२९ असार/अर्थ र व्यापार – यस साताको पहिलो कारोबार दिन आइतबार सेयर बजार परिसूचक नेप्से २९ अंकले बढेर २७ सय ६० दशमलब ८० विन्दुमा कायम भएको छ । नेपाल राष्ट्र बैंकले गत शुक्रबार सार्वजनिक गरेको मौद्रिक नीतिपछि सेयर बजारमा उछाल देखिएको छ ।
यसदिन बजार खुलेको १ मिनेटमै ६६ अंकले नेप्से बढेको थियो । सो बृद्धि दिनभर टिक्न सकेन । बजार खुल्नेपछिको केही मिनेट नेप्से ह्वात्तै बढेर २७ सय ९७ अंकसम्म पुगेको थियो । तर, बजारमा बिक्री चाप बढेपछि नेप्से घटेर केही तल पुगेको हो ।
अघिल्लो दिनको तुलनामा सेयर बजारमा कारोबार रकम उल्लेख्य बढेको छ । अघिल्लो दिन ९ अर्ब ६८ करोडको कारोबार भएकोमा यसदिन ११ अर्ब ४१ करोड ६४ लाख २८ हजार ४ सय ६७ रुपैयाँको सेयर कारोबार भएको छ ।
आइतबार १ सय ५८ वटा कम्पनीको सेयरमूल्य बढेको छ । ९० वटा कम्पनीको सेयरमूल्य घटेको छ । यसदिन पनि सबैभन्दा धेरै बैंकिङ र माइक्रोफाइनान्स उपसमूहको सेयरमूल्य बढेको छ । माइक्रोफाइनान्स उपसमूहको ३ दशमलब ५० प्रतिशत र बैंकिङ उपसमूहको ३ दशमलब ३७ प्रतिशतले सेयरमूल्य बढेको छ ।
अहिले राष्ट्र बैंकले माइक्रोफाइनान्स कम्पनीलाई लाभांश वितरणमा लगाइएको १५ प्रतिशतको सीमामा पुनरावलोकन गर्नेगरी मौद्रिक नीतिमा सम्बोधन गरेको छ । जसले गर्दा यो उपसमूहको सेयरमूल्य सबैभन्दा धेरै बढेको छ । त्यस्तै बैंकको आधार दर गणनालाई यथार्थपरक बनाउने मौद्रिक नीतिमा भनिएपछि यसले बैंकिङ उपसमूहको सेयरमूल्य बढाउन बल पुगेको देखिन्छ ।
यसदिन विकास बैंक उपसमूहको १ दशमलब ४७ प्रतिशत, फाइनान्स उपसमूहको १ दशमलब ८७ प्रतिशत, होटल तथा पर्यटन उपसमूहको शून्य दशमलब ४८ प्रतिशत, जीवन बीमा उपसमूहको शून्य दशमलब ०२ प्रतिशत, उत्पादन तथा प्रशोधन उपसमूहको शून्य दशमलब ३१ प्रतिशतले सेयरमूल्य बढेको छ ।
हाइड्रोपावर उपसमूहको शून्य दशमलब ८३ प्रतिशत, लगानी उपसमूहको शून्य दशमलब ०८ प्रतिशत, निर्जीवन बीमा उपसमूहको शून्य दशमलब ३४ प्रतिशत, अन्य उपसमूहको शून्य दशमलब २७ प्रतिशत र व्यापार उपसमूहको शून्य दशमलब २६ प्रतिशतले सेयरमूल्य घटेको छ ।
सबैभन्दा धेरै एनआईसी एसिया बैंक र खानीखोला हाइड्रोपावरको सेयरमूल्य १० प्रतिशतले बढेको छ । जीवन विकास लघुवित्तको ९ दशमलब ६१ प्रतिशत, नेस्डो समृद्धि लघुवित्तको ७ दशमलब ३० प्रतिशत , समाज लघुवित्तको ६ दशमलब ५० प्रतिशतले सेयर मूल्य बढेको छ ।
यसदिन हिमालयन हाइड्रोपावरको सेयरमूल्य सबैभन्दा धेरै १० प्रतिशतले घटेको छ । राप्ती हाइड्रोको ७ दशमलब ३४ प्रतिशत, भगवती हाइड्रोको ६ दशमलब ९३ प्रतिशत र पन्चकन्यामाइ हाइड्रोको ५ दशमलब ३६ प्रतिशतले घटेको छ ।
यसदिन धेरै कारोबार भएका कम्पनीहरूमा एनआईसी एसिया बैंक, बुटवल पावर, एनआरएन इन्फ्रास्ट्रक्चर, सानिमा बैंक र सीईडीबी होल्डिङ्स रहेका छन् ।