२९ आषाढ/अर्थ र व्यापार– कोटेश्वर–कंलकी पहिलो सडक खण्डको डिजाइनमै त्रुटी भेटिएपछि दोस्रो खण्डको कंलकी–महारागञ्ज सडक खण्डमा डिजाइननै परिवर्तन गरेर सडक विस्तार गर्ने भएको छ । 

चीन सरकारको आर्थिक र प्राविधिक सहयोगमा विस्तार गर्न लागिएको चक्रपथको कंलकी–महारागञ्ज खण्ड ८.२ किलोमिटर लामो हुने छ । यो खण्ड पनि पहिलो खण्ड जस्तै ८ लेनकै हुनेछ । चीन सरकारको छ अर्ब रुपैयाँ अनुदान सहयोगमा विस्तार गर्न लागिएको यो सडक काम सुरु गरेको चार बर्षमा सक्ने लक्ष्य लिईएको छ । 

सडक विभाग वैदेशिक महाशाखाका अनुसार भदौसम्म मुआब्जा वितरण,साइट क्लियर लगायत सक्ने र असोजबाट विस्तारको कार्य सुरु गर्ने लक्ष्य लिईएको छ ।

कोटेश्वर–कंलकी पहिलो खण्डमा विस्तार गर्दा धेरै कमीकमजोरीहरु भेटिएकाले नयाँ डिजाइन बनाएर विस्तार गर्न लागिएको चक्रपथ सुधार योजना प्रमुख प्रकाशचन्द्र भण्डारीले जानकारी दिए । उनका अनुसार सडक विस्तार पैदल यात्रु मैत्री नभएको र सवारीसाधन समेतको दुर्घटना बढेपछि दोस्रो खण्डको डिजाइन नै परिवर्तन गर्न लागिएको हो ।

भण्डारीका अनुसार सडकको वीचमा ‘मेडियन’,बाटो काट्नका लागि आवश्यकता हेरेर जेव्रा क्रसिङ,ट्राफिक सिंग्नल,हरियाली, छुट्टै साइकल लेन  लगायत राख्न लागिएको हो । कोटेश्वर–कंलकी खण्डमा ‘मेडियन’ छैन् । पहिलो खण्डमा मुख्य लेनको वीचमा ‘मेडियन’ नहुँदा दुर्घटनाको जोखिम उच्च भएकाले दोस्रो खण्डमा मेडियम राख्न लागिएको हो ।

अहिले चिनियाँ प्राविधिकहरुले दोस्रो खण्डको डिजाइन धमाधम तयार पारिरहेका छन् । चिनियाँ प्राविधिकहरुले प्रारम्भिक डिजाइन नेपाल सरकारलाई दिईसकेका छन् भने डिजाइन बनाउने काम अन्तिम चरणमा पुगेको छ ।

त्यसै गरि वरिपरि विरुवाहरु रोपेर सडकलाई हरियाली बनाइने छ । आवश्यकता अनुसार ओभर हेड व्रिज (आकाशे पुल) निर्माण गरिने आयोजनाले जनाएको छ ।

यो खण्डमा पर्ने स्वयम्भू सम्पदा क्षेत्र भएकाले यो एरियामा करिव ५ मिटर फ्लाइ ओभर बनाउने वा अण्डर पास बनाउने भन्ने छलफल भइरहेको छ । उनका अनुसार महाराजगंजमा अण्डरपास वे बनाउने विषयमा समेत छलफल भइरहेको  छ । 

त्यस्तै महाराजगञ्ज –कोटेश्वर फाइनल खण्डको समेत सर्भे भैरहेको चक्रपथ सुधार योजनाले जनाएको छ । यो खण्डको समेत चिनियाँ अनुदानमा बनाउने विषयमा छलफल भैरहेको वैदेशिक महाशाखाले जनाएको छ ।