१६ जेठ/अर्थ र व्यापार – अर्थमन्त्री वर्षमान पुनले अहिलेको आर्थिक शिथिलतालाई अन्त्य गर्ने गरी बजेट ल्याएको र निजी क्षेत्रले यसको स्वागत गरेको दाबी गरेका छन्।
उनले बुधबार अर्थ मन्त्रालयमा पत्रकार सम्मेलन गरी आमजनतादेखि उद्योगी व्यवसायीमा आशा जगाउने गरी आगामी आर्थिक वर्षको बजेट ल्याएको दाबी गरेका हुन्। बजेट सार्जजनिक भएपछि नागरिकमा देखिएको प्रभाव निजी क्षेत्र र प्रतिपक्षले दिएको प्रतिक्रिया हेर्दा बजेट सन्तुलित आएको उनको दावी छ ।
अर्थमन्त्री पुनले केही व्यक्तिको दबाबमा बजेट निर्माण नगरिएको बताएका हुन्। ‘केही प्राविधिक त्रुटिबाहेक बजेटमा समस्या छैन। बजेटले अहिलेको आर्थिक शिथिलता अन्त्य गर्नेछ। उद्योगी व्यवसायीमा आशा जगाएको छ,’ उनले भने, ञअहिलेको अर्थतन्त्रलाई गति दिने गरी बजेट ल्याउने कुरा निर्माणकै क्रममा भन्दै आएको थिएँ। त्यहीअनुसार ल्याइएको हो’।
बजेटले अर्थतन्त्रको संरचनागत सुधारको बाटो तय गर्न खोजेको उनको दाबी छ। ‘देशलाई गति दिन नयाँ चरणको आर्थिक सुधार गर्न खोजिएको छ। त्यसका लागि आयोग गठन गर्छौं,’ उनले भने । उनले बजेटमार्फत ठूला पूर्वाधारमा निजी क्षेत्रको लगानी बढाउने नीति लिएको बताए। ‘ठूला पूर्वाधारमा राज्य एक्लैले लगानी गर्न सक्दैन। निजी क्षेत्रलाई सहभागी गराउने नीति बजेटले अंगीकार गरेको छ,’ उनले भने।
बजेटमा पूरा हुन नसक्नेभन्दा सञ्चालनमा रहेका र पूरा हुने चरणमा पुगेका आयोजनालाई बजेट सुनिश्चितता गरेको बताए। ‘सञ्चालनमा रहेका आयोजनालाई बीचमै डिस्कन्टिन्यु गर्ने प्रवृत्ति रोक्न खोजिएको छ,’ उनले भने।
अर्थमन्त्री पुनले निजी क्षेत्रको साथ बिना आर्थिक वृद्धिको लक्ष्य हासिल गर्न नसकिने बताए। बजेटमा ६ प्रतिशत आर्थिक वृद्धिको लक्ष्य लिइएको छ। उनले प्रदेश र स्थानीय तहलाई समेत रोजगारी सृजनामा अघि बढाउने दिशामा बजेट केन्द्रित रहेको दाबी गरे। यस्तै बजेटले प्राथमिकता तय गरेको दाबी पनि गरे।
‘धेरैतिर प्राथमिकता छर्नेभन्दा पनि ५ रुपान्तरणकारी उद्देश्यका साथ बजेट अघि बढेको छ,’ उनले भने, ‘नयाँ क्षेत्रको रुपमा सूचना प्रविधि उदाएको छ। नेपाल यही क्षेत्रमा प्रतिस्पर्धी बन्न सक्ने छ । १० वर्षमा ३० खर्ब रुपैयाँबराबरको आइटी उत्पादन निर्यात गर्ने लक्ष्य महत्त्वाकांक्षी होइन।’