१२ कात्तिक/अर्थ र व्यापार – हाल देशको अर्थतन्त्र खस्किँदै गएको भन्दै यसलाई सुधार गर्न नेकपा एमाले सम्बद्ध उद्योगी व्यवसायीहरुले प्रधानमन्त्री केपी शर्मा ओलीलाई भेटेर विविध सुझाव पेश गरेका छन् ।
एमाले सम्बद्ध व्यवसायीहरुको संगठन नेपाल उद्योग तथा व्यवसायी महासंघले सोमबार प्रधामन्त्री ओलीलाई प्रधानमन्त्री निवास बालुवाटारमा भेटेर वर्तमान अर्थतन्त्र सुधारका बारेमा ‘निजी क्षेत्रका साझा सवाल’ विषयक ४० पृष्ठ लामो सुझावपत्र पेश गरेको हो ।
महासंघले ‘सुदृढ अर्थतन्त्र निर्माणको आधार सबल निजी क्षेत्र र बलियो पूर्वाधार’ भन्ने नाराकासाथ प्रधानमन्त्री ओलीलाई भेटेर सो सुझाव पेश गरेको छे । सो सुझाव पेसगर्ने क्रममा महासंघका संयोजक भागिरथ सापकोटाले अहिले देशको अर्थतन्त्रका साथै उद्योगी व्यवसायी जटिल परिस्थितीबाट गुज्रिरहेको भन्दै यसलाई सुधार गर्न सरकारले तत्काल नीतिगत सुधार गर्नुपर्ने माग गरे ।
आफुहरुले सबै क्षेत्रका उद्योगी व्यवसायीसँग छलफल गरी सबैको प्रतिनिधित्व हुनेगरी निजी क्षेत्रका सवाल तयार पारेको भन्दै उनले त्यसलाई कार्यान्यन गर्न आफु मातहतका निकायलाई तत्काल निर्देशन दिन समेत महासंघको तर्फबाट माग गरिएको बताए ।
महासंघले केही समय अघि निजी क्षेत्रका समस्या र समाधानका विषयमा छलफल कार्यक्रम आयोजना गरेको थियो । सो कार्यक्रमबाट आएका निचोड र अहिले उद्योगी व्यवसायीले भोगिरहेका समस्यामा विषय तयारगरी प्रधानमन्त्री ओलीलाई बुझाएको महासंघले जनाएको छ ।
जसमा उद्योग व्यवसायमा देखिएका समस्या र समाधानका उपाय, कर प्रणाली एवं राजस्व प्रशासन सुधारका विषय र सरकारले तत्काल र दिर्घकालिन रुपमा लिनुपर्ने सुधारात्मक कदमका विषयहरु यस सुझावपत्रमा समेटिएको छ ।
विशेषगरी, साना तथा मझौला रूग्ण उद्योगहरूको संरक्षण, लगानीको वातावरण सिर्जना गर्नुपर्ने आवश्यकता रहेको र ठूला उद्योगमा थप लगानीको वातावरण बनाई पूँजी पलायन रोक्नुपर्ने तथा राष्ट्रिय पूँजी निर्माण गर्नुगर्ने लगायतका चुनौतीहरु रहेको महासंघको तर्फबाट पेस गरिएको सो सुझावपत्रमा उल्लेख छ ।
यसैगरी, सापकोटाले मुलुकमा औद्योगिक विकास भएमात्र रोजगारीको आधार सिर्जना हुने भन्दै यसलाई महासंघले मात्र होइन सरकार र आम जनताले समेत मनन गर्नुपर्ने बताए । ‘औद्योगीकरण रोजगार सिर्जनाको लागि मात्र होइन आर्थिक विकासको मेरुदण्ड पनि हो भन्ने विश्वव्यापी मान्यतामा सरकार र निजी क्षेत्र दुवैको समान मत छ,’ उनले भने, ‘यसले उद्योगहरूको स्थापना र सञ्चालन गरी उत्पादित वस्तुहरूको घरेलु बजारमा गरिने ओसार–पसार, बिक्री–वितरण र बाह्य बजारमा गरिने निर्यातबाट राजस्वमा वृद्धि, विदेशी मुद्रा आर्जन तथा सञ्चिति, रोजगारी सिर्जना र मुलुकको आम्दानी अभिवृद्धि हुनेमा कुनै दुईमत छैन ।’
सोही अनुरुप अबका दिनमा सरकारले पनि उद्योगी व्यवसायीका समस्या समाधान गर्दै आर्थिक विकासका लागि नीतिगत सुरधार गर्नुपर्ने महासंघको सुझाव छ ।
सो भेटमा प्रधानमन्त्री ओलीले अहिलेको अर्थतन्त्रप्रति चासो व्यक्त गर्दै सुधारका लागि सरकार दृढ भएर अधि बढेको बताए । प्रधानमन्त्री ओलीले सो सुझावपत्र बुझ्दै उद्योगी व्यवसायीका समस्या समाधानमा सरकारले तत्काल अग्रसरता दिने प्रतिवद्धता व्यक्त गरे ।
सो भेटवार्तामा प्रधानमन्त्रीका आर्थिक तथा विकास सल्लाहकार डा. युवराज खतिवडा, एमालेको जनवर्गीय संगठनका इन्चार्ज भानुभक्त ढकाल, महासंघका इन्चार्ज रचना खड्का, महासंघका महासचिव बालकृष्ण शिवाकोटी, कोषाध्यक्ष डीमप्रकाश पौडेल, महासंघका सचिवालय सदस्यहरु र बस्तुगत संघका सदस्यहरुको उपस्थिती रहेको थियो ।