१५ फागुन/अर्थ र व्यापार – चालू आर्थिक वर्षको वितेका सात महिनाको अबधिमा सरकारले आर्थिक सहायताका नाममा साढे ५ करोड रुपैयाँ बाँडेको छ । सरकारले बाँडेको रकम लिएर राज्यकोषको ढुकुटी रित्याउनेमा पूर्व राष्ट्रपति डा.रामबरण यादवदेखि पूर्व प्रधानमन्त्री हुँदै भुटानी शरणार्थी लगायत रहेका छन ।
चालु आर्थिक वर्षको वितेका साता महिना गत साउनदेखि माघ मसान्तसम्मको अवधीमा सरकारले १३९ जनालाई व्यक्तिगत रुपमा आर्थिक सहायता स्वरुप कुल ५ करोड ४६ लाख ३४ हजार रुपैयाँ वितरण गरेको हो ।
सोमबार अर्थ मन्त्रालयले सार्वजनिक गरेको चालु आवको वितेका ७ महिनाको तथ्यांक अनुसार सरकारले झन्डै साढे ५ करोड रुपैयाँ बाँडेको पाईएको छ । सो अवधीमा सबैभन्दा धेरै आर्थिक सहायता पूर्वराष्ट्रपति डा. रामवरण यादवलाई दिईएको छ ।
गत ३ कात्तिकमा बसेको मन्त्रिपरिषद्को बैठकको निर्णय अनुसार पूर्व राष्ट्रपति यादवलाई औषधिउपचार खर्च बापत २५ लाख रुपैयाँ आर्थिक सहायता प्रदान गरिएको उल्लेख छ ।
यसैगरि, मंसिरमा पूर्व प्रधानमन्त्री तथा नेकपा एकीकृत समाजवादीका शीर्षनेता झलनाथ खनाललाई २० लाख रुपैयाँ राहत स्वरुप दिईएको छ । गत ३१ भदौमा तथा ७ असोजको निर्णय अनुसार सो रकम वितरण गरिएको उल्लेख भएपनि पूर्वप्रधानमन्त्री खनाललाई कुन प्रयोजनका लागि रकम उपलब्ध गराइएको उल्लेख गरिएको छैन् ।
यसैगरि, सो अवधीमा भुटानी मानवअधिकारवादी नेता टेकनाथ रिजाललाई सरकारले दुई चरणमा गरी २७ लाख रुपैयाँ आर्थिक सहायता उपलब्ध गराईएको विवरण उल्लेख छ ।
अर्थ मन्त्रालयले सार्वजनिक गरेको आर्थिक सहायता वितरणको तथ्यांक अनुसार सबैभन्दा धेरै आर्थिक सहायता रकम भदौ महिनामा वितरण गरिएको छ । गत भदौ महिनामा मात्रै ३१ जनालाई १ करोड ४१ लाख ७७ हजार रुपैयाँ वितरण गरिएको पाईएको छ ।
यसैगरी, साउन महिनामा मन्त्रालयले १९ जनालाई ९५ लाख रुपैयाँ बाँडेको छ । असोज महिनामा १ जनालाई २५ लाख रुपैयाँ र कात्तिक महिनामा ७ जनालाई ४४ लाख रुपैयाँ वितरण गरिएको अर्थमन्त्रालयको तथ्यांकमा देखिएको छ ।
त्यसैगरी, मंसिर महिनामा ५८ जनालाई १ करोड ३० लाख ८४ हजार रुपैयाँ, पुस महिनामा २१ जनालाई ८८ लाख ७२ हजार रुपैयाँ र माघ महिनामा २ जनालाई २४ लाख रुपैयाँ आर्थिक सहायत शीर्षक मार्फत राज्यकोषको रकम वितरण गरिएको अर्थमन्त्रालयको तथ्यांकमा उल्लेख छ ।