३१ साउन/अर्थ र व्यापार – पर्वतीय पर्यटन व्यवसायीको छाता संस्था ट्रेकिङ एजेन्सिज एसोसिएसन अफ नेपाल (टान) को अध्यक्षमा निलहरि बाँस्तोला विजयी भएका छन् ।
सोमबार सम्पन्न टानको ४४औं वार्षिक साधारणसभा एवं निर्वाचनबाट बाँस्तोला ६ सय १६ मतप्राप्त गरी विजयी भएका हुन् ।
उनका प्रतिस्पर्धी रामप्रसाद सापकोटाले २ सय ६४ मत प्राप्त गरेका थिए । सापकोटालाई ३५२ मतको भारी मतान्तरमा पराजित गर्दै अध्यक्षमा विजयी भएका बाँस्तोला समुहको एकजना सदस्य बाहेक सबै प्यानल नै विजयी भएका हुन । यसैगरि, अध्यक्षका अर्का स्वतन्त्र उम्मेदवार बोधराज भण्डारीले जम्मा ४४ मत ल्याएका थिए ।
सो निर्वाचनबाट टानको बरिष्ठ उपाध्यक्षमा कृष्णप्रसाद दाहाल, प्रथम उपाध्यक्षमा प्रदीप पण्डित, द्वितीय उपाध्यक्ष धनबहादुर गुरुङ, महासचिवमा विनोद सापकोटा (बाबु), सचिवमा होमनाथ भट्टराई र कोषाध्यक्षमा पुरुषोत्तम तिमिल्सिना र सहकोषाध्यक्षमा छिङ दोर्शी शेर्पा विजयी भएका छन् ।
यसैगरि, महिला सदस्यमा सजना त्रिपाठी, खुला सदस्यहरुमा रामप्रसाद बञ्जारा, राजु अर्याल, गणेशबहादुर अधिकारी, कुमार लामा, नविनाथ देवकोटा, सुवास भण्डारी, लाक्पा दोर्जे शेर्पा र कृष्णबहादुर परियार निर्वाचित भएको टान निर्वाचन समितिले जनाएको छ ।
टानका नवनिर्वाचित अध्यक्ष बाँस्तोलाले टानलाई व्यवसायीको साझा संस्थाको रुपमा स्थापित गर्न सरोकारवालासँग सहकार्य गरेर अघि बढ्ने प्रतिबद्धता जनाए । उनले निर्वाचनको दौरानमा प्रस्तुत गरिएको २० बुँदे घोषणापत्र कार्यान्वयनका लागि प्राथकिताका साथ लाग्ने प्रतिवक्ता व्यक्त गरे ।
यसैगरि, उनले टानलाई समयसापेक्ष बनाउँदै सेवा प्रवाहलाई चुस्तदुरुस्त बनाएर व्यवसायीको समस्यालाई सम्बोधन गरिने बताए । उनले कोरोनाले थलिएको मुलुकको पर्यटन पुनरुत्थानका लागि सरकार तथा निजी क्षेत्रले सहकार्य गरेर पर्यटन क्षेत्रमा सकारात्मक उत्साह जगाउने कार्यमा लाग्ने बताए ।
सोमबार सम्पन्न टानको निर्वाचनमा अध्यक्ष, पदाधिकारी र सदस्य गरी कुल २५ सदस्यीय नयाँ कार्य समितिमध्ये १७ जना निर्वाचित र बाँकी सदस्य मनोनीत गरिनेछ । कुल १२६० व्यवसायीले आफ्नो कम्पनी नविकरण गरि मतदातामा नाम उल्लेख भएपनि सो निर्वाचनमा जम्मा ९४८ मत मात्र खसेको टान निर्वाचन समितिले जनाएको छ ।