२१ माघ/ अर्थ र व्यापार - त्रिभुवन विमानस्थल भन्सार कार्यालयले विदेशबाट घर फर्कँदा नेपालीले ल्याएको मदीरा जफत गरेर लिलामीमा राखेको छ । भन्सारले जफत गरेको मदीराको ब्राण्ड भने खुलाएको छैन । इच्छुकहरुले फागुन ६ गतेसम्म मदीरा बोलकबोलमार्फत उठाउन सक्नेछन् । भन्सारले मदीराका साथै आइफोन, यार्सागुम्बा, ट्रेकिङ जुत्ता, मोटर ट्रान्सफरमर, कुर्तासुरुवाल, ड्रोन क्यामेरा, लिथिनियम ब्याट्री, स्मार्ट वाच, कार्बनको मोबाइल, मार्लबोरो चुरोट लिलामीमा राखेको छ । 

मदीराको लिलामी सात वटा लटमा निष्कासन गरेको छ । भन्सारले कुल २ हजार ९ सय १७ बोतल मदिरा लिलामीमा राखेको छ । यसको कुल मूल्य ६१ लाख ६१ हजार ५५८ रुपैयाँ तोकिएको छ । जसले बढि मूल्य हाल्छ उसले मदीरामा दावी गर्न पाउने छ । पहिलो लटमा १७५ बोतल मदिराको आधार मूल्य ३ लाख १६ हजार ३२५ रुपैयाँ कायम गरिएको छ । दोस्रो लटको २६६ बोतलका लागि ५ लाख ६१ हजार ५ सय रुपैयाँ कायम गरिएको छ । तेस्रो लटको ३१७ बोतलका लागि ६ लाख ६३ हजार ७८० रुपैयाँ कायम गरिएको छ ।

चौथो लटको ४६९ बोतलका लागि १० लाख ६५ हजार ४२५ रुपैयाँ आधार मूल्य तय गरिएको छ । पाँचौ लटको ५८४ बोतलका लागि १२ लाख ७३ हजार ६७८ रुपैयाँ मूल्य तय गरिएको छ भने छैठौ लटको ८४१ बोतलका लागि १८ लाख ६२ हजार १७५ रुपैयाँ मूल्य तोकिएको छ । अन्तिम लट २६५ बोतलका लागि ४ लाख १८ हजार ६७५ रुपैयाँ आधार मूल्य तय गरिएको छ ।

आइफोन सिक्स र आइफोन सिक्स प्लस २६ थानको मूल्य ६ लाख २४ हजार तय गरिएको छ । ७२६ ग्राम यार्सागुम्बाको मूल्य ८ लाख रुपैयाँ तय गरिएको भन्सारले जनाएको छ । यसैगरी १४ सय ४० जोर ट्रेकिङ जुत्ताको मूल्य पाँच लाख रुपैयाँ तोकिएको छ । मोटर ट्रान्सफरमर तीन सेटको मूल्य ८ लाख रुपैयाँ र भरेको कुर्तासुरुवाल ९ आइटमको आधार मूल्य ६ लाख ९० हजार रुपैयाँ कायम गरिएको छ ।

इएफटी पिओएस टर्मिनल ५०० थानको मूल्य ७२ लाख रुपैयाँ तोकिएको छ । तीन थान फ्यानटम फोर एडभान्स ड्रोन क्यामेरा, ३६० थान लिथिनियम ब्याट्री, १५ सय ८३ स्मार्ट वाच, कार्बन जम्बो के९ मबाइल १९ सय ८० थान, कार्बन के ८५५ मोबाइ ४०० थान र मार्बबोरो १७ हजार डब्बा चुरोको मूल्य एकमुस्ट ४५ लाख रुपैयाँ तोकिएको छ भने क्रिकेट ह्न्डब्याक १५० थानको मूल्य १० हजार रुपैयाँ तोकिएको छ । भन्सारले मदिरासहित कुल २ करोड १२ लाख रुपैयाँ बराबरको मूल्यांकन गरी जफत गरिएका सामग्री लिलामीमा राखेको हो ।