११ पुस/ अर्थ र व्यापार  - कार्यदलले प्रतिवेदन बुझाएपछि ३२ अंक बढेर फेरि ओर्लिएको शेयर बजारले ३० अंकको छलाङ मारेको छ । अर्थमन्त्रीको कार्यदलले दिएको सुझाब राष्ट्र बैंकले मान्दिएपछि शेयर बजारले १२०० अंकलाई समेत नाघेको छ । अंग्रेजी नयाँ बर्षको मुखैमा राष्ट्र बैंकले लगानीकर्तालाई बम्पर गिफ्ट दिएका कारण बजारमा उछाल देखिएको हो ।

केन्द्रीय बैंकले बुधबार निर्देशन जारी गर्दै लगानीकर्ताले मागेजति सबै माग पुरा गरिदिएको छ । शेयर धितो ऋणमा लचकताका साथै मार्जिन कलको समस्यासमेत हल गरिदिएको छ ।  कार्यदलले दिएको सुझाब अनुसार नै केन्द्रीय बैंकको निर्देशन नआउने हो कि भन्ने आशंकामा लगानीकर्ता थिए । त्यसैले ३२ अंकको फराकिलो बृद्धिपछि बजार ओरालो लागेको थियो । कार्यदलले दिएको सबै सुझाबहरु कार्यान्वयनमा आएपछि बुधबार लगानीकर्ताहरु हौसिएका छन् । दनिभरीमा करिव ७० अर्ब रुपैयाँको किनबेचसमेत भएको छ । शेयर बजार निरन्तर घटेपछि अर्थमन्त्री खतिवडाले बजार बढाउने उपायका बारेमा सुझाब दिन कार्यदल गठन गरेका थिए । कार्यदलको उद्देश्य ब्याज दर झार्ने पनि थियो। कार्यदलले के के कारणले बजार बढ्छ ती सबै उपायहरु सुझाबका रुपमा दिएको थियो ।

कार्यदलले दिएको सुझाब अनुसार केन्द्रीय बैंकले शेयर धितो ऋण मूल्यांकनको ६५ प्रतिशतसम्म दिन पाइने ब्यवस्था गरेको छ । यसअघि ५० प्रतिशतभन्दा बढि दिन पाइँदैन थियो । यसैगरी शेयर धितो ऋणलाई निरुत्साहित गर्नका लिग राखिएको रिक्स वेटेजको ब्यवस्थालाई परिमार्जन गरी उत्पादनमूलक सरह राख्ने ब्यवस्था गरिएको छ । शेयर धितो कर्जामा १५० प्रतिशत रिक्स वेटेज राख्नु पर्दथ्यो । अब भने उत्पादनमूलक सरह १०० प्रतिशत राखे हुन्छ । यसैगरी बैंक तथा वित्तीय संस्थाको कोर क्यापिटलको २५ प्रतिशतसम्म मात्र शेयर धितो ऋण दिन पाइनेमा अब ४० प्रतिशतसम्म दिन पाइने ब्यवस्था गरिएको छ ।

बैंकहरुलाई सहायक कम्पनी खोलेर शेयर ब्रोकरको काम गर्न दिने नीतिगत ब्यवस्थासमेत गरिएको छ । बैंकहरुको ऋणको ब्याज दर झार्ने गरी आधार दरमा कडाइ गरिएको छ । यी सबै प्याकेजले गर्दा शेयर बजारमा उछाल देखिएको हो । सबै उपसूचकहरु उक्लिएका छन् । निर्जीबन बीमा कम्पनीको शेयर सुचक २४५ अंकले उक्लिएको छ । बैंकको साढे १८ अंकले बढेको छ भने जीवन बीमाको साढे ४ सय अंकले उक्लिएको छ । लघुवित्त ५० र होटल साढे ६५ अंकले उक्लिएको छ ।
दिनभरीमा सबैभन्दा बढि नेपाल बैंकको ४ करोड ३६ लाखको शेयर किनबेच भएको छ । नागरिक लगानी कोष, विशाल बजार कम्पनी, प्रुडेन्सियल इन्स्योरेन्स, मल्टीप्रपोज फाइनान्स, नेपाल लाइफ इन्स्योरेन्स र नेशनल लाइफको शेयर मूल्य करिव १० प्रतिशतले बढेको छ । १७३ कम्पनीको शेयर कारोबार भएकोमा ११ कम्पनीका लगानीकर्ताले गुमाएका छन् ।