९ फागुन/अर्थ र व्यापार – धेरै पटक गरेको ताकेता तथा केही क्यासिनो सञ्चालकमाथी भएको जरिवना सहितको कारबाहीबाट सरकारले अहिलेसम्म झन्डै साढे ७६ करोड रुपैयाँ बक्यौता रोयल्टी उठाएको छ ।
संस्कृति, पर्यटन तथा नागरिक उड्डयनमन्त्री प्रेमबहादुर आलेले रोयल्टी नतिर्ने केही क्यासिनोको लाइसेन्स (इजाजतपत्र) खारेज गर्नुकासाथै अन्यको पनि खारेज हुने चेतावनी दिएसँगै अहिले क्यासिनो सञ्चालकहरुले धामाधम बक्यौता रोयल्टी बुझाउन थालेका छन् ।
पर्यटन विभागका अनुसार हालसम्म विभिन्न बहाना बनाएर अटेरगरि बसेका १७ वटा क्यासिनो कम्पनीले आफुले तिर्न बाँकी रोयल्टी बुझाएका हुन् । हालसम्म सरकारको खातामा ७६ करोड ४५ लाख रुपैयाँ राजस्व संकलन भएको छ ।
पर्यटन विभागका होटल तथा क्यासिनो शाखाका अधिकृत खेमराज जोशीले यस्तो जानकारि गराएका हुन । उनले रोयल्टी नतिर्ने क्यासिनोको लाइसेन्स खारेज गर्नु भन्ने पर्यटनमन्त्री आलेको निर्देशनपछि, अहिले क्यासिनो सञ्चालकले धमाधम रोयल्टी तिरिरहेको बताए । उनले हाल दैनिक करोडौं रुपैयाँ सरकारी खातामा जम्मा भईरहेको जानकारि दिए । विभागका अनुसार अब सरकारलाई क्यासिनो सञ्चालकहरुले तिर्नुपर्ने जम्मा रकम १ अर्ब ११ करोड ८४ लाख ४७ हजार रुपैयाँ मात्र रहेको छ । सरकारले यसअघि धेरैपटक गरेको ताकेता पछि अहिले क्यासिनो सञ्चालकहरु आफुले तिर्न बाँकी बक्यौता रकम बुझाउन आइरहेको विभागले जनाएको छ ।
यसैगरी, मन्त्री आलेकै निर्देशनमा क्यासिनोको रोयल्टी वर्षौंसम्म पनि नतिर्ने काठमाडौँको दरबारमार्गस्थित होटल याक एन्ड यतीको लाइसेन्स खारेज गरिएपछि अहिले अन्य क्यासिनो सञ्चालकहरुले पनि धमाधम बक्यौता रकम तिर्न सुरु गरेको विभागले जनाएको छ । मन्त्री आलेकै निर्देशनपछि विभागले रोयल्टी नतिर्ने क्यासिनो सञ्चालकको तीनपुस्ते विवरण समेत सार्वजनिक गरेको सो विभागले जनाएको छ ।
अब ६ कम्पनीले रोयल्टी नवीकरण दस्तुर बुझाउन बाँकी रहेको विभागले जनाएको छ । त्यसमध्ये एसएचएल म्यानेजमेन्ट सर्भिसेज प्रालिको दुईवटा होटलमा गरेर १४ करोड बाँकी रहेको र सो होटलको बैंक जमानत रहेकाले असुलउपर गर्न समस्या नरहेको पर्यटन विभागका होटल तथा क्यासिनो हेर्ने अधिकृत जोशीले जानकारी दिए ।
विभागका अनुसार अझै विभिन्न क्यासिनोबाट १ अर्ब ११ करोड रुपैयाँ उठ्न बाँकी रहेको छ । यो बक्यौता पनि छिटै उठाउने पहल गरिरहेको विभागले जनाएको छ ।