२४ माघ /अर्थ र व्यापार  - रातको समयमा पनि काठमाण्डौ उपत्यकामा सार्वजनिक गाडी सञ्चालन गर्ने तयारी भएको छ । यात्रुको सुविधालाई ध्यान दिँदै अब छिट्टै सञ्चालनमा ल्याइने तयारी भैरहेको यातायात व्यवस्था विभागले जनाएको छ । विभागका अनुसार काठमाण्डौ उपत्यकामा रातको समयमा सार्वजनिक गाडी सञ्चालनका लागि यातायात व्यवसायी र काठमाण्डौ महानगरपालिकासँग समन्वय हुनेछ ।

रातको समयमा काम विशेषले गन्तव्यमा पुग्नुपर्नेहरुलाई सार्वजनिक गाडी नहुँदा समस्या भएकोले यो कामलाई अघि बढाउन ढिलाई भैसकेको विभागका प्रवक्ता गोकर्णप्रसाद उपाध्यायले बताए  । राति १० बजेसम्म सार्वजनिक गाडी सञ्चालनमा ल्याने भन्ने सहमति व्यवसायीहरुसँग भए पनि त्यो पनि कार्यन्वयनमा नआएको र नयाँ ढंगले अघि बढ्न लागिएको विभागले जनाएको छ । विभागका अनुसार व्यवसायीहरुले फाइदा मात्रै हेर्ने गरेकोले सार्वजनिक यातायात सहज हुन नसकेकोले अब चौबीसै घण्टा नै सञ्चालन गर्ने गरी तयारी सुरु भएको हो ।

काठमाण्डौ महानगरपालिकाले केही वर्षअघि ४५ लाख रुपैयाँ व्यवसायीलाई अनुदानको रुपमा दिएर १३ वटा सार्वजनिक बस रातको समयमा सञ्चालनमा ल्याएको थियो । परीक्षणका रुपमा झण्डै ६ महिना सार्वजनिक बस सञ्चालनमा आए पनि सुरक्षाको प्रत्याभूति नभएको भन्दै सेवा बन्द भयो । 
रातको समयमा सार्वजनिक गाडीमा यात्रा गर्ने यात्रु, गाडी चालक र सहचालकको सुरक्षाको ग्यारेण्टी नभएको भन्दै आफूहरुले रातको समयमा गाडी चलाउन छाडेको राष्ट्रिय यातायात व्यवसायी महासंघका महासचिव सरोज सिटौलाले बताए । सरकारले व्यवसायीले भनेअनुसार सुरक्षा दिन तयार रहेको बताइसकेको छ ।

वैज्ञानिक भाडादर कायम भए आफूहरु रातको समयमा पनि सार्वजनिक गाडी सञ्चालन गर्न तयार रहेको यातायात व्यवसायीहरुले बताएका छन् । सरकारले दिगो रुपमा सार्वजनिक गाडी रातको समयमा पनि सञ्चालन गर्ने वातावरण बनाइदिए आफूहरु जहिले भन्यो त्यहीबेला गाडी सञ्चालनमा ल्याउन तयार रहेको महासंघका महासचिव सिटौलाको भनाई छ । उनको भनाइअनुसार रातको समयमा गाडी सञ्चालन गर्न काठमाण्डौ उपत्यकाभित्र चौबीसै घण्टा व्यापार तथा व्यवसाय सञ्चालन हुनुपर्ने हुन्छ । त्यसो गर्यो भने चहलपहल बढ्ने र यात्रु नपाउने समस्या हट्ने तथा सेवा सञ्चालन गर्न सहज हुने उनले बताए ।