२० असार/अर्थ र व्यापार – नेपाल निर्माण व्यवसायी महासंघले काम गरेबापत् रकम भुक्तानी नपाएकै कारण डडेल्धुराका एक निर्माण व्यवसायीको दुःखद निधन भएको खबरप्रति आफ्नो गम्भीर ध्यानाकर्षण भएको जनाएको छ ।
जिल्ला निर्माण व्यवसायी संघ डडेल्धुराका कार्य समिति सदस्यसमेत रहेका व्यवसायी डम्बरदेव भट्ट (सन्तोष)को उपचारका क्रममा धनगढीमा गत १५ असारमा निधन भएको खबरबाट यस महासंघ मर्माहत भएको महासंघले जनाएको छ ।
डडेल्धुरा जिल्ला अमरगढी नगरपालिका–५ निवासी निर्माण व्यवसायी भट्टलाई घरनजिकैको जंगलमा घाँटीमा चक्कुले प्वाल परेको अवस्थामा फेला पारिएपछि स्थानीय अस्पतालमा प्रारम्भिक उपचारपछि थप उपचारार्थ धनगढीस्थित सेती प्रादेशिक अस्पताल ल्याइएकामा उपचारको क्रममा उनको निधन भएको थियो ।
स्थानीय पूर्वाधार विकास आयोजना कार्यालयअन्तर्गतका ठेक्काको भुक्तानी सम्बन्धित कार्यालयबाट नआएपछि भट्टले आफू ठूलो आर्थिक समस्यामा परेको निकटस्थलाई बताएको जानकारीमा आएको महासंघले जनाएको छ ।
‘व्यवसायीको ठूलो रकम भुक्तानी नहुँदा उनीहरूले मानसिक रूपमा विक्षप्त भई ‘आत्मदाह’ गर्नसक्ने अत्यन्त विषम परिस्थितितर्फ यस महासंघले विगत केही महिनाअघिदेखि नै सरकारलगायत विभिन्न सरोकारवाला निकायको ध्यानाकर्षण गराए पनि हालसम्म कुनै सुनुवाइ नभएको विदितै छ’ महासंघका महासचिव रोशन दाहालद्वारा बुधबार जारी विज्ञप्तिमा यस्तो भनिएको छ ।
महासंघद्वारा जारी विज्ञप्तिमा उल्लेख भएअनुसार यस अर्थमा भट्टको मृत्युको जिम्मेवारी राज्यले नै लिनुपर्ने महासंघको दाबी छ । सार्वजनिक खरिद नियमावलीको १३औं संशोधनपछि राज्यबाट व्यवसायीको करिब ४० अर्ब रुपैयाँभन्दा बढी भुक्तानी नभए हजारौं निर्माण व्यवसायी आर्थिक रूपमा गम्भीर समस्यामा परेको महासंघले जनाएको छ ।
अब आर्थिक वर्ष समाप्त हुनै लाग्दासमेत सरकारले व्यवसायीको यति धेरै अर्बौंं रकम भुक्तानी गर्न कुनै तदारुकता नदेखाएमा अन्य व्यवसायीबाट समेत यस्तै दुःखद् घटना हुनसक्ने पीडादायी अवस्थाप्रति महासंघले सरकारको गम्भीर ध्यानाकर्षण गराएको छ । यस्ता दुःखदायी घटना रोक्न आवश्यक पहल गर्नसमेत महासंघका महासचिव दाहालले सरकारसमक्ष जोडदार माग गरेका छन् ।
महासंघले व्यवसायी भट्टप्रति हार्दिक श्रद्धाञ्जली व्यक्त गर्दै शोकमा रहेका परिवारजनप्रति समवेदना प्रकट गरी सो घटनाको निष्पक्ष छानबिन गरी सत्यतथ्य तत्काल सार्वजनिक गर्नसमेत सरकारसँग माग गरेको छ ।