११ चैत्र /अर्थ र व्यापार -  गोप्य सूचना मुलुक बाहिर जाने सम्भावना भएको भन्दै संसदभित्र र बाहिरसमेत चर्चा र बहस हुन थालेपछि एभरेष्ट बैंकको सिंहदरबारभित्रको शाखालाई स्थानान्तरण गरी बाहिर ल्याउने र राष्टिय वाणिज्य बैंकको सिंहदरबार बाहिर भएको शाखालाई भित्र लैजाने तयारी भएको छ ।

राष्ट्रिय वाणिज्य बैंकको थापाथली शाखालाई सिंहदरबारभित्र लैजाने र त्यही ठाउँ वा त्यही क्षेत्र (लोकेसन) सिंहदरबारभित्र भएको एभरेष्ट बैंकलाई ल्याउने तयारी भएको छ । एभरेष्ट बैंकको सिंहदरबारभित्रको शाखालाई लिएर पटक–पटक संसदभित्र र बाहिर आवाज उठ्न थालेपछि बैंक विवादमा आउने र उसको विश्वासनियतामा आँच आउने भएकाले पनि यसो गर्न लागिएको हो ।
एभरेष्ट बैंकलाई शाखा स्थानान्तरणको प्रस्ताव मौखिक रुपमा राख्ने तयारीमा नेपाल राष्ट्र बैंक उच्च अधिकारी पुगेका छन् । पहिलो चरणमा मौखिक रूपमा एभरेष्ट बैंकका सञ्चालकलाई सिंहदरबारभित्र भएको शाखालाई बाहिर ल्याउनका लागि सम्झाउने तयारी भइरहेको राष्ट्र बैंक उच्च स्रोतको भनाइ छ ।

यदी उक्त प्रस्ताव एभरेष्ट बैंकले मानेन भने अर्को उपाय अपनाउने तयारी पनि भइरहेको छ । एभरेष्ट बैंकले शाखा स्थानान्तरणको प्रस्ताव मानेन भने पनि राष्ट्रिय वाणिज्य बैंकलाई सिंहदरबार लैजाने लगभग निश्चित भएको राष्ट्र बैंक स्रोतको भनाइ छ । एभरेष्ट बैंकको प्रतिस्पर्धीको रुपमा राष्ट्रिय वाणिज्य बैंकलाई सिंहदरबार भित्र्याउँदै छ । त्यसपछि एभरेष्ट बैंकले गर्दै आएको काम राष्ट्रिय वाणिज्य बैंकलाई दिने र एभरेष्ट बैंक काम विहीन भएपछि स्वतः शाखा सार्न बाध्य हुने रणनीति अर्थ मन्त्रालय र राष्ट्र बैंकले बनाएको छ ।

अर्थमन्त्री डा. युवराज खतिवडाले पनि गत फागुन २९ गते संसदमा राष्ट्रिय वाणिज्य बैंकको शाखा सिंहदरबार ल्याउने तयारी भइरहेको बताएका थिए । प्रतिनिधिसभाको बैठकमा सांसदहरुले सरकारी लगानीका बैंकहरुलाई सिंहदरबारमा प्रवेश रोक लगाएर विदेशी लगानीको बैंकलाई सरकारले प्रोत्साहन गरेको भन्दै अर्थमन्त्रीको ध्यानाकर्षण गराएका थिए । सांसदले राखेको प्रश्नको जवाफ दिँदै अर्थमन्त्री खतिवडाले पूर्वाधार नभएकाले सरकारी बैंक आउन नसकेको र सरकारी स्वामित्वको राष्ट्रिय वाणिज्य बैंकलाई ल्याउने तयारी भइरहेको बताएका थिए । अर्थमन्त्रीको सोही भनाइ अनुसार राष्ट्रिय वाणिज्य बैंकलाई सिंहदरबार भित्र्याउने काम अघि बढेको अर्थ मन्त्रालय उच्च स्रोतको भनाइ छ ।

नेपालका भीभीआईपी र भीआईपीको आर्थिक कारोबारका नाममा गोप्य सूचना विदेशमा समेत पुग्ने भएको भन्दै चिन्ता व्यक्त थालिएपछि सरकारले यस्तो कदम चाल्न बाध्य हुनु परेको हो । अहिले सिंहदरबारभित्र एभरेष्ट बैंकले मात्रै सेवा प्रदान गर्दै आएको छ । एभरेष्ट बैंक भारतीय पञ्जाब नेसनल बैंकको लगानीमा स्थापना भएको हो । उक्त बैंकमा पञ्जाब नेसनल बैंकको २० प्रतिशत शेयर छ ।