४ माघ/ अर्थ र व्यापार – अर्थशास्त्री स्वर्णिम वाग्लेले अहिलेका बाहलवाला कर्मचारीलाई तालिम दिएरर राजस्व संकलन नबढने दाबी गरेका छन् । अहिलेका कर्मचारीलाई तालिम दिएर राजस्व बढाउने सोच बनाउनुभन्दा पनि चार्टर एकाउन्टेन्ट (सीए) हरुलाई हायर गरेर काम गर्ने हो भने राजस्व बढाउन सक्ने उनको धारणा छ ।
नेपाल चेम्बर अफ कमर्शले आयोजना गरेको ‘अर्थतन्त्रः अबको बाटो विषयक अन्तरक्रिया कार्यक्रममा अर्थविद् वाग्लेले यस्तो दावी गरेका हुन । सीएहरुलाई कहाँ कहाँ राजस्व चुहावट भएको छ थाहा हुने भन्दै उनले यसले राजस्व बढाउन सहयोग पुग्ने बताए ।
यसैगरि, अर्थविद् वाग्लेले सीएहरुलाई हायर गरेर उनीहरुको क्षमता सदुपयोग गर्न सरकारसँग आग्रह गरे । उनले विश्वभर नै आर्थिक अवस्था शंकुचनतर्फ लागेको बताए ।
नेपालमा बिप्रेषण पछिल्लो पटक बढेका कारण नेपाल डराइहाल्ने अवस्था नरहेको उनको भनाइ छ । बिप्रेषणमा त्यति चाँडो परिवर्तन नआउने उनको भनाइ छ । उनले सरकारले अनुदान सोचेजति उठाउन नसकेको उनले बताए । ५५ अर्ब अपेक्षा गर्दा ५ अर्ब मात्रै उठ्नु चिन्ताको विषय भएको बताए ।
उनले राजस्व र खर्चको असन्तुलन निर्मम रुपमा अघि बढेको बताए । नेपालमा ४ लाख ८० हजार कर्मचारी रहेको र नेपालीले उठाएको कर कर्मचारीलाई तलब भत्ता दिँदैमा सकिने गरेको वाग्लेको भनाइ छ । ५३२ रुपैयाँदेखि ४ हजार रुपैयाँसम्म लिन सामाजिक सुरक्षामा जोडिनेको संख्या पनि निकै रहेको भन्दै वाग्लेले यसमा चासो दिने बेला भएको बताए ।
बजेटको आकार निकै बढेको र यसमा नयाँ सरकारले चासो दिने बेला भएको भन्दै उनले अब सरकारले राजस्व बढाउन र चुहावट रोक्न प्राथमिकता दिनुपर्ने सुझाथ दिए ।
वाग्लेले निर्यातमा नेपालको अवस्था निकै चिन्ताजनक रहेको भन्दै सम्भावना भएका क्षेत्रमा मन्त्रीले ध्यान दिनु पर्ने बताए । नेपाल बिप्रेषणमा धेरै निर्भर भएको र यसबाट तत्काल हटाउन नसकेपनि नेपालले दीर्घकालीन योजना बनाउनु पर्ने उनको भनाइ छ ।
नेपाल राष्ट्र बैंक र अर्थ मन्त्रालयबीचको सम्बन्ध सुधार हुनुपर्ने र सुमधुर हुनुपर्नेमा जोडदिंदै उनले नेपालमा कर्जा घर जग्गा र सेयरमा बढी गएको र अन्तरिक उत्पादनमा नगएको भन्दै यसमा सचेत हुन आग्रह गरे । यसैगरि,उनले उत्पादनमा कर्जा लगाउने कानूनी बाधा छन् भने ती बाधा हटाउन सरकारसँग आग्रह गरे ।
अर्थमन्त्री विष्णु पौडेल सहभागी सो कार्यक्रममा नेपाल चेम्बर अफ कमर्सका अध्यक्ष राजेन्द्र मल्ल, चेम्बरका बरिष्ठ उपाध्यक्ष कमलेस कुमार अग्रवाल, चेम्बरका पूर्व अध्यक्ष राजेशकाजी श्रेष्ठ , पूर्व अर्थमन्त्री डा. युवराज खतिवडाले पनि आ–आफ्ना धारणा राखेका थिए ।