६ साउन/अर्थ र व्यापार – यस साताको तेस्रो कारोबार दिन मंगलबार सेयर बजार परिसूचक नेप्से ८० दशमलब ९७ अंकले बढेको छ । सो वृद्धिपछि नेप्से २९ सय ७३ दशमलब ७० विन्दुमा पुगेको छ । लामो समयपछि ह्वात्तै बढेको नेप्सेको यो अंक गत २ भदौ यताकै सबैभन्दा धेरै हो ।
यसअघि गत २ भदौमा नेप्से ३ हजार अंक पुगेको थियो । यसदिन कारोबार सुरु भएदेखि बजार अन्तिम समयसम्म निरन्तर उकालो यात्रामै लागिरहेको थियो । अघिल्लो दिनको तुलनामा कारोबार रकम पनि बढेको छ ।
अघिल्लो दिन १६ अर्ब ३२ करोडको कारोबार भएकोमा यसदिन २० अर्ब ८ करोड ५३ लाख ३७ हजार २ सय ९३ रुपैयाँको सेयर कारोबार भएको छ । २ सय ३६ वटा कम्पनीको सेयरमूल्य बढेको छ । १४ वटा कम्पनीको सेयरमूल्य घटेको छ ।
मंगलबार तीनवटा उपसमूहको सेयरमुल्य सूचक ४ प्रतिशत भन्दा धेरैले बढेको छ । उत्पादन तथा प्रशोधन उपसमूहको ४ दशमलब ६३ प्रतिशत , जीवन बीमा उपसमूहको ४ दशमलब ३६ प्रतिशत र माइक्रोफाइनान्स उपसमूहको ४ दशमलब ०७ प्रतिशतले बढेको छ ।
बैंकिङ उपसमूहको २.१०, विकास बैंक २.२६, फाइनान्स १.९४, होटल तथा पर्यटन ३.४४, हाइड्रोपावर १.९०, लगानी ३.२४, निर्जीवन बीमा २.५६, अन्य ३.२६ तथा व्यापार १.०१ प्रतिशत बढेको छ ।
तीनवटा कम्पनीको सेयरमूल्य १० प्रतिशत बढेको छ । १० प्रतिशत बढेका कम्पनीमा ट्रेड टावर, सान्भी इनर्जी र शिवम् सिमेन्ट रहेका छन् । ट्रेड टावर र सान्भी इनर्जी नयाँ कम्पनी हो । यस्तै, उन्नति सहकार्य लघुवित्तको ९.९० प्रतिशत, विन्ध्यबासिनी हाइड्रोपावरको ९.७६, सोनापुर सिमेन्टको ८.७७, इनिफिनिटी लघुवित्तको ८.३६ प्रतिशत सेयरमूल्य बढेको छ ।
यसदिन बोटलर्स नेपाल बालाजुको २.४६ प्रतिशत, ग्रिन डेभलपमेन्ट बैंकको २.१९ प्रतिशत र पन्चकन्या माइ हाइड्रोपावरको २.०३ प्रतिशतले सेयर मूल्य घटेको छ । धेरै कारोबार भएका पाँच कम्पनीमा नेपाल पुनर्बीमा, शिवम् सिमेन्ट, हिमालयन रिइन्स्योरेन्स, बुटवल पावर र ङादी ग्रुप रहेका छन् ।
यसदिन बजारको पूँजीकरण (सूचीकृत सबै सेयरको बजार मूल्य) ४९ खर्ब ६२ अर्ब रुपैयाँ पुगेको छ । सेयर बजारको यो आकार हालसम्मकै सबैभन्दा ठूलो हो । बजार बढ्दै जाँदा अब पूँजीकरणमा दैनिक नयाँ रेकर्ड बन्दै जाने सम्बन्धीत लगानीकर्ताहरु तथा सरोकारवालाहरुको अनुमान छ ।