१० वैशाख/अर्थ र व्यापार – यस साताको चौथो कारोबार दिन बुधबार पनि सेयर बजारको ओरालो यात्रा कायमै रहेको छ । लगातार चौथो कारोबार दिन सेयर बजार परिसूचक थप ३२ दशमलब ३८ अंकले घटेको छ । सो गिरावटपछि नेप्से परिसूचक २६ सय ५५ दशमलब ९४ विन्दुमा झरेको छ ।
यसदिन बजार घट्दा कारोबार रकम पनि घटेको छ । अघिल्लो दिन ८ अर्ब ३२ करोड रुपैयाँको कारोबार भएकोमा यसदिन जम्मा ७ अर्ब ५७ करोड ५५ लाख १७ हजार २ सय ४६ रुपैयाँको सेयर कारोबार भएको छ ।
२ सय १७ वटा कम्पनीको सेयर मुल्य घटेको छ भने एउटाको स्थिर रहेको छ । २८ वटा कम्पनीको सेयर मूल्य मात्र बढेको छ । यसदिन सबैभन्दा धेरै विकास बैंक उपसमुहको सेयर मुल्य २ दशमलब ०९ प्रतिशतले घटेको छ ।
बैंकिङ उपसमुहको १ दशमलब २३ प्रतिशत, फाइनान्स उपसमुहको १.१५ प्रतिशत , होटल तथा पर्यटन उपसमुहको १.०१ प्रतिशत , हाइड्रोपावर उपसमुहको १.७८ प्रतिशत, लगानी उपसमुहको १.७६ प्रतिशत , जीवन बीमा उपसमुहको ०.४५ प्रतिशत , माइक्रोफाइनान्स उपसमुहको १.०४ प्रतिशत , निर्जीवन बीमा उपसमुहको ०.९७ प्रतिशत , अन्य उपसमुहको १.५० प्रतिशत र व्यापार उपसमुहको सुन्य दशमलब ३० प्रतिशतले सेयर मुल्य घटेको छ ।
बुधबार धेरै कारोबार भएका कम्पनीमा राधि विद्युत्, एनआरएन इन्फ्रास्ट्रक्चर, ङादी ग्रुप, सानिमा माइ हाइड्रोपावर र एचआईडीसीएल रहेका छन् । यसदिन उत्पादन उपसमुहको सामान्य बढेको छ । दुई कम्पनी नेपाल माइक्रो इन्स्योरेन्स र क्रेस्ट माइक्रोलाइफ इन्स्योरेन्सको सेयर मूल्य १० प्रतिशतले बढ्यो । राधि विद्युतको ४ दशमलब ३३ प्रतिशत, र विन्ध्यबासिनी हाइड्रोपावरको २ दशमलब ७० प्रतिशतले सेयर मुल्य बढ्यो ।
सम्बन्धीत लगानीकर्ता एवं सेयर विस्लेषकहरुले यो साता लगातार चार सेयर बजार घट्नुका पछाडि विशेषगरि ३ वटा कारण देखिएको बताएका छन् । उनीहरुका अनुसार पहिलो कारणमा बैंकहरुको कमजोर वित्तीय विवरण नै रहेको छ । अहिले अधिकांश बैंक वित्तिय संस्थाले आइतबार सार्वजनिक गरेको वित्तीय विवरण कमजोर देखिएपछि त्यसयता सेयर बजार घटिरहेको छ । दोस्रोमा विभिन्न पक्षको आन्दोलनले पनि सेयर लगानीकर्तामा मनोवैज्ञानिक नकारात्म असर पारेको छ । तेस्रोमा नेपाल राष्ट्र बैंकको गभर्नर नियुक्ति प्रक्रिया थप गिजोलिएपछि लगानीकर्ता सशंकित बनेका छन् ।
नयाँ गभर्नर नियुक्तिका लागि गठन भएको सिफारिस समितिका एक सदस्य पूर्व गभर्नर विजयनाथ भट्टराईले समितिबाट राजीनामा दिएपछि लगानीकर्ताबीच अब के हुने हो भन्ने अन्यौलता बढेका कारण अहिले सेयर बजार घटेको अनुमान उनीहरुको छ ।