१४ पुस/अर्थ र व्यापार – मुलुकको राष्ट्रिय ध्जाबहाक नेपाल वायुसेवा निगमको अन्तर्राष्ट्रिय उडान भर्ने दुईवटा विमान एकैदिन ग्राउण्डेड भएको छ । नियमित अन्तर्राष्ट्रिय उडानमा सञ्चालित दुईवटै विमानमा प्राविधिक समस्या आएपछि मंगलबारदेखि नै निगमको विमान ग्राउण्डेड भएको हो । 
निगमको मंगलबार ९ एन–एकेडब्लु कलसाइनको न्यारोबडी विमान र ९ एन–एलवाई कलसाइनको वाइडबडी विमानमा अकस्मात प्राविधिक समस्या आएर ग्राउण्डेड भएको हो। निगम स्रोतका अनुसार मंगलबार काठमाडौंबाट उडेर कतारको दोहा विमानस्थलमा अवतरण भएलगत्तै निगमको न्यारोबडी विमानको इन्जिनमा समस्या देखिएको थियो । यसैगरि, काठमाडौंबाट जापानको नारिता उडान भर्नकालागि तयार निगमको अर्को वाइडबडी विमानमा विद्युतीय समस्या उत्पन्न भएका कारण विमानस्थलमै ग्राउण्डेड भएको छ ।
निगम स्रोतका अनुसार मंगलबारबाट कतारको दोहामा ग्राउन्डेड भएको न्यारोबडी विमान मर्मतका लागि झन्डै एकसाता लाग्ने छ भने जापानको नारिता उड्ने तयारीमा विग्रिएको वाइडबडी विमान मर्मतकालागि पनि एक÷दुईदिनको समय लाग्ने बताईएको छ ।
कतारको दोहा विमानस्थलमा विग्रिएर अलपत्र परेको निगमको न्यारोबढी विमानको समस्या अलि संवेदनशील रहेको जानकारी गराउँदै निगम स्रोतले भन्यो, ‘ यो विमान अवतरण गरेर टयाक्सीवेबाट पार्किङतर्फ लैजाँदा एकासी फल्ट अलर्ट आएको थियो ।’ यसैगरि, वाइडबडी विमान मर्मतका लागि पनि प्राविधिक चेकजाँचपछि आवस्यक स्पेयर पार्ट्सको अर्डर भइसकेको निगम स्रोतले जनाएको छ । 
एकैदिन अन्तर्राष्ट्रिय उडानमा सञ्चालित दुईवटा विमान विग्रिएर ग्राउन्डेड भएपछि अहिले कम विमान भएको निगमलाई हवाई टिकट खरिद गरेर बसेका र विभिन्न गन्तब्यकालागि विमानस्थल पुगेका यात्रुलाई उनीहरुको यात्रा गन्तब्यसम्म पु¥याउन निकै समस्या पर्ने भएको छ । मंगलबारको उडानमा यात्रा गर्नुपर्ने यात्रुहरुको व्यवस्थापन गर्न होटलमा राख्नुपर्ने बाध्यात्मक अवस्थाले निगमको सञ्चालन खर्च समेत थप बढ्ने छ ।   
दुईवटै विमान एकैपटक विग्रिएको दिन मंगलबार निगमको अन्तर्राीष्ट्रय उडानमा १० वटा उडान तालिका थियो । पछिल्लो समय निगमले काठमाडौ दुबई र दोहा लगायत अन्य दुईवटा गन्तब्यमा मात्रै साताको थप ६ वटा उडान भर्दै आएको छ ।
त्रिभुवन अन्तर्राष्ट्रिय विमानस्थलबाट उड्ने तयारीको क्रममा विग्रिएर ग्राउन्डेड भएको निगमको वाइडबडी विमानमा प्राविधिक समस्या देखिपछि सो विमानका चालकले मंगलबार १०३ जना यात्रु सहितको काठमाडौं–नारिता उडान स्थगित गर्नुपरेको बताएका थिए । निगमको ९ एन–एएलवाई कलसाइनको वाइडबडी विमानमा प्राविधिक समस्या देखिएपछि उडान स्थगित गरिएको निगमका प्रवक्ता अर्चना खड्काले जानकारि दिइन् । 
उनले वाइडबढी विमानको उडान भने बुधबार साँझ ४ः०० बजे भर्ने तयारी गरिएको बताइन ।  यो विमानमा सामान्य प्राविधिक समस्या आएसँगै अहिलेसम्म ग्राउण्डेड गराइएको उनले जानकारि दिइन् । 
काठमाडौबाट जापानको नारिता उड्ने तयारीमा रहेको वाइडबडी विमानमा प्राविधिक समस्या देखिएपछि मंगलबार राती १०ः५० बजेको उडान रोकिएपछि निगमले सो विमानका यात्रुलाई तारे होटलमा लगेर राखेको थियो । प्रवक्ता खड्काका अनुसार सोही विमानले नारिताबाट काठमाडौं ल्याउने तयारीमा रहेका एकसय ७३ जना यात्रुलाई पनि त्यहाँको होटलमा लगेर राखिएको थियो । 
यसरी एकैपटक दुईवटा विमानमा यात्रा गर्ने यात्रुहरुलाई होटलमा राख्नुपर्दा निगमको सञ्चालन खर्च थप बढेको सम्बन्धीत सरोकारवालाहरुको भनाई छ ।