२१ भदौ / अर्थ र व्यापार – बुधबारको सेयर बजार परिसूचक नेप्से दोहोरो अंकले बढेको छ भने कारोबार रकममा सामान्य गिरावट देखिएको छ । केही दिन यता बैंक तथा वित्तीय संस्थाहरुले सहज रुपमा सेयरकर्जा प्रवाह गर्ने आर्कषक योजनाका विज्ञापनहरु गर्न थालेपछि यसको प्रभाव बजारमा देखिएको हो ।

नबिल र एनआइसी एशिया लगायतका वाणिज्य बैंक, मुक्तिनाथ, ज्योति,कैलाश लगायतका विकास बैंकले सेयर कर्जाका योजनाहरु सार्वजनिक गरेका छन् । बैंक तथा वित्तीय संस्थाहरुले सेयर कर्जा लिन धमाधम बोलाएपछि सेयरबजारमा सुध्रने आशमा लगानीकर्ता रहेको र सोही अनुसार कारोबारमा सहभागी हुँदा बजारमा सकारात्मक प्रभाव परेको हो । 

तर बैंकहरुले सेयर कर्जा लिन बोलाएपनि सहज रुपमा कर्जा पाउन नसकेको साना लगानीकर्ताको गुनासो छ । धेरै जसो बैंकहरुले ठुला लगानीकर्तालाई मात्र सेयर कर्जा उपलब्ध गराएको छ ।

मंगलबार इन्द्रजात्राको अवसरमा सार्वजनिक विदा परेकाले सेयर कारोबार भएन । बुधबार कारोबार खुल्नासाथ इन्भेष्टमेन्ट बैंकको लाभांशको सूचना नेप्सेमा सार्वजनिक भयो । बैंकको लाभांशले बजारमा तिब्र वृद्धि आयो । सबैभन्दा धेरै चुक्तापूँजी र साधारण सेयरको संख्या भएको बैंकले आर्कषक लाभांश प्रस्ताव गरेपछि बजार आधाघण्टा नपुग्दै २५ अंकसम्म उकालो लागेको थियो । बैंकले २५ प्रतिशत बोनस र १५ प्रतिशत नगद दिने बताएको थियो ।

तर बैंकले सूचना गलत भएको भन्दै सच्याएर अर्को सूचना जारी गरेपछि बजारको चाम हरायो । उसले १५ प्रतिशत बोनस र २५ प्रतिशत नगद लाभांश बाड्ने प्रष्ट्यायो । बैंकको एक गलत सूचनाले यसबिचमा इन्भेष्टमेन्ट बैंकको सेयर किन्ने लगानीकर्ताले घाटा सहनु पर्यो । बजार खुल्दा प्रतिकित्ता ७४३ रुपैयाँ रहेको बैंकको सेयरमूल्य प्रतिकित्ता ८०५ रुपैयाँ सम्म पगेको थियो । बजार बन्द हुदा सेयरमूल्य ७६२ रुपैयाँ कायम भएको छ ।

बजारमा इन्भेष्टमेन्ट बैंकको सबैभन्दा धेरै ७ करोड बढीको सेयर किनबेच भएको छ । बैंकको ९१ हजार २४७ कित्ता सेयर किनबेच भयो । बुधबार सेयरबजार परिसुचक नेप्से ११.९४ अंकले बढेर १५६६.५० बिन्दुमा पुगेको छ । यसदिन १६४ कम्पनीको ८३ करोड ४३ लाख रुपैयाँभन्दा बढीको सेयर कारोबार भयो । कारोबार रकम गत सोमबारको तु्लनामा करिब एक करोड कम हो ।

इन्भेष्टमेन्ट बैंकपछि उच्च कारोबार हुने गुराँस लाइफ इन्स्योरेन्सको ५ करोड बढीको संस्थापक सेयरको किनबेच भयो । नेपाल लाइफ र नबिल बैंकले पनि ३ करोड बढीको कारोबार गरे ।

यसदिन महिला संस्था वित्तीय सहयात्रको सेयरमूल्य सबैभन्दा धेरै दश प्रतिशतले बढेको छ । आरएसडिसी लघुवित्तको सेयरमूल्य पनि झण्डै दश प्रतिशतकै हाराहारीमा बढेको छ । सिद्धार्थ ओरिन्टेड इक्कुटी स्किम र नादी पावरको सेयरमूल्य सबैभन्दा धेरै आठ प्रतिशत बढीले घटेको छ ।