१० असोज / अर्थ र व्यापार – बैंकले मुद्दती निक्षेपको ब्याजदर बढाएसँगै बिमा कम्पनीले पनि बोनस दर बढाउने तयारी गरेका छन् । पछिल्लो समय तरलता संकुचनसँगै बैंकहरूले ब्याजदर वृद्धि गरेपछि त्यसको सकारात्मक प्रभाव बिमा कम्पनीले बिमितलाई दिने बोनस दरमा पर्ने भएको हो । 
जसका लागि जीवन बिमा कम्पनीहरूले ब्याजदर घटबढसँग बिमा कम्पनीको प्रत्यक्ष सम्बन्ध हुने भन्दै अहिलेको वृद्धिले बोनस दरमा पनि बढाउन मद्दत गर्ने बताएका हुन् । हाल बैंकहरूले मुद्दती निक्षेपमा ब्याजदरको सीमा ८ प्रतिशत पु¥याएका छन् । यसअघि यस्तो ब्याजदर जम्मा ६ प्रतिशतमा सीमित थियो ।
नेपाल लाइफ इन्स्योरेन्स कम्पनीका प्रमुख कार्यकारी अधिकृत (सीईओ) सन्तोष प्रसाईंले बैंकको ब्याजदर जति बढ्छ, त्यसले बिमा कम्पनीलाई सकारात्मक प्रभाव पार्ने बताए । ब्याजदर बढ्दा बिमितलाई दिने प्रतिफल पनि बढ्ने भएकाले पहिला घटेको ब्याजदर अहिले बढेको भन्दै उनले  बिमा कम्पनीका लागि यो राम्रो कुरा भएको बताए ।  
यसैगरी, उनले बैंकको ब्याजदर परिवर्तन भइरहने कुरा हो भन्दै अहिलेको वृद्धि कहिलेसम्म कायम रहन्छ ? त्यो कुराले बिमा कम्पनीको बानेस दरलगायतका कुरामा पनि परिवर्तन आउने बताए ।   यसैगरी, नेसनल लाइफ इन्स्योरेन्स कम्पनीका सीईओ सुरेश खत्रीले ब्याजदर बढ्नु बिमा कम्पनीका लागि सकारात्मक कुरा भएको बताए । उनले भने, ‘बैंकको ब्याजदर बढ्नु भनेको बिमितका लागि राम्रो कुरा हो । जीवन बिमा कम्पनीको मुख्य लगानी नै बैंकको मुद्दती निक्षेपमा हुन्छ । ब्याजदर बढ्दा बोनस वृद्धिमा निकै सहयोग पु¥याउँछ ।’ जीवन बिमा कम्पनीहरूको आर्थिक वर्ष २०७७÷७८ को चौथो त्रैमाससम्म बैंकमा तीन खर्ब ५९ अर्ब ३३ करोड ३९ लाख रुपैयाँ लगानी छ भने निजीवन बिमातर्फ ६३ अर्ब ३९ करोड रुपैयाँ लगानी छ । 
जीवन बिमा कम्पनीहरूले सरकारको बचत तथा ऋण पत्र, ‘क’ वर्गको बैंकको मुद्दती निक्षेप, नेपाल पूर्वाधार विकास बैंकको मुद्दती निक्षेपमा लगानी गर्दै आएका छन् । त्यस्तै, घरजग्गामा, सूचीकृत पब्लिक लिमिटेड कम्पनीको साधारण सेयर, बैंक तथा वित्तीय संस्थाको अग्राधिकार सेयर, सूचीकृत पब्लिक लिमिटेड कम्पनीको सुरक्षित डिबेन्चर, कृषि, पर्यटन र जलस्रोतलगायतका पूर्वाधार, म्युचअल फन्ड र नागरिक लगानी कोषमा लगानी गर्दै आएका छन् ।