४ कात्तिक/अर्थ र व्यापार – पर्यटन व्यवसायी वसन्तराज मिश्रको निधन भएको छ । डेंगीबाट संक्रमित मिश्रको थापाथलीस्थित नर्भिक अस्पतालमा उपचारको क्रममा आइतबार बिहान ७१ वर्षको उमेरमा निधन भएको हो ।
मुलुकको पर्यटन क्षेत्रलाई अन्तर्राष्ट्रिय स्तरमा डोर्याउँदै आएका मिश्रको डेंगी र ब्रेन ह्याम्रेजका कारण उपचारको क्रममा निधन भएको हो । चार दशकयता मुलुकको पर्यटन क्षेत्रमा उच्च गुणस्तरीय पर्यटक भित्राउन महत्वपूर्ण भूमिका खेल्दै आएका मिश्र सदाका लागि बिदा भए ।
डेंगीबाट संक्रमित मिश्रको नर्भिक अस्पतालमा उपचार भइरहेको थियो । उनको शवलाई अस्पतालबाट कुपन्डोलस्थित निवासमा लगिएको छ । परिवारले जानकारी गराए अनुसार १ बजे नै आर्यघाट पु¥याइने छ ।
पर्यटन व्यवसायी वसन्त मिश्र नेपालको एक पुराना व्यवसायी हुन् । उनले नेपालको पर्यटन क्षेत्रको विकासमा ठूलो योगदान पु¥याएका छन् । टेम्पल टाइगर ग्रुप अफ कम्पनीका अध्यक्ष मिश्र सन् १९७० को दशकदेखि नै यो क्षेत्रमा सक्रिय थिए । नेपालको पर्यटन क्षेत्रलाई अन्तर्राष्ट्रिय स्तरमा पु¥याउन मिश्रले निकै महत्वपूर्ण भूमिका खेलेका छन् ।
वसन्त मिश्र नेपाल पर्यटन बोर्डका संस्थापक मध्येका पनि एक पुराना व्यवसायी हुन् । उनले नेपालमा पर्यटनको प्रर्वधनका लागि विभिन्न अन्तर्राष्ट्रिय तथा राष्ट्रिय कार्यक्रमहरूको नेतृत्व गरेका थिए ।
वसन्त मिश्रलाई नेपालमा दिगो पर्यटनको पक्षपाती मानिन्छ, र उनले पर्यावरण संरक्षण र स्थानीय समुदायको उत्थानमा जोड दिने प्रकारको पर्यटनलाई प्राथमिकता दिएका छन् ।
पाटा, नेपाल एसोसिएसन अफ टुर अपरेटर ( नाटो) , नेपाल पर्यटन बोर्ड, पाटा नेपाल लगायतका संस्थामा स्थापनाकालदेखि नै मिश्रले योगदान दिँदै आएका थिए । उनका एक पत्नी र दुई छोरा छन्।
मिश्रको टेम्पल टाइगर जंगल लज नेपालको वन्यजन्तु पर्यटनको प्रतीक बनेको थियो । त्यहाँ पर्यटकले आरामदायी वातावरणमा बसेर जंगली जनावरहरूको प्राकृतिक वासस्थान नजिकैबाट अनुभव गर्न पाउँथे । वसन्तले पर्यटन र प्रकृति संरक्षण एकअर्काका परिपूरक हुन्, मित्र हुन् भनेर सिकाएर गए । उनै मिश्रको प्रभाव केवल व्यवसायमा मात्र सीमित थिएन। उनले स्थानीय समुदायलाई पर्यटनमा संलग्न गराएर रोजगारीका अवसरहरू सिर्जना गरेका थिए ।
चितवनको सौराहास्थित निकुञ्जभित्रका रिसोर्टहरू बन्द गर्ने सरकारी निर्णयले मिश्रलाई ठूलो धक्का दिएको थियो । सौराहाको व्यवसाय चम्काउन त्यहाँका केही स्थानीयले निकुञ्जको रिसोर्ट हटाउने अभियान चलाएका थिए । तर, अहिलेसम्म सो निकुञ्जभित्रका पुराना नेपाल चिनाउने राम्रा होटल तथा रिसोर्ट बन्द भइरहँदा सौराहाको पर्यटन गतिविधी नै रोकिएको जस्तो देखिएको सम्बन्धीत पर्यटन व्यवसायी एवं उनका सहकर्मीहरुले बताएका छन ।