४ जेठ/अर्थ र व्यापार – संस्कृति, पर्यटन तथा नागरिक उड्डयनमन्त्री सुदन किराँतीले पोखरा अन्तर्राष्ट्रिय विमानस्थलबाट चीनका विभिन्न सहरमा चार्टर्ड उडान हुने बताएका छन् ।
बिहीबार काठमाडौमा सम्पन्न नेपाल एशोसिएशन अफ टूर एन्ड ट्राभल्स एजेन्ट्स (नाट्टा) को २४ औँ राष्ट्रिय सम्मेलन तथा वार्षिक साधारणसभामा मन्त्री किराँतीले यस्तो जानकारी गराएका हुन । उनले आगामी असारको पहिलो सातादेखि पोखराबाट चीनका विभिन्न सहरमा चार्टर्ड उडान सुरु हुने बताए ।
‘आगामी ८ असारदेखि पोखराबाट चीनका विभिन्न सहरमा चार्टर्ड उडान गर्दैछौँ, हिजो मात्रै अन्तिम कुराकानी गरेका छौँ’ मन्त्रि किराँतीले भने ।
गत १७ पुसदेखि व्यावसायिक रुपमा सञ्चालनमा आएको नेपालको तेस्रो पोखरा अन्तर्राष्ट्रिय विमानस्थलले सञ्चालनको पाँच महिनासम्म अन्तर्राष्ट्रिय उडान भर्न सकेको छैन । यो विमानस्थल भएर आन्तरिक उडान भइरहे पनि अन्तर्राष्ट्रियतर्फ अहिलेसम्म कुनैपनि उडान भएका छैनन् । विमानस्थल उद्घाटनका दिन नेपालबाट अन्तर्राष्ट्रिय उडान भरिरहेको हिमालय एयरलाइन्सले परीक्षण उडान गरे पनि अहिलेसम्म कुनै अन्तर्राष्ट्रिय उडान नभएको विमानस्थल कार्यालयले जनाएको छ ।
यस्तो अवस्थाकाबीच पर्यटनमन्त्री किराँतीले पोखराबाट चीनका विभिन्न सहरमा चार्टर्ड उडान भर्ने बताएपनि कुन÷कुन एयरलाइन्सका विमानबाट उडान हुने भन्नेबारे खुलाएनन् ।
उनले राष्ट्रिय ध्वजाबाहक नेपाल वायुसेवा निगमले आगामी २९ जेठदेखि भैरहवास्थित गौतमबुद्ध अन्तर्राष्ट्रिय विमानस्थलबाट नियमित उडान भर्ने जानकारी दिए । मन्त्री किराँतीले जानकारि गराए अनुसार काठमाडौँ–क्लालम्पुर–भैरहवा–काठमाडौँ सेक्टरमा उडान हुने छन् । सो प्रयोजनका लागि अहिले टिकट बुकिङ खुलिसकेको निगमले जनाएको छ ।
पर्यटनमन्त्री किराँतीले सञ्चालनमा नरहेका १८ वटा विमानस्थलको व्यावसायिक सम्भावना हेरेर यथाशीघ्र सञ्चालन गरिने जानकारी गराए । नेपाल वायुसेवा निगमलाई व्यावसायिक रुपमा प्रतिस्पर्धी बनाउने उद्देश्यले आन्तरिक उडानमा बजार विस्तारका लागि थप विमान खरिद गर्न लागेको र ‘हब’ विमानस्थलमा उडान भर्नेगरी तीनथान विमान खरिद प्रक्रिया अघि बढाइएको उनले जानकारि दिए ।
यसैगरि, मन्त्रि किराँतीले भ्रष्टाचारलाई निर्मूल पार्नका निम्ति नागरिक तवरबाट खबरदारी हुन जरुरी भएको धारणा राखे । नेपालको पर्यटन क्षेत्रको विकास प्रवद्र्धनमा निजी क्षेत्रको महत्वपूर्ण भूमिका रहेकामा जोड दिँदै उनले सरकार र निजी क्षेत्रको साझेदारीलाई बढाएर अघि बढ्नुपर्नेमा जोड दिए । उनले आगामी नयाँ बजेटपछि ऐन निर्माणको दिशामा मन्त्रालय लाग्ने र त्यस प्रक्रियामा व्यवसायीको रायसुझाव लिइने जानकारी दिए ।
नेपाल उद्योग वाणिज्य महासंघका अध्यक्ष चन्द्रप्रसाद ढकालले कोरोना महामारीपछि पर्यटन क्षेत्र पुरानै लयमा फर्केको यस्तो संकेतले पर्यटन क्षेत्रमा केही उत्साह थपेको बताए । उनले पर्यटन क्षेत्रको दिगो विकासका लागि निजी क्षेत्र र सरकारको साझेदारी फराकिलो बनाएर पर्यटकीय पूर्वाधार विकासमा ध्यान दिनुपर्नेमा जोड दिए ।
नेपाल पर्यटन बोर्डका कार्यकारी प्रमुख कार्यकारी अधिकृत डा. धनन्जय रेग्मीले पर्यटन क्षेत्रको सम्भावनालाई व्यवहारमा परिणत गर्न सबै क्षेत्रको सक्रियताको खाँचो औँल्याए । बरिष्ठ पर्यटन व्यवसायी कर्ण शाक्यले पर्यटन पूर्वाधार विकास र प्रवद्र्धनका कामसँगै अघि बढाइनुपर्ने धारणा राखे ।
नाट्टाका अध्यक्ष रमेश थापाले कोरोनापछिको पर्यटनलाई पुरानै लयमा फर्काउन अझै केही मेहनत गर्नु आवस्यक भएको बताए । जसकारलागि निजी क्षेत्रको प्रयासमा सरकारले साथदिनुपर्ने उनको भनाई थियो ।
सो अवसरमा नाट्टाले पर्यटन क्षेत्रमा योगदान पु¥याउने व्यवसायी कर्ण शाक्य, इभरग्रिन टुर्स इन्टरनेस्नल प्रालिका प्रवन्ध निर्देशक चित्रबहादुर गुरुङ, राष्ट्रिय समाचार समितिका सिबि अधिकारी लगायत विभिन्न व्यक्तिहरुलाई कदरपत्र र पुरस्कारद्धारा सम्मान गरेको थियो । पर्यटनमन्त्री किराँती, पर्यटन सचिव सुरेश अधिकारी र पर्यटन बोर्डका सिईओ डा. धनन्जय रेग्मीले उनीहरुलाई सम्मानपत्र तथा पुरस्कार प्रदान गरेका थिए ।