१० असार / अर्थ र व्यापार नेपालको विभिन्न स्थानमा पदयात्रा तथा पर्वतारोहणमा जाने पर्यटकहरुको उद्धारको नाममा ठगी भईरहेको भन्दै यस सम्बन्धमा अनुसन्धान,छानविन र आवश्यक कारवाहीको सिफारिस गर्न गठन गरिएको कार्यदल माथि राजनीतिक दबाव सिर्जना भएको छ । पदयात्रा तथा पर्वतारोहणमा जाने पर्यटकहरुको उद्धारको नाममा ठगी गर्नेहरुले विभिन्न राजनीतिक दलका नेताहरुमार्फत छानविन कार्यदल माथि दबाव सिर्जना गरेको छानबिन कार्यदलका एक सदस्यले अर्थ र व्यापारलाई वताए ।

यसैविच यस्तो धन्दामा सक्रिय कतिपय व्यवसायिहरुले विभिन्न राजनीतिक दलका नेताहरु संग भेट गर्दै आँफुलाई बचाँईदिन र छानविन कार्यदललाई राजनीतिक दवाव सिर्जना गरिरहेको जानकारी अर्थ र व्यापारलाई प्राप्त भएको छ । गत शुक्रवार पर्यटक उद्धारका नाममा ठगि गर्ने केहि हेलिकोप्टर्स,ट्राभल एजेन्सि,हस्पिटल र रेस्क्यु कम्पनीहरुका सञ्चालकहरुको बैठक समेत बसेको अर्थ र व्यापारलाई जानकारी प्राप्त भएको छ ।

यसैविच रेस्क्यु धन्दावालहरुले आँफुहरुले राजनीतिक सेटिङ मिलाईसकेको र आँफुहरुलाई छानविनको दायरामा ल्याई कार्वाही गरिए साना ट्रेकिङ कम्पनीहरुलाई पार्ने भन्दै ट्रेकिङ कम्पनीहरुलाई त्रसित बनाएको एक ट्रेकिङ कम्पनीका सञ्चालकले अर्थ र व्यापारलाई वताए । त्यस्तै केहि हेलिकोप्टर्स कम्पनीका सञ्चालकहरुले पनि ट्रेकिङ कम्पनीहरुलाई मात्र दोषि देखाएर आँफुहरु बच्ने लविङ तिब्र पारेका छन । तर छानविन कमिटिका सदस्यहरुले भने यस्तो धन्दामा सक्रिय सवै कम्पनीहरुमाथि छानविन गरिरहेको अर्थ र व्यापारसंग वताएका छन ।

“यस सम्बन्धमा अनुसन्धान र कार्वाहीको सिफारिस गर्न ठूलै राजनीतिक ईच्छाशक्ति चाहिन्छ, राजनीतिक ईच्छाशक्ति भयो भने मात्र कार्वाही सम्भव छ”–छानविन कार्यदलका एक सदस्यले अर्थ र व्यापारलाई वताए । ति सदस्यका अनुसार यस्तो धन्दामा सक्रिय कतिपयले विभिन्न राजनीतिक दलका नेताहरु मार्फत फोन गर्दै आँफुहरुलाई बचाईदिन र छानविनलाई प्रभावित पार्न खोजिरहेका छन ।

तर पर्यटनमन्त्री रविन्द्र अधिकारी पर्यटकलाई उद्धारका नाममा ठगि गर्नेहरु विरुद्ध कार्वाही नै गर्ने अडानमा रहेको उनी निकट स्रोतले अर्थ र व्यापारलाई वताएको छ । मन्त्रीको अडान भएपछि प्रभावकारी छानविन र कार्वाहि पनि हुने पर्यटन मन्त्रालय स्रोतले वतायो ।

यस सम्बन्धमा अनुसन्धान गर्न गत जेष्ठ २१ गते संस्कृति, पर्यटन तथा नागरिक उड्ड्यन मन्त्रालयले ६ सदस्यीय एक कार्यदल गठन गरेको थियो । मन्त्रालयका सहसचिव घनश्याम उपाध्यायको संयोजकत्वमा गठित कार्यदलको सदस्यहरुमा पर्यटन विभागका महानिर्देशक, डिआइजी मनोज न्यौपाने, नेपाल नागरिक उडड्यन प्राधिकरणका उपनिर्देशक सुभाष झा, मन्त्रालयका उपसचिव प्रकाश शर्मा ढकाल र आन्तरिक राजश्व विभागका उपमहानिर्देशक यज्ञप्रसाद ढुंगेल रहेका छन । 

मन्त्रालयले पर्यटकहरुलाई लेक लाग्ने लगायतका स्वास्थ्य समस्या तथा अन्य विपतको उद्धारको नाममा ट्रेकिङ,ट्राभल्स कम्पनी, हेलिकप्टर सेवा प्रदायक संस्था र अस्पताल समेतको मिलेमतोमा फर्जी विवरण तयार गरी बीमा रकम दाबी गर्ने र ठगी गर्नेहरु माथि अनुसन्धान गरिरहेको छ । कार्यदललाई आगामी अषाढ १५ भित्र आवश्यक अनुसन्धान, छानविन गरी सत्यतथ्य पत्ता लगाई समस्या निराकरणको लागी उपाय,विधि र कारवाहीको समेत सिफारिस गर्न निर्देशन दिईएको छ ।