९ भदौ/अर्थ र व्यापार – सेयर बजार सूचक मापक नेप्से बिहीबार ०.८९ प्रतिशत अर्थात १८.२९ अंकले घटेर २०३९.५५ बिन्दुमा झरेको छ । यस्तै ठूला कम्पनीको कारोबार सूचक मापक सेन्सेटिभ इन्डेक्स पनि ३.७८ अंकले घटेर ३९४.५१ बिन्दुमा झरेको छ ।
कारोबारमा आएका सबै १३ वटै उपसमुहगत सूचक घटेपछि समग्र बजार घटेको हो । आज २१९ कम्पनीको ४२ लाख ३४ हजार ११७ कित्ता सेयर ३२ हजार ९४४ वटा संख्यामा खरिद बिक्री भएको छ ।
बजार घटेपनि आन कारोबार रकम भने बढेको छ । बुधबार १ अर्ब ५२ करोडको सेयर कारोबार भएकोमा बिहीबार कारोबार रकम १९ करोड रुपैयाँले बढेको हो । आज कूल १ अर्ब ७१ करोड ७४ लाख ६९ हजार ६७० रूपैयाँ बराबरको कारोबार भएको नेप्सेले जनाएको छ ।
बिहीबार दोहोरो अंकले नेप्से घटेपछि लगानीकर्ताहरू ‘पर्ख र हेर’ को अवस्थामा पुगेका छन् । सूचीकृत कम्पनीहरुले लाभांश सिजन सुरु हुने यस समयमा बजार घट्दा लगानीकर्ताहरु भोलिका दिन बजार कता जाला भन्ने औन्यलता सिर्जना हुँदा ‘पर्ख र हेर’ को अवस्थामा रहेका हुन् ।
नेप्सेका अनुसार कारोबार भएका कूल १३ उपसमूहमध्ये सबै उपसमूहगत सूचक घटेका छन् । सबैभन्दा धेरै अन्य २.२२ प्रतिशत घटेको छ । फाइनान्स २.०७ प्रतिशतले घट्दा जलविद्युत, विकास बैंक, होटल तथा पर्यटनमुलक र ब्यापार सूचक १ प्रतिशत बढीले घटेको छ ।
बिहीबार हिमाल दोलखा हाइड्रोपावर कम्पनीको सर्वाधिक कारोबार भएको छ । कम्पनीको संस्थापक सेयरको लकइन पिरियड सकिएपछि कारोबार रकममा उछाल आएको हो । बिहीबार कम्पनीको ११ करोड २४ लाख ६५ हजार रूपैयाँ बराबरको कारोबार भएको छ ।
यस्तै रिडी हाइड्रोपावर। नेष्डो समृद्ध लघुवित्त, अरुण काबेली पावर, राधी जलविद्युत कम्पनी, अपि पावर, हिमालयन डिष्टिलरी, शिवम् सिमेन्ट, जाल्पा लघुवित्त र नबिल बैंक शीर्ष दश कारोबार हुने कम्पनीमा समेटिएका छन् । दशौं ठूलो कारोबार भएको ३ करोड २३ लाख रुपैयाँको सेयर कारोबार भएको छ ।
अपर हेवाखोला हाइड्रोपावर कम्पनी लिमिटेडको सेयरमूल्यमा आज सकारात्मक सर्किट लागेको छ । कम्पनीको सेयरमूल्य ९.९९ प्रतिशतले बढेर ३६४.४० रूपैयाँ पुगेको छ । रुरु जलविद्युत कम्पनीको ८.९३ प्रतिशत र नेष्डो समृद्धिको २ प्रतिशतले मूल्य बढेको छ ।
बिहीबार मैलुङ खोला जलविद्युत कम्पनीको सेयरमूल्य सबैभन्दा धेरै ५.८२ प्रतिशतले घटेर ४६९ रूपैयाँमा झरेको छ । यस्तै मल्टिपर्पस फाइनान्स ४.२७, खानीखोला हाइड्रोपावर ४.१८ र सूर्योदय वोमी लघुवित्तको सेयरमूल्य ४.०९ प्रतिशतले घटेको छ ।
दोर्दीखोला जलविद्युत, छ्याङ्दी हाइड्रोपावर, न्यादी हाइड्रोपावर, रिभर फल्स पावर, गुहेश्वरी मर्चेन्ट बैंकिङ्ग र ओरियन्टल होटलको सेयरमूल्य साढे ३ प्रतिशत बढीले घटेको छ ।