१७ बैशाख /अर्थ र व्यापार - आज शेयर बजारमा नेप्से परिसुचक ११.७० अंकले घटेर १२९८.६० विन्दुमा झरेको छ । यस दिन १७६ कम्पनीको २९ लाख ६७ हजार ३५८ कित्ता शेयरहरु ९५ करोड ८६ हजार रुपैयाँमा किनबेच भएका छन् । सोमबार एक अर्ब १९ करोड ७७ लाख रुपैयाँको शेयर कारोबार भएको थियो ।

मंगलबार करोबारमा आएका ११ उपसमुह मध्ये हाइड्रोपावर र फाइनान्स समुहको सुचक मात्रै सकारात्मक देखिएको छ । हाइड्रोपावरमा लागनीकर्ताहरुको आकर्षण बढ्दा सूचक ४५.४९ अंकले बढेको छ । यस्तै फाइनान्स समुहको सूचकमा पनि १.०३ अंकको सुधार आएको छ ।
यता निर्जीवन बीमा समुहको सूचक सबै भन्दा धेरै २०५.३१ अंकले घटेको छ । जीवन बीमाको पनि २०१.८२ अंकले घटेको छ । यस्तै होटल २४.८८, माइक्रोफाइनान्स १८.०२, वाणिज्य बैंक ९.८२, अन्य ५.३७, व्यापार ४.८२, र विकास बैंकको सूचक २.३७ अंकले ओरालो लागेका छन् ।

मंगलबार नेपाल लाइफ इन्स्योरेन्सको अधिक मात्रामा शेयर कारोबार भएको छ । मंगलबार नेपाल लाइफको मात्रै १६ करोड रुपैयाँ बराबरको शेयर कारोबार भएको हो । मंगलबार सम्म कायम शेयरधनीले मात्रै लाभांश पाउने भएपछि इन्स्योरेन्सको शेयर कारोबार बढेको हो । नेपाल बैंकको पनि ९ करोड ३१ लाख रुपैयाँ बराबरको शेयर कारोबार भएको छ । यस्तै अपर तामाकोशी, कुमारी बैंक, सानिमा माई हाइड्रोपावरको ३ करोड भन्दा बढीको शेयर कारोबार भएको छ । छिमेक लघुवित्त, चिलिमे हाइड्रोपावरको पनि २ करोड भन्दा बढीको शेयर कारोबार भएको छ ।

मंगलबार नाफा कमाउने शिर्ष कम्पनीको सूचीमा हाइड्रोपावरको बर्चश्व रहेको छ । शिर्ष १० को सूचीमा ९ हाइड्रो कम्पनीहरु रहेका छन् । यस दिनको बजारबाट सानिमा माई हाइड्रोपावरका शेयरधनीहरुले सबै भन्दा धेरै ९.९६ प्रतिशत कमाएका छन् । अरुण भ्याली हाइड्रोपावरको शेयरमूल्य पनि ९.७१ प्रतिशतले बढेको छ । यस्तै युनाइटेड मोदी हाइड्रोपावरको ८.१८, रैराङ्ग हाइड्रोपावरको ६.५९, नेशनल हाइड्रोपावरको ५.८०, अरुण काबेली पावरको ५.५२, हिमालयन पावर पार्टनरको ४.९७, पञ्चकन्या माई हाइड्रोपावरको ४.६३ र चिलिमे हाइड्रोपावरको शेयरमूल्य ४.३७ प्रतिशतले सुधार भएको हो ।
यता राष्ट्रिय बीमा कम्पनीको शेयरधनीहरुले सबै भन्दा धेरै ५.९८ प्रतिशतले गुमाएका छन् । एशियन लाइफ र जनउत्थान लघुवित्तको शेयरमूल्य ४ बढीले शेयर मूल्य घढ्दा नेपाल इन्स्योरेन्स, ग्लोवल आईएमई लघुवित्त, किसान माइक्रोफाइनान्स, एनएलजी इन्स्योरेन्स, नागबेली लघुवित्त, स्वरोजगार लघुवित्त र प्राइम लाइफ इन्स्योरेन्सको शेयरधनीहरुले ३ प्रतिशत भन्दा बढीले गुमाएका छन् ।