१ जेठ/अर्थ र व्यापार – चालु आर्थिक वर्षको वितेका १० महिनाको अवधीमा सरकारको बजेट खर्च करिब ६० प्रतिशत भएको देखिएको छ । महालेखा नियन्त्रक कार्यालयले सार्वजनिक गरेको तथ्यांक अनुसार वैशाख मसान्तसम्ममा वार्षिक विनियोजनको ६० दशमलब ३५ प्रतिशत अर्थात् १० खर्ब ५६ अर्ब ८९ लाख २४ हजार रुपैयाँ बराबर खर्च भएको देखिएको छ ।
सरकारले चालु आर्थिक वर्षका लागि कुल १७ खर्ब ५१ अर्ब ३१ करोड २१ लाख रुपैयाँ बराबरको बजेट सार्वजनिक गरेको थियो । जसमध्ये वैशाख मसान्तसम्ममा चालुगतखर्च तर्फ वार्षिक विनियोजनको ६५ दशमलब ९१ प्रतिशत खर्च भएको छ ।
चालु शीर्षकमा ११ खर्ब ४१ अर्ब ७८ करोड ४१ लाख रुपैयाँ बराबर वार्षिक विनियोजन भएकोमा हालसम्म ७ खर्ब ५२ अर्ब ५५ करोड ७३ लाख रुपैयाँ बराबर खर्च भएको छ ।
पुँजीगत शीर्षकमा ३ खर्ब दुई अर्ब ७ करोड ४४ लाख रुपैयाँ बराबर वार्षिक विनियोनज भएकोमा वैशाख मसान्तसम्म वार्षिक लक्ष्यको ३७ दशमलब ०४ प्रतिशत अर्थात् १ खर्ब ११ अर्ब ८८ करोड २९ हजार बराबर खर्च भएको छ ।
यसैगरी, वित्तीय व्यवस्थातर्फ ६२ दशमलब ६ प्रतिशत खर्च भएको छ । वित्तीय व्यवस्थातर्फ २ खर्ब ७ अर्ब ४५ करोड ३६ लाख रुपैयाँ बराबर विनियोजन भएकोमा वैशाख मसान्तसम्ममा १ खर्ब ९२ अर्ब ४५ लाख २२ हजार रुपैयाँ बराबर खर्च भएको हो ।
यस अवधिको कुल सरकारी राजस्व संकलन वार्षिक लक्ष्यको ५८ दशमलब २ प्रतिशत छ । चालु आवमा १४ खर्ब ७२ अर्ब ४८ करोड ४७ रुपैयाँ बराबर राजस्व उठाउने लक्ष्य रहेकोमा वैशाख मसान्तसम्ममा ८ खर्ब ५७ अर्ब दुई करोड ८० लाख रुपैयाँ बराबर असुली भएको छ ।
त्यसैगरी, कर राजस्वतर्फ १३ खर्ब पाँच अर्ब ४७ करोड ९६ लाख रुपैयाँ बराबरको वार्षिक लक्ष्य रहेकोमा हालसम्म ५७ दशमलब २१ प्रतिशत अर्थात् ७ खर्ब ४६ अर्ब ८३ करोड २८ लाख रुपैयाँ बराबर उठेको छ । त्यस्तै, गैरकर राजस्वतर्फ १ खर्ब १७ अर्ब ६ करोड २१ लाख रुपैयाँ बराबर लक्ष्य रहेकोमा ७२ दशमलब ७ प्रतिशत अर्थात् ८५ अर्ब १० करोड चार लाख रुपैयाँ बराबर असुली भएको छ ।
त्यस्तै, ४९ अर्ब ९४ करोड ३० लाख रुपैयाँ बराबर वैदेशिक अनुदान लिने सरकारी लक्ष्य रहेकोमा हालसम्म लक्ष्यको पाँच दशमलव ५२ प्रतिशत अर्थात् २ अर्ब ७५ करोड ८० लाख रुपैयाँ बराबर अनुदान लिइएको महालेखाले जनाएको छ ।