२ बैशाख/अर्थ र व्यापार – नयाँ वर्ष २०८२ सालको पहिलो कारोबार दिन मंगलबार लगानीकर्तालाई सेयर बजार बढेर राम्रो स्वागत गरेको छ । यसदिन सेयर बजारको परिसूचक नेप्से २७ दशमलब १४ अंकले बढेको छ । सो अंकको वृद्धिपछि यसदिन नेप्से २६ सय ८९ दशमलब २२ विन्दुमा कायम भएको छ । नयाँ वर्षको पहिलो कारोबार दिन बिहान बजार खुलेदेखि नै क्रमशः नेप्से उकालो लागेर दिउँसो १ ः ५४ बजे २७ सय ०४ विन्दुसम्म पुगेको थियो, त्यो अंक पहिलो कारोबार दिनकालागि नै अधिकतम अंक रह्यो ।
यसदिन सेयर बजारको परिसूचक नेप्सेसँगै कारोबार रकममा पनि उल्लेख्य बृृद्धि भएको छ । अघिल्लो कारोबार दिन ६ अर्ब २८ करोडको कारोबार भएकोमा मंगलबार ८ अर्ब ५४ करोड ४३ लाख ५७ हजार ८ सय ८७ रुपैयाँको सेयर कारोबार भएको छ ।
यसदिन २१२ वटा कम्पनीको सेयर मूल्य बढेको छ । ३४ वटा कम्पनीको सेयर मुल्य घटेको छ । यसदिन लगानीकर्ताबीच विकास बैंक र लगानी उपसमुहमा विशेष आकर्षण देखिएको छ । लगानी उपसमुहको सेयर मुल्य २ दशमलब ७१ प्रतिशत र विकास बैंक उपसमुहको २ दशमलब ४६ प्रतिशतले सेयर मुल्य बढेको छ । बैंकिङ उपसमुहको सुन्य दशमलब ४८ प्रतिशत , फाइनान्स उपसमुहको १.५९ प्रतिशत , होटल तथा पर्यटन उपसमुहको १.९९ प्रतिशत , हाइड्रोपावर उपसमुहको १.४७ प्रतिशत , जीवन बीमा उपसमुहको ०.८१ प्रतिशत, उत्पादन उपसमुहको १.२२ प्रतिशत, माइक्रोफाइनान्स उपसमुहको ०.६० प्रतिशत, निर्जीवन बीमा उपसमुहको १.०७ प्रतिशत र अन्य उपसमुहको सेयर मुल्य ०.६१ प्रतिशतले बढेको छ ।
यसदिन व्यापार उपसमुहको सेयर मुल्य सुन्य दशमलब ६४ प्रतिशतले घटेको छ । पाँचवटा कम्पनीको सेयर मूल्य १० प्रतिशतले बढेको छ । कर्पोरेट डेभलपमेन्ट बैंक, ग्रिन डेभलपमेन्ट बैंक, सप्तकोशी विकास बैंक, नेपाल माइक्रो इन्स्योरेन्स र क्रेस्ट माइक्रोलाइफ इन्स्योरेन्सको मूल्य १० प्रतिशत बढेको छ ।
बलेफी हाइड्रोपावरको मूल्य ९.६९ प्रतिशत घट्यो । विन नेपाल लघुवित्तको ६.१७ तथा आत्मनिर्भर लघुवित्तको ३.७१ प्रतिशत मूल्य घट्यो । धेरै कारोबार भएका कम्पनीहरुमा बलेफी हाइड्रोपावर सबैभन्दा अगाडि रहेको छ । त्यसपछि एनआरएन इन्फ्रास्ट्रक्चर, राधि विद्युत्, सीईडीबी होल्डिङस् र हिमालयन रिइन्स्योरेन्स कम्पनीको धेरै सेयर कारोबार भएको छ ।