१९ चैत्र /अर्थ र व्यापार - राष्ट्रिय गौरवका आयोजनाले चालु आर्थिक वर्षको दोस्रो चौमासिक सकिँदा विनियोजित बजेटको एक तिहाई रकम मात्रै खर्च गरेका छन् । महालेखा नियन्त्रकको कार्यालयले तयार गरेको गौरवका आयोजनाको खर्च विवरणअनुसार फागुन मसान्तसम्ममा ती आयोजनामा विनियोजित बजेटको ३४.५ प्रतिशत रकम खर्च भएको छ । कार्यालयका अनुसार यो अवधिमा विनियोजित ८७ अर्ब ४९ करोड रुपैयाँमध्ये ३० अर्ब २० करोड रुपैयाँ बराबरको खर्च  भएर भूक्तानी भएको छ । वर्षको पहिलो ६ महिनामा करिब २८ प्रतिशत रकम भूक्तानी भएको थियो । पछिल्लो दुई महिनामा ७ प्रतिशत विन्दूले खर्च बढेको छ । पुससम्ममा सरकारले २६ अर्ब रुपैयाँ खर्च गरेकोमा थप दुई महिनामा ८ अर्ब रुपैयाँ भूक्तानी दिइएको छ । 

कार्यालयले तयार गरेको विवरणअनुसार ठूला पूर्वाधार आयोजनामा अहिले खर्च बढेको छ । सडक तथा हवाई यातायातका पूर्वाधारमा सरकारी खर्च बढेको महालेखा नियन्त्रकको तथ्यांकमा उल्लेख गरिएको छ । कार्यालयका अनुसार सबैभन्दा राम्रो प्रगति भैरहवा विमानस्थल (दक्षिण एसियाली पर्यटन पूर्वाधार आयोजना)को छ । यो आयोजनाले सुरुवाती विनियोजन भन्दा धेरै बजेट खर्च गरेको छ । आयोजनालाई ६ अर्ब ८३ करोड रुपैयाँ बजेट दिइएको भए पनि ७ अर्ब रुपैयाँ भन्दा धेरै खर्च भएको छ । अर्थ मन्त्रालयले अपुग रकम केही अघि रकमान्तर गरेर दिएको थियो ।

सुरुङ निर्माण तीव्रताका साथ अघि बढिरहेको भेरी(बबई डाइभर्सन बहुउदेश्यीय आयोजनामा ३० प्रतिशत रकम खर्च भएको कार्यालयले उल्लेख गरेको छ । आयोजनामा ६ अर्ब ९ करोड रुपैयाँ बजेट विनियोजन भएकोमा १ अर्ब ८३ करोड रुपैयाँ खर्च भइसकेको छ । कालीगण्डकी, कोशी र कर्णाली करिडोरअन्तर्गत उत्तर दक्षिण राजमार्गमा ६१ प्रतिशत रकम खर्च भएको छ । दुई अर्ब ३० करोड रुपैयाँ बजेट विनियोजन भएकोमा १ अर्ब ४२ करोड रुपैयाँ खर्च भइसकेको छ । यो तीवटा बाटोमध्ये कालीगण्डकी करिडोरको खर्च सबैभन्दा राम्रो छ । यो आयोजनालाई केही दिनअघि ३० करोड रुपैयाँ थप बजेट दिइएको छ ।

अर्को सडक आयोजना पुष्पलाल (मध्यपहाडी) राजमार्गमा ८५ प्रतिशत खर्च भएको छ । कूल ५ अर्ब ५५ करोड रुपैयाँ बजेट विनियोजन भएकोमा ४ अर्ब ७२ करोड रुपैयाँ खर्च भएको कार्यालयले जनाएको छ । ८ महिना सकिँदा बुढीगण्डकी जलविद्युत आयोजना निर्माणका लागि ६ अर्ब १७ करोड रुपैयाँ मुआब्जा वितरण गरिएको छ । आयोजनाको अन्य पूर्वाधार निर्माणको काम अघि बढेको छैन ।