१९ पुस/अर्थ र व्यापार– मुलुकको राष्ट्रिय ध्वजाबहाक नेपाल वायुसेवा निगम र नेपाली विद्युत प्राधिकरणबीच कार्गो सामान ढुवानीमा सहयोग गर्ने सम्बन्धी सम्झौतापत्रमा हस्ताक्षर भएको छ । 
संस्कृति, पर्यटन तथा नागरिक उड्डयन मन्त्रालयमा सोमबार वायुसेवा निगम र प्राधिकरणबीच प्राधिकरणको कार्गो (मालसामान) निगमको विमान मार्फत् ढुवानी गर्ने सम्झौता भएको हो । 
संस्कृति, पर्यटन तथा नागरिक उड्डयनमन्त्री प्रेमबहादुर आले र पर्यटन सचिव महेश्वर न्यौपानेको उपस्थितिमा प्राधिकरणका कार्यकारी निर्देशक कुलमान घिसिङ र निगमका कार्यकारी अध्यक्ष युवराज अधिकारीले सो सम्झौतापत्रमा हस्ताक्षर गरेका हुन । 
सम्झौता अनुसार अब प्राधिकरणका कर्मचारी र कर्मचारीका परिवारले निगमको विमानबाट अन्तर्राष्ट्रिय उडान गर्दा टिकटमा १५ प्रतिशत छुट पाउने छन् ।  कर्मचारीले छुट पाउन प्राधिकरणको सिफारिस पत्र र परिचयपत्र अनिवार्य रुपमा पेस गर्नुपर्नेछ । निगमको बिक्री कार्यालयबाट टिकट खरिद गर्नेले मात्र यस्तो छुट सुविधा पाउने छन् । 
सम्झौतामा प्राधिकरणको सामान ढुवानी र त्यहाँका कर्मचारीले विदेश भ्रमण गर्दा निगमकै विमान प्रयोग गर्ने उल्लेख छ  । प्राधिकरणले निगमको उडान गन्तव्य रहेका स्थानबाट कार्गो ढुवानी गर्दा परिमाणका आधारमा ५–१० प्रतिशत छुट पाउने छ ।
सो कार्यक्रममा पर्यटन मन्त्री आलेले हाल घाटामा सञ्चालित निगमलाई प्राधिकरणले गरेको यस्तो किसिमको सहयोग प्रति आधार व्यक्त गरे । प्राधिकरणका कार्यकारी निर्देशक कुलमान घिसिङले प्राधिकरणलाई माथि उकास्न गरेको विविध राम्रा कामको मन्त्री आलेले खुलेर प्रशंसा गरे । 
आफूले सासंद् हुँदा वन तस्करी रोक्न आवाज उठाएको आलेले बताए । यसैगरि, मन्त्री आलेले आफ्नो कारण नै वन जोगाउने काम भएको र कोप सम्मेलनमा प्रधानमन्त्री जाँदा नेपाललाई कार्वन सञ्चिती गर्नका लागि रोयल्टी प्राप्त भएको दावी गरे । प्राधिकरणका कार्यकारी निर्देशक घिसिङले प्राधिकरणले यसअघि पनि निगमकै विमान प्रयोग गर्दै आएकोमा यससम्बन्धी सम्झौता भएको भन्दै खुसी व्यक्त गरे । 
उनले अब प्राधिकरणको कामका कर्मचारीहरुले पनि निगमकै विमान प्रयोग गर्ने बताए । उनले अब यो सम्झौतालाई तत्कालै कार्यान्वयन गर्ने प्रतिबद्धता समेत जनाए । सो कार्यक्रममा पर्यटन मन्त्रालयका सचिव महेश्वर न्यौपानेले निगमले अब सेवा र गुणस्तरमा सुधार गर्नुपर्ने बताए ।