६ मंसिर  / अर्थ र व्यापार - मंगलबार नेप्सेमा सामान्य सुधार देखिएको छ । गत साताको बुधबारदेखि ओरालो लागेको नेप्से यस दिन मंगलबार नेप्सेमा ३ दशमलव शून्य ८ अंक बढेको छ । कारोबारको एक घन्टा अवधिसम्म करिब स्थिर रहेको नेप्से त्यसपछिको समयमा बढ्न थालेको थियो । कारोबारमा आएका दश समूहमध्ये ६ समूहका परिसूचक बढेपछि नेप्से उकालो लाग्न पुगेको हो । नेप्से उकालो लागे पनि अघिल्लो दिनको तुलनामा यस दिनको कारोबार रकम घटेको छ । पछिल्ला चार कारोबार दिनमा नेप्से ४६ दशमलव ८६ अंक घटेपछि कम्पनीहरूको सेयरमूल्य सस्तो भएको छ । सोही मौकाको फाइदा उठाउँदै लगानीकर्ताहरू खरिद गर्न अग्रसर भएका कारण बजारमा केही सुधार देखिएको हो ।

यस दिन १ सय ५९ कम्पनीको ४ हजार २ सय ९० पटकको कारोबारमा रु. ३५ करोड ८ लाख १८ हजारबराबरको ८ लाख ४२ हजार ६ सय ८२ कित्ता सेयर खरिद–बिक्री भएको छ । कारोबार रकम अघिल्लो दिनको तुलनामा ११ दशमलव ७९ प्रतिशत अर्थात् रु. ४ करोड ६९ लाख कम हो । नेप्सेको १४ दिने आरएसआई यस दिन ३७ दशमलव ७४ स्केलमा रहेको छ । न्युट्रल जोनमा रहेको यस आरएसआईले बजारमा सेयर खरिद–बिक्री चाप सन्तुलनमा रहेको संकेत गर्दछ । ‘क’ वर्गको कारोबार मापन गर्ने सेन्सेटिभ इन्डेक्स यस दिन शून्य दशमलव ९२ अंक बढेर ३ सय १० बिन्दुमा पुगेको छ ।

कारोबार रकमका आधारमा यस दिन नागबेली लघुवित्त विकास बैंकको संस्थापक सेयर अगाडि रहेको छ । यस दिन सो कम्पनीको रु. ४ करोड २६ लाखभन्दा बढीको संस्थापक सेयर खरिद–बिक्री भएको छ । ग्रिन डेभलपमेन्ट बैंक र विशाल बजार कम्पनीको सेयरमूल्य यस दिन क्रमशः ९ दशमलव ८४ प्रतिशत र ९ दशमलव ८१ प्रतिशत बढेको छ । प्रोग्रेसिभ फाइनान्सको सेयरमूल्य भने यस दिन ६ दशमलव शून्य ३ प्रतिशत घटेको छ । कारोबारमा आएका १ सय ५९ कम्पनीमध्ये ८२ कम्पनीको सेयरमूल्य बढेको छ भने ५६ कम्पनीको सेयरमूल्य घटेको छ । बाँकी २१ कम्पनीको सेयरमूल्य यस दिन स्थिर रहेको छ । 
विशाल बजारको सेयरमूल्य बढेपछि ट्रेडिङ समूहको परिसूचक सर्वा्धिक ७ दशमलव ६८ प्रतिशत बढेर २ सय १९ बिन्दुमा पुगेको छ । होटेल र बैंकिङ समूहको परिसूचक शून्य दशमलव ४४ प्रतिशत, जलविद्युत् समूहको शून्य दशमलव ३६ प्रतिशत बढेको छ भने बिमा र माइक्रोफाइनान्स समूहको शून्य दशमलव १९ प्रतिशत बढेको छ । ‘अन्य’ समूहको परिसूचक यस दिन शून्य दशमलव ६६ प्रतिशत घटेको छ । त्यसैगरी, उत्पादनमूलक समूहको शून्य दशमलव ६ प्रतिशत, वित्त समूहको शून्य दशमलव ३१ प्रतिशत र विकास बैंक समूहको शून्य दशमलव १९ प्रतिशत घटेको छ ।