१६ चैत /अर्थ र व्यापार – निर्माण व्यवसायीहरूले आगामी २४ चैतसम्ममा आफ्ना माग पूरा नभए कन्स्ट्रक्सन होलिडेमा जाने भन्दै सरकारलाई एक साताको अल्टिमेटम सहितको चेतावनी दिएका छन् ।
नेपाल निर्माण व्यवसायी महासंघको राष्ट्रिय भेला–२०७८ ले गरेको निर्णय सार्वजनिक गर्दै महासंघले आगामी २४ चैतसम्म सरकारले माग पूरा नगरे व्यवसायी कन्स्ट्रक्सन होलिडेमा जाने चेतावनी दिएको हो ।
महासंघका अनुसार यस्तो कन्स्ट्रक्सन होलिडेमा निर्माण गतिविधि पूरै रोकिनेछ । निर्माण सामग्रीमा भएको मूल्यवृद्धि, खरिद नियमावलीको ११औँ संशोधनका केही बुँदा, बिमासम्बन्धी जारी गरिएको निर्देशिका लगायतमा असन्तुष्टि जनाउँदै निर्माण व्यवसायीले कन्स्ट्रक्सन होलिडेमा जाने बताएका हुन् ।
खरिद नियमावली तथा बिमा निर्देशिकालगायतमा भएका प्रावधान संशोधन तथा खारेज गर्दै निर्माण सामग्री तथा पेट्रोलियमा भएको मूल्यवृद्धि फिर्तालगायत निर्माण क्षेत्रका अन्य समस्या समाधान गर्नुपर्ने माग निर्माण व्यवसायीको छ ।

कन्स्ट्रक्सन होलिडे सुरु भए निर्माणमा ढिलाइ भएका आयोजनाहरू अझ ढिला हुनेछन् । महासघका अधक्ष्य रवि सिंहले बिटुमिन, नदीजन्य सामग्री, सिमेन्ट, फलामजन्यलगायतका निर्माण सामग्री, पेट्रोलियम पदार्थलगायत हरेक वस्तुमा अप्रत्याशित रूपमा बढेको मूल्य नघटाएसम्म कन्स्ट्रक्सन होलिडे मनाउने तयारी गरेको बताए ।
महासंघले १७ चैतमा नेपाल सरकारका मुख्य सचिवलाई, प्रदेश महासंघले प्रदेश प्रमुखको कार्यालय र जिल्ला निर्माण व्यवसायी संघहरूले सम्बन्धित जिल्ला प्रशासन कार्यालयमा माग पूरा गर्नका लागि ज्ञापनपत्र बुझाउने तयारी गरिएको पनि उनले बताए छ ।
निर्माण सामग्रीमा भएको मूल्यवृद्धिका कारण निर्माण कार्यमा समस्या भएको भन्दै निर्माण व्यवसायीले मूल्य समायोजनको माग गरिरहेका छन् । त्यसैगरी, सार्वजनिक खरिद नियमावलीको ११औं संशोधनले पनि साना व्यवसायीलाई मारमा पार्ने गरी संशोधन भएको भन्दै निर्माण व्यवसायीहरूले केही बुँदा संशोधनको माग गरिरहेका छन् ।
यसअघि व्यवसायीले देशका ७७ वटै जिल्ला र प्रदेशबाट मूल्यवृद्धिको विरोध गर्दै खरिद नियमावली संशोधनको पनि माग गरिरहेका छन् । खरिद नियमावलीको आपत्तिजनक बुँदामा संशोधन नभए राष्ट्रिय भेलापछि आएका सुझावअनुसार संघर्षका कार्यक्रम अघि बढाउने महासंघलगायतका संघले पनि चेतावनी दिँदै आएका थिए ।
महासंघले सबै ठेक्कामा एक वर्षको म्याद थप्नसमेत आग्रह गरेको छ । महासंघका अधक्ष्य सिंहले नेपाल आयल निगमले इन्धन दिन छोडेको बताए । उनका अनुसार निगमले गाडीमा मात्र इन्धन दिने भनेको छ, हामीलाई गाडीमा हालेको इन्धनले कसरी पुग्छ?,’ उनले भने ।