४ माघ/अर्थ र व्यापार– निजी वायुसेवा कम्पनी कैलाश हेलिकोप्टर सर्भिसेस् लिमिटेडले ३ लाख ५० हजार कित्ता प्राथमिक सेयर निष्कासन (आईपीओ) प्रिमियम मूल्यमा जारी गर्ने भएको छ ।
हेलिकोप्टर सर्भिसेस् लिमिटेडले जारी पुँजी ३५ करोड रुपैयाँको १० प्रतिशत रकमको आईपीओ जारी गर्ने भएको छ । जसका लागि एकसय रुपैयाँ अंकित दरको ३ लाख ५० कित्ता साधारण शेयर सर्वसाधारणमा जारी गर्नको मुक्तिनाथ क्यापिटललाई धितोपत्र निष्काशन तथा बिक्री प्रबन्धकमा नियुक्त गरेको छ ।
कैलाश हेलिकोप्टरकोतर्फबाट प्रवन्ध सञ्चालक प्रतापजंग पाण्डे तथा मुक्तिनाथ क्यापिटलकोतर्फबाट प्रमुख कार्यकारी अधिकृत (सीइओ) कबिन्द्रध्वज जोशीले सम्झौतापत्रमा हस्ताक्षर गरेका छन् ।
३ करोड ५० लाख शेयर पूँजी बराबरको १०० रुपैयाँ अंकित दरले साढे ३ लाख कित्ता आइपीओ प्रचलित कानूनको अधिनमा रहेर सर्वसाधारणलाई प्रिमियम मुल्यमा जारी गर्ने तयारीमा बुधबार यो सम्झौतापत्रमा हस्ताक्षर भएको हो ।
सन् २०१८ को २३ मार्चबाट सेवा सञ्चालनमा आएको यस कम्पनीले एयरबस कम्पनीले निर्माण गरेको एएस–३५० सिरिजका ३ वटा हेलिकोप्टर उडान भर्दै आएको छ ।
व्यवसायीक उडान सञ्चालनमा आएको पहिलो वर्षदेखि निरन्तर नाफामा रहेको यस कम्पनीले कोरोना विश्व माहामारीको समय आर्थिक वर्ष २०७६÷०७७ बाहेकको हरेक वर्ष आफ्नो लगानीकर्तालाई प्रतिफल दिदै आएको सो कम्पनीले जनाएको छ ।

यस कम्पनीले आव २०७९/०८० को मुनाफाबाट आफ्ना शेयरधनीहरुलाई ५ प्रतिशत बोनश शेयर र १० प्रतिशतका दरले नगद लाभांश वितरण गरेको छ । सो बोनश शेयर पछि कम्पनीको चुक्ता पूँजी ३१ करोड ५० लाख रुपैयाँ रहेको छ । यस कम्पनीको बोनश वितरण पछि किताबी मुल्य १४६ रुपैयाँ २९ पैसा कायम भएको उल्लेख छ ।
नेपाल नागरिक उड्डयन प्राधिकरणले हाल सञ्चालित हेलिकोप्टर कम्पनीहरुले ५ वर्ष भित्र ५ वटा हेलिकोप्टर पु¥याउनुपर्ने व्यवस्था गरेको छ । प्राधिरकणको सोही व्यवस्थालाई अबलम्बन गरि कैलाशले पुँजी बृद्धिकालागि आइपीओ जारी गर्न लागेको जनाएको छ ।
कैलाशले हवाई उड्डययन सुरक्षा नीतिको पूर्ण पालना गरी सन् २०२५ मा एउटा र सन् २०२७ मा एउटा गरी थप २ वटा हेलिकप्टर सन् २०२७ सम्ममा थप गरी कुल ५ वटा हेलिकोप्टर सञ्चालनमा ल्याउने आफ्नो योजना समेत सार्वजनिक गरेको बताएको छ ।