८ जेठ/अर्थ र व्यापार – नेपाल पर्वतारोहण संघको भोलि (सोमबार) हुने भनिएको साधारणसभा स्थगन गर्न आह्वान गरिएको छ । आइतबार रिपोर्टर्स क्लब नेपालमा पत्रकार सम्मेलन गर्दै संघको गैरीधारास्थित सिल्भर ओक बंैक्वेटमा बोलाईएको साधारण सभा बहिष्कार गर्न सबै सदस्यहरुलाई आग्रह गरिएको हो ।
पत्रकार सम्मेलन मार्फत संघका निर्वतमान अध्यक्ष आङछिरिङ शेर्पा, पुर्व अध्यक्ष जिम्बाजाङबु शेर्पा र कार्यसमिति सदस्य तुल्सी गुरुङले संघको गैरवैधानिक ३१औं साधारणसभा स्थगन गर्न सम्बन्धित सबैलाई आग्रह गरेका हुन् । यसअघि संघको साधारणसभा विधानविपरित रहेको भन्दै जिल्ला प्रशासन कार्यालय काठमाडौंले पनि कुनैपनि कामकारर्बाही नगर्न आदेश दिएको उनीहरुले बताएका छन ।
संघका बहुसंख्यक सदस्यहरु, आरोहीहरु, पर्यटन मजदुरहर तथा पर्यटन व्यवसायीहरु, हिमाल आरोहण तथा टे«किङ पेशामा काठमाडौं उपत्यकाभन्दा बाहिर ब्यस्त रहेको मौका छोपेर २ वर्ष अघि नै कार्यकाल समाप्त भइसकेका कार्यसमितिले संघको विधानविपरित केन्द्रीय सचिवालयले सोमबार गर्न लागेको साधारणसभा स्थगन गर्नुपर्ने उनीहरुको माग छ ।
यसअघि समयमा गर्नुपर्ने केन्द्रीय कार्यसमितिको निर्वाचनलाई गौण बनाई विषयलाई पुनः निरन्तरता प्रदान गर्दै ३१औं वार्षिक साधारणसभा गत ९ चैतमा बोलाइएकोमा पाटन उच्च अदालतको अन्तरिम आदेश पछि स्थगित गरिएको थियो ।
सोमबार बोलाइएको साधारणसभा आरोही, ट्रेकिङ मजदुर तथा पर्यटन व्यवसायीलाई आफ्नै हक अधिकारबाट बञ्चित गर्ने षड्यन्त्रको भण्डारफोर गर्दै आफुहरुले स्थगनको माग गरेको उनीहरुद्धारा जारी विज्ञप्तीमा उल्लेख छ ।
पत्रकार सम्मेलनमा संघका निवर्तमान अध्यक्ष आङछिरिङ शेर्पाले नेपाल पर्वतारोहण संघको कार्यकाल सकिएर २ वर्ष हुँदापनि कार्यसमितिको निर्वाचन गर्ने पहल नगरेको आरोप लगाए । उनले संघलाई आफुहरुले धेरै दबाब दिएपनि आलटाल गरेपछि आफुहरु तुरुन्तै निर्वाचन गर्नुपर्छ र चुनावबाट नयाँ कार्यसमिति चयनको पहल गरिदिन आग्रह गर्न जिल्ला प्रशासन कार्यालय काठमाडौं पुगेको सुनाए । उनले संघको निर्वाचन तत्काल गर्नुपर्छ भनेर आफूहरु काठमाडौंस्थित् जिप्रकामा गएको स्पष्ट पारे ।
जिल्ला प्रशासन कार्यालय काठमाडौंले यो साधारणसभा संघको विधानविपरित रहेको भन्दै कुनैपनि कामकारवाही नगर्न लिखित आदेश दिएको हुनाले अब यस साधारण सभा सबैले बहिष्कार गर्नुपर्ने धारणा पनि उनले राखे । पत्रकार सम्मेलनमा संघका पूर्व अध्यक्ष जिम्बाजाङबु शेर्पाले प्रेस विज्ञिप्ती वाचन गरेका थिए । 

संघका पूर्व कोषध्यक्ष तथा नेपाल जनजाती महासंघका महासचिव एवं जसपाका नेता आङकाजी शेर्पाले यस संघले कार्यकाल सकिएको २ वर्षसम्म पनि निर्वाचन गर्न आलटाल गरेपछि जिल्ला प्रशासन कार्यालयले आगामी २७ र २८ बैशाखमा निर्वाचन घोषणा गरिदिएको सुनाए । उनले भने,‘नेपाल पर्वतारोहण संघले निर्वाचनमा आफ्नो पक्षका सदस्यहरु नभएपछि विधान मिचेर संशोधन गर्न साधारणसभा आयोजना गरेको आरोप लगाए । यसैगरि, उनले अब सबै सदस्यहरुले यो साधारणसभा बहिस्कार गर्नुपर्ने बताए ।