१९ भदौ / अर्थ र व्यापार – सोमबारको सेयर कारोबारमा सामान्य उतारचढाव आएपनि सेयरबजार परिसूचक नेप्सेमा उच्च गिरावट आएको छ । कारोबारमा आएका सबै समूह नकारात्मक रहेपछि बजार उच्च अंकले घटेको हो । तर घटेको बजारमा सस्तो मूल्यमा सेयर खरिद गर्नेक्रम बढ्दा कारोबारमा कमी आएन ।

यो साता जम्मा दुई दिन मात्र सेयर कारोबार हुने भएपछि सेयरबजारमा बिक्रीको चाप परेको देखिन्छ । नजिकदै गरेको चाडपर्वको लागि पैसाको जोहो गर्नेहरुले सेयर बिक्रीको क्रम बढाएको देखिन्छ । बजार घटेको मौका छोपी सेयर उठाउनेहरु पनि उत्तिकै सक्रिय रहदा कारोबारमा उत्साह कायमै छ ।

सोमबार सेयर किन्ने र बिक्री गर्नेहरुबीच घम्साघम्सी हुँदा बजार खुलेको पहिलो एकघण्टामै नेप्से २५ अंकले झरेको थियो । त्यसपछि विस्तारै सुध्रिएको बजारले २० अंक रिकभर गरेपनि बजार बन्द हुने समयसम्म आईपुग्दा पुन ओरालो लागेर २५.४७ अंकले घटेर बन्द भएको छ ।

यो साता सार्वजनिक विदाका काराण दुई दिन मात्र सेयरबजार खुल्छ । आइतबार बकर ईदको सार्वजनिक विदाले सेयर कारोबार भएन । मंगलबार इन्द्रजात्रा भएकाले उपत्यकामा विदा रहेको छ । त्यस्तै विहीबार पनि निजामती कर्मचारीहरुलाई विदा रहेकाले सेयर कारोबार हुदैन । यो साता अब बुधबार मात्र सेयर बजार खुल्नेछ ।

बजारमा धेरै कारोबार हुने वाणिज्य बैंकहरुले कुन बैंकले कति बोनस दिन्छ र कुन बैंकको कति क्षमता छ भन्ने बिषयमा लगानीकर्ताहरुलाई पूर्व जानकारी भएकाले पनि बोनस घोषणा हुदा समेत बजार बढ्न नसकेको हो । अधिकांस वाणिज्य बैंकहरुले आफ्नो पूँजी वृद्धि योजनामै सम्भावित लाभांश बारे उल्लेख गरेका थिए ।

अर्कातर्फ राष्ट्र बैंकले तोकेको ८ अर्ब रुपैयाँ चुक्ता पुँजी पुर्याउने क्रममा सूचिकृत कम्पनीहरुले विगतमा दिएका हकप्रद, बोनस, एफपीओ धमाधम सुचिकृत भएकाले सेयरको आपूर्ति बढ्न गएको छ भने आपूर्ति अनुसारको माग नहुँदा सेयरमूल्य घट्न पु्गेको हो । 

तर केही लगानीकर्ताहरुले बजार घटेको मौकालाई सेयर खरिदको अवसरको रुपमा उपयोग गरेको देखिन्छ । जसका कारण कारोबारमा बढोत्तरी देखिएको छ ।

सोमबार सेयरबजार परिसुचक नेप्से २५ दशमलब ४७ अंकले घटेर १५५४.५६ बिन्दुमा झरेको छ । यसदिन १५२ कम्पनीको ८४ करोड २९ लाख रुपैयाँभन्दा बढीको सेयर कारोबार भयो । कारोबार रकम गत विहीबारको तु्लनामा ६२ लाख मात्रै कम हो ।

सेयरबजारमा फस्र्ट माइक्रोफाइनान्सको सबैभन्दा धेरै ३ करोड २७ लाखको सेयर किनबचे भयो । नेपाल लाइफ, स्टुयाण्र्डड चार्टर्ड बैंक र युनाईटेड इन्स्योरेन्सको पनि करिब तीन करोड बराबरको कारोबार भएको छ ।

यसदिन आरएसडिसी लघुवित्तको सेयरमूल्य सबैभन्दा धेरै नौ प्रतिशत बढीले उकालो लागेको छ । नादी पावरको सेयरमूल्य ६ प्रतिशतले बढेको छ ।हाम्रो विकास बैंक, प्रोगेशिभ फाइनान्स, युनाइटेड इन्स्योरेन्स, सप्तकोशी डेभलपमेन्ट तथा खानीखोला हाइड्रो लगायतको सेयरमूल्य सबैभन्दा धेरै ६ प्रतिशतका दरले घटेको छ ।