२ असोज / अर्थ र व्यापार – २०७२ बैशाखमा गएको भुकम्पपछि बालाजु बाइसधारा पार्कको शोभा हराएको छ । बाईसधाराको मुहार फेर्ने गरी काठमाडौं महानगरपालिकाले नयाँ योजना बनाइरहेको छ । योजना अनुसार काम भएमा बाइसधारा छिट्टै नै लोभलाग्दो पर्यटकीय पार्क बन्नेछ ।

महानगरपालिकाले ३० लाख रुपैयाँ खर्चेर पार्ककालागि  मास्टर प्लान बनाउन सुरु गरेको छ । मंसिरसम्म पार्कका लागि आवश्यक बृहत प्लान बन्छ र ठेक्का मार्फत निर्माण कार्य अघि बढाइनेछ । पार्कको डिजाइन समेत मंसिरसम्ममा बन्ने भएकाले अहिले नै पार्क यस्तै बन्छ भन्न नसकिने तर प्रारम्भिक योजनाअनुसार सुविधा सम्पन्न आधुनिक भौतिक संरचना भएको पार्क बन्ने छ । 

काठमाडौंका मेयर विद्यासुन्दर शाक्यले पदबहाली गरेको सय दिनमा पत्रकार सम्मेलन मार्फत बालाजु लगायतका पार्कहरुलाई फ्रि वाइफाइ जोन बनाउने दावी गरेका थिए । त्यसैगरी मेयर शाक्यले उद्यानहरुको मर्मत,सम्भारको काम तिव्र गतिमा अघि बढाइएको  र उचित बजेट समेत छुट्याएको बताएका थिए ।

भुकम्पले क्षति पुर्याएको बालाजु पार्कको पूनर्निर्माण धमाधम भैरहेको छ । २ करोड रुपैयाँको लागतमा पुनर्निर्माणको काम भैरहेको छ । पहिलो चरणमा पार्कको वरिपरिको भत्किएको कम्पाउण्डको पुनर्निर्माण  सकिएको छ । त्यस्तै उप्किएका ट्रायलहरु मर्मत र क्षति पुगेका ठाउँहरुको मर्मत समेत लगभग सकिन लागेको छ । आर्थिक बर्ष २०७४/०७५ कालागि पनि महानगरले उद्यान मर्मत सम्भारका लागि २ करोड ११ लाख ५० हजार रुपैयाँ छुट्याएको छ ।

त्यसैगरी पार्कभित्र स्विमिङ पुलको निर्माण अन्तिम चरणमा पुगेको छ । निर्माण सम्पन्न भएपछि उक्त स्विमिङ पुल कुनै फाइभ स्टार होटलको भन्दा कम नहुने छ । स्विमिङ पुलको वरिपरि हरियाली बगैंचा निर्माण तथा आकर्षक खालका संरचनाहरु बनाएर स्विमिङ पुललाई स्तरीय बनाउने कार्य भैरहेको छ ।

पहिलो चरणमा बाटोमा धुलो नउड्ने गरी स्तरीय पिकनिक स्पट तयार पारिएको र दोस्रो चरणमा भएका सबै पिकनिक स्पटलाई त्यस्तै बनाइने छ । शहरी क्षेत्रभित्र रहेका पार्कहरुलाई संरक्षण गरेर आकर्षक, सुविधायुक्त र मनमोहक बनाउनका लागि  महानगरले बाइसधारा पार्कको छुट्टै गुरुयोजना तयार पार्न लागेको हो । 

बालाजु पार्कको स्वामित्वमा १ सय ६२ रोपनी जग्गा छ । अब सबै जग्गालाई सदुपयोग गर्ने र आन्तरिक पर्यटन गन्तव्यमका रुपमा विकास गरिने छ । वर्षा र चाडपर्व नजिकिँदा काममा केही ढिलाई भैरहेको छ । तिनकुने, रानीपोखरी, बालाजु लगायतका पार्ककालागि महानगरले प्राथमिकतामा राखेर काम अघि बढाउन लागेको हो ।