहेको बैंकमा नेपालसहित ५७ राष्ट्र संस्थापक छन् ।
एआइआइबीले ती आयोजनाको स्थलगत अध्ययन गरेको थियो । गत कात्तिकमा नेपाल आएको टोलीले यी आयोजनाको स्थलगत अध्ययन गरेको हो । एआइआइबीका के छ्वाङको नेतृत्वमा आएको पाँच सदस्यीय टोलीले यी आयोजनाको स्थलगत अध्ययन गरेको थियो । टोलीले तत्कालीन अर्थमन्त्री कृष्णबहादुर महरासँग पनि भेट गरेको थियो । भेटमा बैंकका प्रतिनिधिले नेपालमा लगानीका लागि आफूहरू सकारात्मक रहेको जवाफ दिएका थिए ।

एआइआबी बोर्ड अफ गभर्नर्सको दोस्रो बैठकको अन्तिम सत्रमा कार्कीले नेपालमा पूर्वाधार विकासका लागि कुल गार्हस्थ उत्पादनको ९ देखि १० प्रतिशत लगानी गर्नुपर्ने आवश्यकता भए पनि अहिले ४ प्रतिशत मात्रै लगानी भइरहेको छ  र यो अन्तर कम गर्न एआइआबीलगायतका संस्थाले लगानी गर्नुपर्नेछ ।