२२ साउन / अर्थ र व्यापार – साताको पहिलो दिनको कारोबारमा प्राइम कमर्शियल बैंक लगायतका कम्पनीहरुको सेयरमूल्य बढेर उच्च कारोबार हुनुले लगानीकर्ताको यो छनौटलाई संकेत गर्छ । यसका साथै कम्पनीहरुले साधारण सभाको मिति तय गर्दै आफू सुधार हुने आश देखाउँदा  लगानीकर्ताहरुमा त्यसको सकरात्मक असर परेको छ ।

कारोबार रकममा केही गिरावट आए पनि बजार चार अंकले उकालो लागेको छ । वाणिज्य बैंक समूहको सूचक उकालो लाग्दा बीमा तथा अरु केही समूहमा गिरावट आएको छ । गत आर्थिक वर्षमा धेरै कमाई गरेर उच्च प्रतिफल दिन सक्ने सस्तो सेयरमा लगानीकर्ताको चाप बढ्दा वाणिज्य बैंक समूहमा बढोत्तरी भएको हो । आइर्तवार बजार खुलेदेखि उकालो लाग्ने क्रम सुरु भएपनि केही बेर पछि बजार सुस्त बनेको थियो । १६६९.४० अंकसम्म पुगेको बजार बन्द हुँदा ४.४७ अंकको वृद्धिमा १६६५.०५ अंकमा बन्द भएको हो ।

कारोबार रकममा भने गत बिहीबारको तुलनामा केही गिरावट देखिएको छ । गत बिहीबार एक अर्ब १३ करोड रुपैंयाको सेयर किनबेच भएको थियो । आइतबार झण्डै १२ करोड रुपैंयाले घटेर एक अर्ब एक करोड रुपैंयाको सेयर किनबेच भएको हो । यस क्रममा १५९ कम्पनीका ३२ लाख ९३ हजार ४८१ कित्ता सेयर १० हजार ३४५ पटक किनबेच भएका छन् ।

वाणिज्य बैंक, उत्पादन र अन्य समूह उकालो लाग्दा बीमा, होटल, जलविद्युत, विकास बैंक, वित्त सूचकमा भने गिरावट आएको छ । कारोबार चापमा भने विभिन्न समूहका मिश्रित कम्पनीको वर्चस्व देखिएको छ । साउन ३१ गते हुने साधारण सभाले नेशनल हाइड्रोमा नयाँ व्यवस्थापन आउने आशमा लगानीकर्ताको ध्यान  तानिएको देखिन्छ । जसका कारण अधिक सेयर कारोबार हुँदा नेशनल हाइड्रोको सेयरमूल्य सात प्रतिशतले बढेको छ ।

यस अघि नै हाथवे इन्भेष्टमेण्टले नेशनल हाइड्रोमा आफ्नो प्रवेश हुने बित्तिकै एक रातमा नै कायापलट नहुने भन्दै सेयर मूल्यमा चलखेल नगर्न चेतावनी दिइसकेको छ । हाथवेले विगतका विवाद सुल्झाउन सबै पक्ष तयार भए मात्र आफुहरुले व्यवस्थापन सम्हाल्ने सेयरधनीको विशेष भेलामा प्रष्ट पारिसकेको छ । यस अर्थमा सबै पक्षको सहमति नभएको खण्डमा हाथवे नेशनल हाइड्रोमा जसरी पनि जान्छ भनेर सेयर किन्नु पहिले गम्भीर हुन जरुरी छ ।

नेशनल हाइड्रोसँगै प्राइम कमर्शियल बैंक, नेपाल लाइफ इन्स्योरेन्स, नेशनल माइक्रोफाइनान्स, स्टाण्डर्ड चार्टर्ड बैंक लगायत कम्पनीको अधिक सेयर कारोबार भएको छ । अधिक कमाई गर्नेको सूचीमा प्राइम,नबिल बैंक, नेशनल हाइड्रो तथा अन्य साना कम्पनीहरुको वर्चस्व रहेको छ । बजारमा आएको सुधारले बजार पूँजीकरण १९ खर्ब ५० अर्ब रुपैंया पुगेको छ ।