३० साउन/अर्थ र व्यापार– चिनियाँ तस्करले हङकङबाट तस्करगरी भित्रााएको ब्रेक सुबाट बरामद गरिएको सुन मंगलबारबाट धमाधम गालिएको छ । नेपाल राष्ट्र बैंकको टक्सार महाशाखाले तस्करीको सो सुन सोमबार तौलँदा ६० केजी ७ सय ८९ ग्राम रहेको पाइएको थियो ।
केन्द्रीय अनुसन्धान ब्युरो (सीआईबी), राजस्व अनुसन्धान विभाग, नेपाल राष्ट्र बैंक केन्द्रीय कार्यालय र नेपाल राष्ट्र बैंक टक्सार कार्यालयका प्रतिनिधिको रोहबरमा सोमबार बरामद गरिएको ब्रेक सुबाट सुन निकालेर जोखिएको थियो ।
मंगलबारबाट सो सुनलाई गालेर विभिन्न तौलका टुक्रा बनाइँदै छ । सुनमा कालो रङ लगाइएकाले त्यसलाई पनि हटाइँदै छ । यसकारण सुनको वास्तविक परिमाण गालेपछि मात्र थाहा हुने टक्सार कार्यालयले जनाएको छ ।
सुन गाल्दा विभिन्न परिमाणका साँचोमा राखिने भएकाले सुनका टुक्रा कति तौलका हुन्छन् भन्नेबारे पनि मंगलबार (सुन गालेपछि) मात्र जानकारी हुने टक्सार महाशाखाले जनाएको छ ।
राजस्व अनुसन्धान विभागले एक क्वीन्टल भनेर प्रचार गरिएको यस सुन तस्करी प्रकरणको अनुसन्धान १९ दिनसम्म गरेर थप छानबिनको जिम्मा सीआईबीलाई लगाएको थियो । सीआईबीले संगठित अपराध र राजस्व छलीको कसुरमा यो प्रकरणको अनुसन्धान गरिरहेको छ । सोही क्रममा सीआईबीले सुनको परिमाण जोख्ने र त्यसलाई गाल्ने जिम्मा नेपाल राष्ट्र बैंकको टक्सार विभागलाई दिएको थियो ।

टक्सार विभागले आइतबार साँझ सीआईबीको पत्र प्राप्त गरेको थियो । सोही पत्रका आधारमा सोमबार ब्रेक सुबाट सुन निकालिएको र मंगलबार गालिएको हो । हङकङबाट गत २९ असारमा काठमाडौ ल्याएर त्रिभुवन अन्तर्राष्ट्रिय विमानस्थल भन्सारसमेत पार गरिसकेको तस्करीको सुन सिनामंगल सडकबाट राजस्व अनुसन्धान विभाग र सशस्त्र प्रहरीको टोलीले बरामद गरेको थियो ।

१ सय ६० वटा ब्रेक सु बरामद भएकोमा त्यसभित्र लुकाइएको सुनको परिमाण भने करिब ६१ केजी रहेको पाइएको छ । सुरुमा दुई जनालाई सुनसहित पक्राउ गरेकोमा त्यसपछि भन्सारका अधिकृतसहित ३ कर्मचारी, ३ विदेशी नागरिक र ४ जना भन्सार एजेन्टसहित १८ जनालाई पक्राउ गरिएको थियो ।
जसमध्ये १७ जना हाल प्रहरीको केन्द्रीय अनुसन्धान ब्युरोको हिरासतमा छन् भने एक जनालाई हाजिरी जमानतमा रिहा गरिएको छ । सोही प्रकरणमा पक्राउ परेका दुई चिनियाँ र भारतीय राहदानीवाहक अर्का एक जनालाई पक्राउ गरिए पनि हाजिरी जमानतमा छाडिएको थियो ।