१८ चैत/अर्थ र व्यापार – नेपाल उद्योग वाणिज्य महासंघका अध्यक्ष चन्द्रप्रसाद ढकालले अर्थतन्त्रको आन्तरिक क्षेत्र सुधारका लागि बाह्य क्षेत्रको स्थायित्वलाई उपयोग गर्नुपर्ने बताएका छन् । उनले विदेशी मुद्रा सञ्चिति सुधारकालागि आन्तरिक बजारमा उपयोग गर्नुपर्ने बताए । 
पोखरामा भएको गण्डकी प्रदेशको वार्षिक सभामा महासंघका अध्यक्ष ढकालले यस्तो बताएका हुन् । उनले गण्डकीमा सोही सभासँगै सातवटै प्रदेशको वार्षिक सभा सकिएको जानकारी दिए ।
महासंघको विधानमा वार्षिक सभा माघ मसान्तभित्र हुनुपर्ने उल्लेख भएकाले सो नियम पालना गर्न उनले प्रदेश सभालाई आग्रह गरे । यसैगरी, अध्यक्ष ढकालले आफ्नो कार्यकालको पहिलो वर्ष सकिन लागेको र छिट्टै महासंघको वार्षिक साधारण सभा आयोजना गर्ने बताए ।
उनले महासंघको अध्यक्षको हैसियतमा पहिलो वर्ष नै संकटग्रस्त अर्थतन्त्रको सुधार, लगानी प्रवद्र्धन र निजी क्षेत्रलाई प्रतिष्ठा प्रदान गर्न धेरै पहल गरेको बताए । महासंघका अध्यक्ष ढकालले विदेशी मुद्रा सञ्चितिमा भएको सुधार र भुक्तानी सन्तुलनलाई आन्तरिक बजार सुधारका लागि उपयोग गर्नुपर्ने बताए । ढकालले लगानीको नयाँ वातावरण नहुँदा उद्यमीहरूको मनोबल खस्किएको बताए ।
उनले उद्योगहरूले फेरि लोडसेडिङको अवस्था भोग्नु परेको र उद्योगको उत्पादन क्षमता घटेपछि सरकारले नै घाटा बेहोर्ने समेत बताए । उनले राजस्व घट्न थालेपछि सरकारले उद्यमीलाई अनावश्यक पीडा दिन थालेको बताए ।
बजार अनुगमन बढेको गुनासो आइरहेको जानकारी गराउँदै उनले नियमविपरीत काम नगर्न व्यवसायीलाई आग्रह गरे । उनले निजी क्षेत्रलाई आतंकित नगर्न समेत सरकारसँग आग्रह गरे ।
निजी क्षेत्रको आत्तिइरहने हो भने राजस्व संकलन प्रभावित हुने र सरकार चलाउन गाह्रो हुने उनले बताए । उनले यस वर्षको वार्षिक साधारण सभामा हामीले सबै राजनीतिक दलका शीर्ष नेतृत्वलाई आमन्त्रण गरेका र राम्रो व्यापारिक वातावरण बनाउन प्रतिवद्धता खोज्ने बताए ।
अध्यक्ष ढकालले महासंघले चाँडै लगानी कम्पनी खोल्ने तर, त्यो महासंघको स्वामित्वमा नहुने जानकारी दिए । महासंघले लगानी कम्पनी स्थापना र प्रवद्र्धन गर्न प्रारम्भिक पहल मात्र गर्ने बताए ।
उनले हाल मुलुकभरका व्यवसायीलाई एकै ठाउँमा ल्याउने पहल भएको र पछि व्यावसायिक रूपमा सञ्चालन गरिने जानकारी दिए । गैरआवासीय नेपाली तथा अन्य निजी क्षेत्रका संस्थाले पनि यसमा लगानी गर्न सक्ने उनले बताए ।