४ पुस/अर्थ र व्यापार – ऊर्जा जलस्रोत तथा सिँचाइमन्त्री शक्तिबहादुर बस्नेतले मुलुकको राष्ट्रिय गौरवका आयोजनाको सूचीमा रहेको भेरी–बबई आयोजनालाई गति दिन निर्देशन दिएका छन् ।
मंगलबार आयोजनाका पदाधिकारी र निर्माण व्यवसायीसँग छलफल गर्दै मन्त्री बस्नेतले तत्काल काममा गति दिन निर्देशन दिएका हुन् । आयोजनाको काममा ढिलाइ हुँदा सरकारले आम जनता र मुलुकलाई जवाफ दिनुपर्ने बताउँदै उनले भने, ‘यस्तो काममा ढिलाइ गर्ने छुट कसैलाई छैन ।’
यो आयोजनामा सुरुङ निर्माण सम्पन्न भएको लामो समय भएपनि बाँधस्थल र विद्युत् गृहको काममा अपेक्षित प्रगति नभएको र निर्माण व्यवसायीको कमजोर कार्यसम्पादनका कारण निर्माण कार्यले गति लिन नसकेको मन्त्रालयले जनाएको छ ।
आयोजना सम्बद्ध अधिकारी आयोजना स्थलमा नबस्ने, लामो समयसम्म परामर्शदाताको अभावका कारण निर्माण व्यवसायीलाई आवश्यक निर्देशन तथा परिचालनमा समेत समस्या पैदा भएको समेत मन्त्रालयले जनाएको छ ।
प्रधानमन्त्री पुष्पकमल दाहाल प्रचण्डले प्रधानमन्त्री कार्यालय मातहत रहेको एक्सन रुम मार्फत आयोजनाबारे जानकारी लिएका थिए । काममा अपेक्षित प्रगति नभए सहन नसकिने भन्दै मन्त्री बस्नेतले आयोजनाका अधिकारी र निर्माण व्यवसायीलाई चेतावनी समेत दिएका छन् ।
एकले अर्कालाई दोष देखाएर आयोजनाका काममा ढिलाइ गरेको भन्दै मन्त्री बस्नेतले अबदेखि हरेक १५ दिनमा सिँचाइ विभाग र हरेक महिना मन्त्रालयका तर्फबाट आयोजना निरीक्षण गर्ने जानकारी दिए ।
सो अवसरमा निर्माण व्यवसायी तथा रमण कन्स्ट्रक्सनका सञ्चालक रमणकुमार महतोले आयोजनाका अधिकारीले समयमा भुक्तानी नगरिदिएको तथा अन्य अत्यावश्यक काम नगरिदिएका कारण आयोजना स्थलमा प्रभावकारी काम नभएको आरोप लगाए ।
आयोजना निर्देशक रणबहादुर बम लगायतका अधिकारीले निर्माण व्यवसायीले काम नगरेको, आवश्यक जनशक्ति परिचालन नगरेको तथा उपकरण एवम् निर्माण सामग्रीको व्यवस्था नगरेको बताए ।
आयोजना निर्देशक बमले दैनिक रुपमा दुईसय ६० घनमिटरका दरमा ढलान तथा कंक्रिटको काम हुनुपर्ने बताए । उनले आयोजनालाई दैनिक तीनवटा शत्रमा काम गर्ने वातावरण मिलाइने विश्वास दिलाए ।
छलफलमा ऊर्जा जलस्रोत तथा सिँचाइ मन्त्रालयका सचिव सुशीलचन्द्र तिवारीले राज्यको साधन र स्रोत लगानी भएको आयोजनामा कुनै पनि ढिलाई नगर्न सम्बद्ध पक्षलाई निर्देशन दिए ।