५ साउन/अर्थ र व्यापार – यस साताको दोस्रो कारोबार दिन सोमबार सेयर बजारको सबै सूचकमा हरियाली छाएको छ । यसदिन सेयर बजारको परिसूचक नेप्से अघिल्लो दिनको तुलनामा २१ दशमलब ७६ अंकले बढेर २८ सय ९२ दशमलब ७२ विन्दूमा कायम भएको छ । यो अंक गत वर्षको ९ भदौयताकै उच्च हो । सो दिन नेप्से २८ सय ९४ अंकमा थियो । सबै उपसमूहको सेयरमुल्य बढेका कारण यसदिन सेयरबजार विगत ११ महिनायताकै उच्च विन्दुमा पुगेको छ ।
अघिल्लो दिनको तुलनामा कारोबार रकम भने केही घटेको छ । अघिल्लो दिन २१ अर्ब ४६ करोडको कारोबार भएकोमा यसदिन १६ अर्ब ३२ करोड ७१ लाख १५ हजार २ सय ३८ रूपैयाँको सेयर कारोबार भएको छ ।
बजारको आकार (सबै सूचीकृत सेयरको बजार मूल्य) मा भने नयाँ रेकर्ड बनेको छ । बजारको पूँजीकृत रकम (आकार) ४८ खर्ब २६ अर्ब ९९ करोड ८६ लाख ९ सय ५९ रुपैयाँ पुगेको छ । यसअघि गत १८ फागुनमा ४७ खर्ब ९९ अर्बको रेकर्ड बनेको थियो ।
सोमबार १ सय ५३ वटा कम्पनीको सेयरमूल्य बढेको छ । ९६ वटा कम्पनीको सेयरमूल्य घटेको छ । माइक्रोफाइनान्स उपसमूहको सबैभन्दा धेरै १ दशमलब ९३ प्रतिशतले बढेको छ । बैंकिङ उपसमूहको शून्य दशमलब ४८ प्रतिशत, विकास बैंक उपसमूहको १ दशमलब ४२ प्रतिशत , होटल तथा पर्यटन उपसमूहको शून्य दशमलब ३० प्रतिशत, हाइड्रोपावर उपसमूहको शून्य दशमलब ४६ प्रतिशतले बढेको छ ।
लगानी उपसमूहको शून्य दशमलब ३७ प्रतिशत, जीवन बीमा उपसमूहको शून्य दशमलब ०२ प्रतिशत, उत्पादन तथा प्रशोधन उपसमूहको शून्य दशमलब ३७ प्रतिशत, निर्जीवन बीमा उपसमूहको १ दशमलब २७ प्रतिशत, अन्य उपसमूहको १ दशमलब ८४ प्रतिशत र व्यापार उपसमूहको शून्य दशमलब ४३ प्रतिशतले मुल्य बढेको छ ।
तीन वटा कम्पनीको मूल्य १० प्रतिशत बढेको छ । १० प्रतिशत बढेका कम्पनीमा थ्रीस्टार हाइड्रोपावर, ट्रेड टावर र सान्भी इनर्जी रहेका छन् । उन्नति सहकार्य लघुवित्तको ९ दशमलब ४० प्रतिशत, फस्र्ट माइक्रोफाइनान्सको ८ दशमलब ९९ प्रतिशतले सेयरमूल्य बढेको छ ।
तीन वटा कम्पनीको सेयरमूल्य १० प्रतिशतले घटेको छ । १० प्रतिशत घटेका कम्पनीमा ग्रिन डेभलपमेन्ट, सप्तकोशी डेभलपमेन्ट र कर्पोरेट डेभलपमेन्ट बैंक छन् । सिन्धु विकास बैंकको मूल्य ६.३६ प्रतिशत घट्यो । यसदिन धेरै कारोबार भएका कम्पनीमा नेपाल पुनर्बीमा, हिमालयन रिइन्स्योरेन्स, बुटवल पावर, फस्र्ट माइक्रोफाइनान्स र लुम्बिनी विकास बैंक रहेका छन् ।