२४ फागुन/अर्थ र व्यापार – नवनियुक्त अर्थमन्त्री वर्षमान पुनले अर्थ मन्त्रालयमा पुगेर पदभार ग्रहण गरेको पहिलो दिन बिहीबार सेयर बजार सकारात्मक रुपमा बढेको छ । नयाँ गठबन्धन सरकारको नयाँ अर्थमन्त्री नियुक्तिपछिको पहिलो कारोबार दिन बिहीबार नेप्से परिसूचक सकारात्मक भएर बन्द भएको थियो ।
यसअघि देसमा उत्पन्न राजनीतिक अन्यौलताकाबीच उतारचढाव भइरहेको सेयर बजार नयाँ अर्थमन्त्रीको नियुक्तिसँगै सम्हालिएको हो।
बिहीबार नेप्से परिसूचक १३.५१ अंकले बढेर २०३०.५५ विन्दुमा पुगेको छ । यसैगरी, यस दिन सेन्सेटिभ इण्डेक्स १.९० अंकले बढेको छ भने फ्लोट इण्डेक्स ०.९८ अंक र सेन्सेटिभ फ्लोट इण्डेक्स ०.६४ अंकले बढेको छ।

नेप्से बढेपनि यस दिन कारोबार रकम पनि सामान्य घटेको छ। अघिल्लो कारोबार दिन करिब साढे ३ अर्बको सेयर खरिदबिक्री भएको बजारमा यस दिन ३०९ स्टकको ४७ हजार ६९९ पटकको कारोबारमा ३ अर्ब १९ करोड ९२ लाख रुपैयाँ बराबरको ८९ लाख २९ हजार कित्ता सेयर खरिदबिक्री भएको थियो ।

बिहीबार पिपुल्स हाइड्रोपावर कम्पनी लिमिटेडको सेयर १० प्रतिशत बढेर कारोबार भएको थियो । यसदिन चिरख्वा हाइड्रोपावरको शेयरमूल्य करिब ९ प्रतिशत बढेको थियो भने मध्य भोटेकोशीको शेयरमूल्य ६ प्रतिशतभन्दा बढी बढेको थियो ।
कारोबार रकमका आधारमा बिहीबार नेपाल पुनर्बीमा कम्पनीको संस्थापक शेयर शीर्ष स्थानमा रहेको थियो । सो कम्पनीको यस दिन ५६ करोड २० लाख रुपैयाँ बराबरको संस्थापक शेयर कारोबार भएको थियो । यसैगरी, यस दिन शिवम् सिमेन्ट्सको करिब साढे १६ करोडको शेयर कारोबार भएको थियो भने सोनापुर मिनरल्सको करिब साढे १३ करोडको शेयर किनबेच भएको थियो ।
१३ उपसमूहमध्ये यसदिन १० उपसमूहको परिसूचक बढेको थियो भने ३ उपसमूहको परिसूचक घटेको थियो । बिहीबार निर्जीवन बीमा उपसमूहको परिसूचक सर्वाधिक १.५६ प्रतिशत बढेको थियो । जलविद्युत उपसमूहको परिसूचक १ प्रतिशतभन्दा बढी बढेको थियो । कारोबारमा आएका होटल तथा पर्यटन, म्युचुअल फण्ड र व्यापार उपसमूहको परिसूचक यस दिन घटेको थियो ।
समग्रमा बिहीबारको सेयर कारोबारमा तीव्र उतारचढाव देखियो । दिनभर उतारचढाव देखिएको बजारमा सेयर मूल्य मापक नेप्से परिसूचक १३.५१ अंकले बढेको हो । बुधबारको तुलनामा बिहीबारको परिसूचक ०.६७ प्रतिशतले बढेर २०३०.५५ बिन्दुमा पुगेको थियो ।
बिहीबारको कारोबार भने जम्मा ३ अर्ब १९ करोडमा सीमित भएको थियो । बिहीबार कारोबारमा आएका कम्पनीमध्ये नेपाल रिइन्स्योरेन्सको सबैभन्दा बढी रकमको संस्थापक सेयर किनबेच भएको थियो । सो कम्पनीको एकैदिन ५६ करोड २० लाख रुपैयाँ बराबरको संस्थापक सेयर कारोबार भएको थियो ।
यसदिन बजारमा १७६ कम्पनीको सेयर मूल्य बढेको थियो भने ५९ कम्पनीको सेयर मूल्य घटेको थियो । बिहीबार तीन समूह राता देखिएका थिए भने बाँकी समूहमा हरियाली छाएको थियो ।