३१ जेठ/अर्थ र व्यापार – विश्व वातावरण दिवसको अवसर पारेर होटल सोल्टीमा पहिलोपटक वेस्ट म्यानेज्मेन्ट एन्ड क्लाइमेट कन्फरेन्स (डब्लुएमसीसी) सम्पन्न गरेको छ । नेपाल उद्योग परिसंघ, द कोकाकोला फाउन्डेसन, राष्ट्रिय मानव अधिकार आयोग, खाली सिसी, वुमन फर ह्युमन राइट्स र कन्फेडेरेसन अफ नेपालिज इन्डस्ट्रिज योङ अन्ट्रप्रन्योर्स फोरमको संयुक्त आयोजनामा सो सम्मेलन गरिएको हो ।
डब्लूएमसीसीले फोहोर व्यवस्थापन, जलवायु परिवर्तन र वातावरणीय स्थायित्वसम्बन्धी महत्वपूर्ण मुद्दाको समाधानका लागि सरकारी कर्मचारी, उद्योग व्यवसायी, वातावरणविद् र नागरिक अगुवालाई एकसाथ ल्याएको थियो ।
कार्यक्रमको उद्घाटन राष्ट्रिय सभाका अध्यक्ष नारायण दाहालले गरेका थिए । कार्यक्रममा मटेरियल रिकभरी फेसिलिटीको अनावरण र ‘एबीसी फर क्लाइमेट चेन्ज’ पुस्तकको विमोचन गरिएको थियो । सम्मेलनको समापनमा भने वातावरण तथा वनमन्त्री नवल किशोर साह सुडीले गरेका थिए ।
कार्यक्रममा कोका–कोला फाउन्डेसनका प्रेसिडेन्ट कार्लोस पागोआगाले वेस्ट म्यानेजमेन्ट एन्ड क्लाइमेट कन्फरेन्स नेपालका लागि एक कोसेढुंगा भएको बताए ।
सम्मेलनमा भएको मेयर फोरममा फोहोरको प्रभावकारी व्यवस्थापन रणनीतिबारे स्थानीय सरकारी अधिकारी र उद्योगीबीच संवाद गरिएको थियो । ललितपुर, धनगढी, धनकुटा, बूढानीलकण्ठका मेयर र चन्द्रागिरिका उपमेयरको सहभागिता रहेको थियो ।
सम्मेलनले सर्कुलर अर्थ व्यवस्थालाई प्रवद्र्धन गर्न फोहोरलाई उपयोगी स्रोतमा परिणत गर्ने उपायबारे छलफल गरिएको थियो । सो छलफलमा कार्बन उत्सर्जन, प्लास्टिक प्रदूषण, काठमाडौंको वायु प्रदूषण, सगरमाथा लगायत हिमालमा देखापरेको जलवायु परिवर्तनको असरजस्ता विषयमा छलफल भएको थियो । जिआइजेटले सम्मेलनमा प्रस्तुति दिँदै फोहोर व्यवस्थापनका नौला विचार र पेरिस सम्झौतामा नेपालको प्रतिबद्धतालाई उजागर गरेको थियो ।
वुमन फर ह्युमन राइट्सकी अध्यक्ष कविता पाण्डेले सम्मेलनले जलवायुका असर कम गर्ने कार्यमा भाग लिन चाहने समुदायलाई थप ऊर्जा प्रदान गरेको बताइन् ।
प्रतिनिधिसभा सदस्य सोबिता गौतम, तोसिमा कार्की र उदय राणाले वातावरणीय चुनौतीको सामना गर्न साझा प्रयासको महत्वपूर्ण आवश्यकतालाई जोड दिएका थिए । नेपालमा फोहोर व्यवस्थापन र जलवायुसम्बन्धी कार्यलाई अगाडि बढाउने व्यापक चासो र प्रतिबद्धतालाई उजागर गर्न ३३ जिल्ला र पाँच देशका गरी ६ सय संस्थाका करिब १ हजार प्रतिनिधि सो सम्मेलनमा सहभागी थिए ।