२३ साउन / अर्थ र व्यापार – आर्थिक वर्ष ०७३/७४ मा वाणिज्य बैंकहरूको खुद नाफा बढेको देखिएको छ । हालसम्म अपरिष्कृत वित्तीय विवरण प्रकाशित गरेका ११ वाणिज्य बैंकहरूको तथ्यांक हेर्दा सो अवधिमा बैंकहरूको नाफा ३२ दशमलव १४ प्रतिशतले बढेको छ । अघिल्लो आवमा १३ अर्ब ८२ करोड खुद मुनाफा गरेका यी ११ बैंकहरूले गत आवमा १८ अर्ब २७ करोड मुनाफा कमाएका छन् । बैंकहरूको खुद ब्याज आम्दानी र सञ्चालन मुनाफा बढेपछि खुद नाफा पनि बढेको हो ।

अघिल्लो आर्थिक वर्षको तुलनामा प्रभु बैंकले सबैभन्दा धेरै नाफा बढाउन सफल भएको छ । सो अवधिमा बैंकले ५२ दशमलव ६० प्रतिशत नाफा बढाउन सफल भएको देखिन्छ । खुद ब्याज आम्दानी र सञ्चालन मुनाफा बढेसँगै १ अर्ब ७२ करोड खराब कर्जा संकलन गर्न सफल भएपछि बैंकको खुद नाफा बढेको हो । 

रकमका आधारमा भने नबिल बैंक अगाडि देखिएको छ । नबिल बैंकले गत असार मसान्तसम्ममा ३ अर्ब ६२ करोड खुद नाफा आर्जन गरेको छ । यो अघिल्लो आवको सोही अवधिको तुलनामा २८ दशमलव ४३ प्रतिशत बढी हो । सिटिजन्स बैंकको नाफा सो अवधिमा १२ दशमलव शून्य १ प्रतिशत मात्र बढेको छ भने सन्राइज बैंकले १ अर्ब १६ करोड खुद नाफा कमाएको छ ।

गत असार मसान्तमा बैंकहरूको सञ्चालन मुनाफा ३४ दशमलव ९६ प्रतिशत बढेको छ । अघिल्लो आवको असार मसान्तमा १७ अर्ब ५७ करोड सञ्चालन मुनाफा आर्जन गरेको बैंकहरूले गत आवमा २३ अर्ब ७१ करोड नाफा आर्जन गरेको छ । एनएमबि बैंकको नाफा सो अवधिमा सबैभन्दा धेरै ५९ दशमलव ८५ प्रतिशत बढेको छ । 

त्यस्तै सबैभन्दा कम सिद्धार्थ बैंकको सञ्चालन मुनाफा ११ दशमलव ९५ प्रतिशत मात्र बढेको छ । रकमका आधारमा नबिल बैंकले सो अवधिमा सबैभन्दा धेरै ५ अर्ब ४६ करोड सञ्चालन मुनाफा आर्जन गरेको छ भने सिटिजन्स बैंकको नाफा सबैभन्दा कम १ अर्ब २४ करोड आर्जन गरेको छ ।

११ वाणिज्य बैंकहरूको खुद ब्याज आम्दानी गत असार मसान्तसम्ममा २६ दशमलव १७ प्रतिशत बढेको छ । सन्राइज बैंकको ब्याज आम्दानी सो अवधिमा सबैभन्दा धेरै ४५ दशमलव ८३ प्रतिशत र सिटिजन्स बैंकको सबैभन्दा कम ८ दशमलव शून्य ६ प्रतिशत बढेको छ । नबिल बैंकले सो अवधिमा ५ अर्ब ४५ करोड ब्याज आम्दानी गर्न सफल भएको छ भने सिटिजन्स बैंकले १ अर्ब ७५ करोड ब्याज आम्दानी गरेको छ ।