१० असोज/ अर्थ र व्यापार – अत्यधिक अकासिएको बजार भाउ नियन्त्रणकालागि चाडपर्व लक्षित सहुलियत मूल्य पसल आगामी २१ असोजबाट सुरु हुने भएको छ । विगतका वर्षहरुकै निरन्तरता स्वरुप सरकारी निकायबाट हुने यस्तो चाडपर्व लक्षित सहुलियत मूल्य पसल आगामी ३ मंसिरसम्म सञ्चालन गरिने भएको छ ।
दसैं,तिहार र छर्ठपर्वकालागि अत्यावश्यक खाद्य तथा दैनिक उपभोग्य बस्तु सुपथ मूल्यमा उपलब्ध गराउन चाडपर्व अवधिभर यस्तो पसल सञ्चालनमा ल्याउन लागिएको उद्योग, वाणिज्य तथा आपूर्ति मन्त्रालयले जनाएको छ ।
मन्त्रालयका प्रवक्ता गजेन्द्रकुमार ठाकुरले यस्तो जानकारी गराएका हुन । उनले चाडपर्व लक्षित सहुलियत मुल्य पसलबाट बद्दो बजार मूल्य नियन्त्रण र गुणस्तरीयता कायम गरी सरल, सहज र सर्वसुलभ रुपमा अत्यावस्यक बस्तु तथा सामग्री उपलव्ध गराउने उद्देश्यले सो पसल सञ्चालन गर्न लागिएको बताए ।
चाडपर्वको बेला उपभोग्य बस्तु विक्री वितरण हुने बजारमा निजी क्षेत्रको एकाधिकार तोडेर बजार भाउ नियन्त्रण गर्न सरकारले हरेक वर्ष सहुलियत मूल्य पसल सञ्चालन गर्दै आएको छ ।
सरकारले उद्योग, वाणिज्य, तथा आपूर्ति मन्त्रालयको मातहतका खाद्य व्यवस्था तथा व्यापार कम्पनी लिमिटेड र साल्ट ट्रेडिङ कर्पोरेसन एवं कृषि तथा पशुपन्छी विकास मन्त्रालय मातहतको दुग्ध विकास संस्थानको सहकार्यमा सहुलियत मूल्य पसल सञ्चालनमा ल्याउन लागेको हो ।
सरकारका यि निकायहरुले संयुक्त रुपमा आयोजन ागर्ने सहुलियत मूल्य पसलमा सबै किसिमका चामल, दालहरु, गहुँ, आटा, पिठो, मैदा, तोरीको तेल, सनफ्लावर तेल, भट्मासको तेल र चिउरामा बजार मूल्यभन्दा प्रतिकेजी ७ रुपैयाँले सस्तोमा बिक्री वितरण हुनेछ ।
यसैगरी, गेडागुडीमा प्रतिकेजी १० रूपैयाँ छुट हुने छ । त्यस्तै, कर्णालीको सिमी तथा गेडागुडीहरु, फापरको दाना, चिनी, कागुनो र उवा र जिउँदो खसी, बोका तथा च्यांग्रामा प्रतिकेजी १० रूपैयाँ छुट हुने मन्त्रालयले जनाएको छ ।
मन्त्रालयका अनुसार यसवर्ष सहुलियत मूल्य पसल सञ्चालनका लागि सरकारले खाद्य व्यवस्था तथा व्यापार कम्पनीलाई दुई करोड ३२ लाख २० हजार रूपैयाँ बजेट छुट्याएको छ ।
यस्तो सहुलियतपूर्ण बजारमा चिउरामा प्रतिकेजी ७ रूपैयाँ छुट हुने छ । यसैगरी, साल्ट ट्रेडिङ मार्फत बिक्री हुने सामानमा सहुलियत दिन सरकारले १ करोड रूपैयाँ छुट्याएको छ । साल्ट ट्रेडिङ कर्पोरेसनलले चिनी प्रतिकेजी ९७ रूपैयाँमा विक्री गर्ने छ । त्यसैगरी, बजार मूल्यको तुलनामा नुनमा प्रतिकेजी दुई रुपैयाँ र तेल तथा चिउरामा प्रतिकेजी ७ रूपैयाँ छुट दिईने छ ।त्यस्तै, दूग्ध विकास संस्थानले घ्यूमा प्रतिकेजी २० रूपैयाँ, पनीर प्रति दुईसय ग्राममा २० रूपैयाँ र प्रति पाँचसय ग्राममा ५० रूपैयाँ छुट दिनेछ ।
खाद्य व्यवस्था तथा व्यापार कम्पनी र साल्ट टे्डिरङको काठमाडौँ उपत्यकामा रहेका विभिन्न आठवटा बिक्री केन्द्र र तीनवटा घुम्ती पसल समेत गरी जम्मा ३५ स्थानमा बिक्री स्थल रहनेछ ।
यसबाहेक मोरङ्ग, झापा, ताप्लेजुङ्ग, संखुवासभा, सोलुखुम्बु, दिक्तेल, भोजपुर, ओखलढुङ्गा, खोटाङ्ग, सिरहा, जनकपुर, पर्सा, ललितपुर, भक्तपुर, कास्की, तनहुँ, गोरखा, मनाङ्ग, मुस्ताङ्ग, रुपन्देही, बाँके, दाङ्ग, बर्दिया, रुकुम पूर्व र रुकुम पश्चिममा खाद्य व्यवस्था कम्पनीले सहुलियत पसल सञ्चालन गर्नेछ ।
त्यस्तै, रोल्पा, सुर्खेत, गुल्मी, दैलेख, डोल्पा, कालीकोट, हुम्ला, जाजरकोट, जुम्ला, मुगु, कैलाली, डंडेलधुरा, बाजुरा, बझाङ्ग, अछाम, दार्चुला, महेन्द्रनगर गरी ४२ जिल्लाका ४८ स्थानमा खाद्य व्यवस्था तथा व्यापार कम्पनीका सहुलियतपूर्ण पसल तथा गोदाम रहनेछन् ।
यस्ता पसलहरु आवश्यकता अनुसार थप जिल्ला र स्थानहरुमा पनि सञ्चालन गर्न सकिने मन्त्रालयले जनाएको छ । निःशुल्क अनलाइन होम डेलिभरी, घुम्ती सेवा, सहकारी र डिलहरुकोको माध्यमबाट तोकिए बमोजिमको छुट पाउन सकिने मन्त्रालयले जनाएको छ ।
सञ्चालनमा ल्याइएका सहुलियत मुल्य पसलहरु प्रभावकारी भए–नभएकोबारे अनुगमन गर्न विशेष समिति पनि बनाइएको छ । चाडपर्वको अवधिभर बजार अनुगमनको काम थप तीव्र पारिने मन्त्रालयले जनाएको छ ।
काठमाडौँ उपत्यकाको हकमा उद्योग मन्त्रालयले सहुलियत पसल सञ्चालनको आयोजना अवधिभर अनुगमन टोली बनाई अनुगमन गर्नेछ भने सम्बन्धित संस्थानहरुले पनि आ–आफनो अनुगमन टोली बनाई अनुगमन गर्नेछन् ।
वाणिज्य, आपूर्ति व्यवस्था तथा उपभोक्ता संरक्षण विभागबाट पनि नियमित अनुगमनको अतिरिक्त थप अनुगमन टोली खटाएर सघन रुपमा बजार अनुगमन गर्नेछ । जिल्लाहरुको हकमा प्रमुख जिल्ला अधिकारी वा सहायक प्रमुख जिल्ला अधिकारीको संयोजकत्वमा अनुगमन टोली गठन गरी सघन रुपमा अनुगमन गरिने मन्त्रालयले जनाएको छ ।