२१ फागुन/ अर्थ र व्यापार  - त्रिपुरेश्वर – नागढुङगा सडकको ५० प्रतिशत कालोपत्रे पुरा भएको छ । काठमाडौं उपत्यका सडक विस्तार आयोजनाका अनुसार त्रिपुरेश्वबाट कलङ्की हुँदै नागढुङगासम्म पुग्ने १२.५ किलोमिटर सडक खण्डको करिव ६ किलोमिटर कालोपत्रे पुरा भएको हो । अहिले कलङ्की चोकबाट कालीमाटीतिरको भागमा धमाधम कालोपत्रे भइरहेको छ भने कलङ्कीबाट नागढुङगातिरका अधिकांश बाँकी ठाउँहरुमा कालोपत्रे गर्ने तयारी भइरहेको आयोजनाका सिनियर डिभिजनल इन्जिनियर (सिडिई) विश्वविजयलाल श्रेष्ठले जानकारी दिए । 

मुआब्जा विवादका कारण पुरा हुनुपर्ने समयावधीसम्म एक तिहाई काम बल्लतल्ल भएपछि सर्वसाधरणले सडक विस्तारका नाममा धुवाँ, धुलो र सास्ती पाएको भन्दै यथास्थितिमा कालोपत्रे गर्ने निर्णय भएको थियो । तत्कालै जहाँ जती ठाउँ उपलब्ध छ त्यहाँ त्यति नै भाग कालोपत्रे गर्ने र सडक विस्तारको काम पनि जारी राख्ने गरि काम भइरहेको आयोजनाले जनाएको छ । उपलब्ध ठाउँअनुसार कालोपत्रे गर्न सुरु गरिएको भएपनि सडक विस्तार भने नरोकिने सिडिई श्रेष्ठले बताए ।

आयोजनाका अनुसार आगामी बैशाखसम्ममा कालोपत्रे पुरा गर्ने गर्ने लक्ष्य राखिएको छ । कालोपत्रे गर्नुअघि पुर्वाधार तयार पार्नका लागि समय लाग्ने हो । कालोपत्रे सकेपछि जेठमा सडकको लेन छुट्याउने पेन्टिङ गर्ने लगायतका फिनिसिङका काम गर्ने तयारी गरिएको आयोजनाले जनाएको छ । आयोजनाले सडक निर्माण समयमा नै सक्ने भन्दै चार बर्षअघि चार प्याकेज बनाएर ठेक्का लगाएको थियो । त्रिपुरेश्वरदेखि कलङ्की ३.३८०  किलोमिटरको पहिलो प्याकेज बज्रगुरुरविरुवार सिएम जेभीले पाएको छ । जसको ६० प्रतिशत भौतिक प्रगति रहेको आयोजनाले जनाएको छ । अहिले यो खण्डमा धमाधम कालोपत्रे भइरहेको छ । 

दोस्रो कलङ्कीदेखि सतुङगल तीन किमीको प्याकेज शर्मार शैलुङर कान्छाराम जेभीले पाएको छ । यो खण्डमा पनि कालोपत्रे भइरहेको छ भने केहि भागमा वेसमेन्ट तयारीको काम भइरहेको छ । सतुङगलदेखि त्रिभुवन पार्क तेस्रो प्याकेजको जिम्मा लुम्विनी र शैलुङरसाप जेभीले पाएको छ । तीन किलोमिटर यो खण्डमा पनि धमाधम कालोपत्रे गर्नका लागि वेसमेन्ट तयार पार्ने काम भैरहेको आयोजनाले जनाएको छ । त्रिभुवनपार्कदेखि नागढुङगासम्मको अन्तिम प्याकेज शर्मार शैलुङर कान्छाराम जेभीले पाएको छ। ३.१०० किमीको यो खण्ड लगभग तयार हुने अवस्थामा रहेको छ ।