७ मंसिर / अर्थ र व्यापार- संस्कृति, पर्यटन तथा नागरिक उड्ययन मन्त्री रवीन्द्र अधिकारीले वाइडबडी विमान खरिदका कागजात २४ घण्टाभित्र संसदीय समितिलाई बुझाउने प्रतिवद्धता जनाएका छन् । शुक्रवार संसदको अन्तर्राष्ट्रिय सम्बन्ध समितिमा सांसदहरुले वाइडबडी खरिद प्रकरणमा अनियमितता भएको भन्दै खरिद प्रकरणका कागजपत्रहरु माग गरेपछि मन्त्री अधिकारीले २४ घण्टाभित्र बुझाउने प्रतिवद्धता जनाएका हुन् ।

समिति बैठकमा सांसदहरुले वाइडबडीको स्वामित्व प्रष्ट नभएको भन्दै प्रमाण पेश हुनुपर्ने धारणा व्यक्त गरेका थिए । नेकपाका सांसद भीम रावलले वाइडबडी विमान आएको तर त्यो किनेर ल्याएको हो कि भाडामा ल्याएको हो भन्ने प्रष्ट नभएकाले खरिद गरेको प्रमाणपत्र नै उपलब्ध हुनुपर्ने माग गरेका थिए । कांग्रेस सांसद सुजाता कोइराला, दिव्यमणि राज भण्डारी, प्रकाशमान सिंह, डा. नारायण खड्का, नेकपा सांसद अग्नि सापकोटा, सांसद नारदमुनी राना लगायतले उपसमिति गठन गरी विस्तृत छानबिन हुनुपर्ने धारणा राखेका थिए ।

नेपाल वायुसेवा निगमका महाप्रबन्धक सुगतरत्न कंसाकारले वाइडबडी विमान खरिदको कागजातहरु असन बजारमा बाँड्नुपर्ने हो भन्दै संसदीय समितिमै जंगिए । शुक्रबार बसेको अन्तर्राष्ट्रिय सम्बन्ध समितिको बैठकमा सांसदहरुले उठाएको प्रश्नहरुको उत्तर दिने क्रममा महानिर्देशक कंसाकारले वाइडबडी खरिदको कागजात माग्नेहरु धेरै भएको भन्दै ‘के असन बजारमा लगेर बाँड्नुपर्ने हो ?’ भनेका हुन् ।

छलफलका क्रममा सांसदहरुले सार्वजनिक खरिद ऐनको प्रक्रिया मिचेर विमान खरिद गरिएको कुरा आएको र यस विषयमा प्रष्ट पार्न उनलाई आग्रह गरेका थिए । तर, महानिर्देशक कंशाकारले वाइडबडी विमान खरिद गर्दा सार्वजनिक खरिद ऐन नमिचेको दाबी गरे । विमान खरिद गर्नुपुर्व व्यापारिक योजना तयार पारेर विमान खरिद गरिएको समेत उनले स्पष्ट पारे । ‘व्यापारिक योजना तयार नगरी त १९ सिटे विमान पनि किन्न सक्दैनौं’ उनले भने, ‘हामीले व्यापारिक योजना बनाएर खरिद गरेका हौं, यसमा शंका छैन ।’

महानिर्देशक कंसाकार बोलिरहेका बेला सत्तारुढ नेकपाका सांसद भीम रावलले केही शब्दलाई लिएर आपत्ति जनाए । संसदीय समितिलाई ‘असन बजार’ भन्ने शब्द प्रयोग गरेर अवहेलना गरेको भन्दै कंसाकारलाई माफी माग्नुपर्ने रावलको माग थियो । रावलको आपत्तिपछि महानिर्देशक कंसाकारले आफूले सम्मानित समितिलाई त्यस्तो नभनेको भन्दै माफी मागे ।