२७ पुस/अर्थ र व्यापार – नेपाल बैंकर्सको बैठक अबको केही क्षणमा बुधबार साँझ ५ बजे बस्ने भएको छ । सो बैठकले ब्याजदर यथावत् राख्ने कि घटाउने भन्नेबारे निर्णय गर्ने बताईएको छ । बुधबार साँझ ५ बजेकालागि डाकिएको संघको बैंकठको कार्यसूचीमा बैंकको ब्याजदरको विषयमा छलफल हुने प्रस्ताव रहेको छ ।
संघका एक सदस्य एवं बैंकर्सले जानकारि दिए अनुसार अहिले बैंकरहरूबीच दुई धार छ । एकथरी बैंकरहरू ब्याजदर केही घटाउनुपर्छ भन्ने लाइनमा छन् भने अर्काथरी बैंकरहरू भने वैश्विक र आन्तरिक परिस्थिति पनि अनुकूल नभएकाले तत्काल ब्याजदर घटाउनु हुँदैन भन्ने पक्षमा छन् ।
उनीहरुका अनुसार विश्वव्यापी मन्दीको असर नेपालमा पनि देखिने र ब्याजदर कम हुँदा फेरि आयातमा चाप पर्न गई बाह्य क्षेत्र समस्याग्रस्त हुने आकलन छ।
केन्द्रीय बैंकले मौद्रिक नीतिको अर्थवार्षिक समीक्षामा पनि ब्याजदरका उपकरण चलाउने सम्भावना छैन। तर, उसले अनौपचारिक रुपमा बैंकरहरुलाई ब्याजदर घटाएर सकारात्मक माहोल सिर्जना गर्न निर्देशन दिएको बताइन्छ । तर, राष्ट्र बैंकका अधिकारीहरु भने परिस्थिति हेर्दा ब्याजदर घटाइहाल्ने स्थिति नरहेको बताउँछन् ।
ब्याजदर घटाउनेबित्तिकै त्यसको असर अर्थतन्त्रमा कस्ता पर्छ भन्ने अहिल्यै भन्न नसकिने अवस्था भएकाले केही समय पर्ख र हेरको अवस्थामा रहनुपर्छ भन्ने प्रमुख कार्यकारी अधिकृतहरु पनि छन् । तर, ब्याजदर केही न केही घटाउनुपर्ने दबाब गभर्नर महाप्रसाद अधिकारीमाथि छ । उनलाई प्रधानमन्त्री पुष्पकमल दाहाल र अर्थमन्त्री विष्णु पौडेलले ब्याजदरलाई केही कम गराएर लगानीकर्ताको मनोवल बढाउन भनेका छन् ।
अबको केही क्षणमा ५ बजे बस्ने बैठकले ब्याजदरका बारेमा निर्णय गर्छ । व्याजदर घटाउने वा तत्कालका लागि यथावत् राख्नेमध्य एक निर्णय हुने बताउँदै एक बैंकरले भने, ‘सबै सिइओको धारणा सुनेपछि बैंकर्स संघले निर्णय गर्छ ।’
नेपाल राष्ट्र बैंकले बैंक तथा वित्तीय संस्थाहरूले निक्षेपमा दिने र कर्जामा लिने ब्याजदरबीचको औसत अन्तर (स्प्रेडदर) घटाइसकेको छ । बैंकहरूले कर्जामा चर्काे प्रिमियम असुलेको भन्दै निजी क्षेत्रले विरोध गरेपछि राष्ट्र बैंकले स्प्रेडदरमा कैंची चलाइसकेको हो । यसअघि बैंकहरूले ४.४ प्रतिशतसम्म स्प्रेडदर लिँदै आएका थिए ।
राष्ट्र बैंकले तत्काल ब्याजदर बढ्न नदिन उपायहरु लगाएको देखिन्छ । बैंकरहरु पनि अहिलेको भन्दा बढी ब्याजदर बनाउन नहुने पक्षमा छन् । तर, केही सिइओहरु ब्याजदर घटाउने पक्षमा उभिएका छन् । बैंकर्स संघको बैठकमा सबैको निर्णय सुनेपछि आवश्यक निर्णय हुने छ ।
सोही बैठकले संघको आगामी नयाँ अध्यक्षमा सुनील केसीलाई नै चयन गर्दै छन्। आज पाँच बजेको बैठकले केसीलाइ अध्यक्ष बनाउँदै छ । केसी अहिले संघको उपाध्यक्ष एवं कार्यकारी अध्यक्ष हुन्। यसैगरि, केसी एनएमबी बैंकका प्रमुख कार्यकारी अधिकृत पनि हुन् ।
केहीदिन अघि मात्र संघका अध्यक्ष अनिल उपाध्यायको कृषि विकास बैंकमा कार्यकाल सकिएपछि संघको नेतृत्व रिक्त भएको थियो । संघको विधानले प्रमुख कार्यकारी अधिकृत नहुने बित्तिकै संघमा रहेको पद पनि जाने व्यवस्था गरेको छ।
सोही व्यवस्था अनुसार यो बैठकले केसीलाई नयाँ अध्यक्षको जिम्मेवारी दिन लागेको संघ स्रोतले बताएको छ ।