२९ मंसिर / अर्थ र व्यापार - पूर्वराजा ज्ञानेन्द्र शाहका परिवारको कम्पनीले सोल्टी होटलमा आफ्नो लगानी बढाएको छ। शाहसहित उनको परिवारको प्रमुख शेयर रहेको सोल्टी इन्टरप्राइजेजले हङकङको होलिडे इन्स इन्भेष्टमेन्ट नेपालको शेयर खरिद गरेको हो। 

इन्टरप्राइजेजले ७३ लाख २६ हजार ७ सय १ कित्ता शेयर ७२ लाख ५० हजार अमेरिकी डलरमा खरिद गरेको हो। बिक्रीपछि प्राप्त रकम हङकङ लैजान होलिडे इन्स इन्भेष्टमेन्ट नेपालले प्रक्रिया अगाडि बढाएको छ। कारोबारको सम्पूर्ण सम्झौता भए पनि दोस्रो बजारमा भने अहिलेसम्म कारोबार भएको छैन।

खरिद-बिक्रीको सम्झौता सम्पन्न भए पनि डिम्याट खातामा शेयर सार्नका लागि दोस्रो बजारमा कारोबार हुनु पर्छ। इन्टरकन्टिनेन्टल होटल ग्रुपको सहायक कम्पनीको रूपमा रहेको होलिडे इन्सले नेपालबाट लगानी फिर्ता लैजान लागेको हो। तर इन्टरकन्टिनेन्टलको व्यवस्थापन भने यथावत हुने छ। यो समुहले विश्वका धेरै होटलमा व्यवस्थापनको काम गर्दै आएको छ। 

होलिडे इन्स इन्भेष्टमेन्टको लगानी नेपालमा मात्रै बाँकी थियो। शेयरमा लगानी गर्ने भन्दा पनि व्यवस्थापकीय सेवामा मात्रै केन्द्रीत हुने भन्दै उसले पछिल्लो समय आफ्नो नाममा रहेको सम्पूर्ण शेयर बिक्री गर्दै आएको छ। सन् १९७५ मा सोल्टीलाई पब्लिक लिमिटेडका रूपमा परिणत गरि आइसीएफसी, एनआइडीसी, नेपाल एयरलाइन्स, ओबेरोय होटल र अन्य केही लगानीकर्तालाई भित्र्याइएको थियो। तर एनआइडीसी र आइसीएफसीले सन् २००१ मा आफ्नो शेयर बिक्री गर्ने भएपछि राज परिवारले हङकङको होलिडे इन्स इन्भेष्टमेन्टलाई भित्र्याएको थियो।

 एनआइडीसीले आफ्नो नामको सबै शेयर सर्वसाधारणहरुलाई बोलकबोल गरेर बिक्री गरेको थियो। जुन अहिले बजारमा कारोबार भइरहेको छ। आइसीएफसीको १४ प्रतिशतमध्ये १० प्रतिशत होलिडे इन्स र बाँकी चार प्रतिशत शेयर सर्वसाधारणले खरिद गरेका थिए। चार प्रतिशत बोलकबोल गर्ने क्रममा सर्वसाधारणको हातमा पुगेको थियो। 

पूर्वराज परिवारले नै भित्र्याएको यो समुहको शेयर अहिले आफैंले खरिद गरेर होल्डिङ बढाएको हो। हाल यस समुहको बजार हिस्सा ३९ प्रतिशत छ। होलिडे इन्सको शेयर खरिद गरेसँगै शेयर हिस्सा ४९ प्रतिशत पुग्ने छ। सुरूवाती अवस्थाको ओबेरोय होटल्सले पनि २०११ मा आफ्नो शेयर बिक्री गरेर बाहिरिएको थियो। उक्त शेयरमार्फत रविभक्त श्रेष्ठको प्रवेश भएको थियो। जतिबेला ओबेरोयको ६.८ प्रतिशत शेयर श्रेष्ठको शिवकिरम ल्याण्ड एण्ड इण्डष्ट्रियल कम्पनीले खरिद गरेको थियो।